Read Kangri 2 कुरिन्थियों 4 Bible Online

2 कुरिन्थियों 4 - Kangri bible

2 कुरिन्थियों 4

¹इसतांई जाह़लू अहां पर देहई दया होई, कि अहां जो परमात्मे दा वचन सणाणे दी सेवा मिल्ली, तां अहां हिम्मत नीं छड्डदे।

²अपर अहां सर्मा दे गुप्त कम्मां जो छड्डी दित्या ऐ, कने ना चलाकी करदे, कने ना परमात्मे दे वचने जो अपणे फायदे तांई सणांदे हन। अपर अहां परमात्मे सामणै सिर्फ सच्चाई दस्सदे हन, तांजे हर इक्क माणु एह़ गवाही दैं, कि अहां सच्च ग्लांदे हन।

³कने जिस सुसमाचारे जो अहां सणांदे हन, तिस पर जे कोई पड़दा पेआ ऐ, तां एह़ सिर्फ तिन्हां तांई पेआ ऐ, जेह्ड़े नास होणे आल़े रस्ते पर चलदे हन।

⁴इस संसारे दे ईश्वर सैताने तिन्हां बेबसुआसियां दिया अक्ला जो भ्रष्ट करी दित्या ऐ, जिसा बज़ाह ते सैह़ मसीह दे सुसमाचारे कने तिसदिया चमका जो नीं समझी सकदे। क्जोकि मसीह परमात्मे दा स्वरूप ऐ।

⁵क्जोकि अहां अपणे बारे च नीं, अपर यीशु मसीह दे बारे च प्रचार करदे हन, कि सैह़ प्रभु ऐ। कने तिसदे बारे च एह़ ग्लांदे हन, कि तिन्हीं अहां जो तुहां दे सेवक होणे तांई घल्लेया।

⁶इसतांई कि परमात्मे ग्लाया, “नेहरे ते जोत्ती चमके,” कने परमात्मे अहां दे मनां च इक्क जोत्ती साइआं समझ दित्ती, तांजे अहां परमात्मे दिया महिमा जो दिक्खी सकन, जेह्ड़ी यीशु मसीह च प्रगट हुंदी ऐ।

⁷अपर अहां चिक्का दे भाडेयां साइआं हन, जिन्हां च धन-दौलत कठ्ठेरी करी रखेया ऐ, तांजे इसा गल्ला दा पता लग्गी जां, कि एह़ अपार सामर्थ अहां दी नीं, अपर परमात्मे दी ऐ।

⁸अहां चौंन्नी पास्सेयां ते मुसीबतां च घिरेयो रैंह्दे हन, अपर खतरे च नीं पोंदे, घबरांदे तां हन, नरास नीं हुंदे।

⁹सताये तां जांदे हन, अपर त्यागे नीं जांदे, सट्टे तां जांदे हन, अपर नास नीं हुंदे।

¹⁰अहां हमेसा अपणे सरीरे च तिन्हां गल्लां जो मसूस करदे हन, जाह़लू यीशु मसीह तिसा दर्दनाक मौत्ती ते गुजरेया, जेह्ड़ी तिन्हीं झेली, तांजे लोक अहां दे कम्मां च यीशु मसीह दिया ज़िन्दगिया जो दिक्खन।

¹¹इसतांई अहां, जेह्ड़े जिन्दे हन, हर बग्त यीशु मसीह दिया बज़ाह ते मौत्ती दे खतरे च हन, तांजे यीशु मसीह दी ज़िन्दगी भी अहां दे सरीरे च प्रगट होई जां।

¹²इसतांई इसदा मतलब एह़ ऐ कि अहां लगातार मौत्ती दा सामणा तां करदे हन, अपर तुहां तांई इसदा नतीजा एह़ ऐ कि तुहां सदा दी ज़िन्दगी पाणी ऐ।

¹³पवित्रशास्त्रे च लिख्या ऐ, “मैं बसुआस कित्ता, इसतांई मैं ग्लाया।” अहां अल्ल सैई बसुआस ऐ, इसतांई ग्लांदे हन।

¹⁴क्जोकि अहां जाणदे हन कि जिन्हीं प्रभु यीशुये जो मरेयां ते जिन्दा कित्या, सैई अहां जो भी यीशु सौगी जिन्दा करगा, कने तुहां सौगी अप्पु सामणै पेस करगा।

¹⁵क्जोकि सारे दुख जेह्ड़े अहां झेले तुहां तांई हन, तांजे परमात्मे दे अनुग्रह दे जरिये जादा ते जादा लोक मसीह च ओन, कने परमात्मे दी महिमा तांई धन्यावाद कने स्तुति करन।

¹⁶इसतांई अहां हौंसला रखदे हन; जे अहां दा बाहरे दा इन्सानी रूप नास हुंदा जांदा ऐ, तमी अहां दी अन्तर आत्मा हर रोज नौई हुंदी जांदी ऐ।

¹⁷अहां दा अज्जे दा दुख छोटा कने जादा बग्ते तिकर रैहणे आल़ा नीं ऐ। क्जोकि तिसदा नतीजा सदा दी महिमा ऐ, कने सैह़ तिन्हां सारियां गल्लां ते जेह्ड़ियां अहां सोची सकदे हन, बड़ियां म्हान हन।

¹⁸कने अहां तां दिक्खियां चीज्जां जो नीं अपर अणदिखियां चीज्जां जो दिक्खदे रैंह्दे हन। क्जोकि दिक्खियां चीज्जां थोड़े ई दिनां दियां हन, अपर अणदिखियां चीज्जां हमेसा बणी रैंह्दियां हन।