Read Kangri 2 कुरिन्थियों 5 Bible Online

2 कुरिन्थियों 5 - Kangri bible

2 कुरिन्थियों 5

¹अहां दे सरीर इसा धरतिया पर अहां दे घरां साइआं हन, जिन्हां च अहां रैंह्दे हन। जाह़लू अहां मरन तां परमात्मे दी तरफा ते सुअर्गे पर इक्क देहया घर मिलगा जेह्ड़ा हत्थां नैं बणेया घर नीं, अपर सदा काल तिकर बणी रैंह्दा ऐ।

²एह़ इक्क सच्चाई ऐ कि जाह़लू अहां ऐत्थु इसा धरतिया पर हन, ताह़लू अहां तड़फदे, कने बड़ी इच्छा रखदे हन, कि अपणे सुअर्गीय घरे च जाई नैं रैह़न।

³जाह़लू अहां अपणे सुअर्गीय घरे च रैंह्गे, ताह़लू अहां कुसी नंगे माणुये साइआं नीं हुंगे।

⁴सच्च एह़ ऐ कि इस घरे च रैंह्दे-रैंह्दे अहां बोझे नैं दबोयो तड़फदे रैंह्दे हन, क्जोकि अहां इसा धरतिया दे सरीरां जो छड्डणा नीं चांह़दे, अपर अहां एह़ चांह़दे हन कि परमात्मा अहां जो सुअर्गीय सरीर दैं। तांजे एह़ सरीर मरने ते बाद सदा दी ज़िन्दगिया च बदली जां।

⁵परमात्मे अप्पु ई अहां जो नौये सरीरां तांई जेह्ड़े अहां जो मिलगे, त्यार कित्या ऐ, तिन्हीं अहां जो ब्याने च पवित्र आत्मा भी दित्या ऐ। एह़ बयाना सैह़ वादा ऐ जिसियो परमात्मा बादे च अहां तांई पूरा भी करगा।

⁶इसतांई अहां हमेसा भरोसा रखदे हन, कने एह़ जाणदे हन, कि जाह़लू तिकर अहां सरीरे च रैंह्दे हन ताह़लू तिकर प्रभु ते दूर हन।

⁷क्जोकि अहां मसीह पर बसुआस करी नैं जीआ दे हन, ना कि तिन्हां चीज्जां पर जेह्ड़ियां अहां दिक्खदे दे हन।

⁸इसतांई अहां भरोसा रखदे हन, कने मरने दे बाद अहां प्रभु सौगी रैहणा होर भी खरा समझदे हन।

⁹इसा बज़ाह ते अहां दे मने दी आस एह़ ऐ कि चाहे अहां तिस सौगी सुअर्गे च रैह़न चाहे ऐत्थु धरतिया च रैह़न, अपर अहां प्रभु जो खुस करदे रैह़न।

¹⁰क्जोकि जरूरी ऐ, कि अहां सारेयां दा मसीह दे जरिये न्याय कित्ता जां, कि हर इक्क माणु अपणे-अपणे खरे बुरे कम्मां दा जेह्ड़े तिन्हीं सरीरे च होई नैं कित्ते हन, तिन्हां दा बदला पां।

¹¹इसतांई प्रभु दा डर मन्नी करी अहां लोकां जो सच्चाईया पर बसुआस करणे तांई विणती करदे हन। कने परमात्मा अहां जो पूरे तरीके नैं जाणदा ऐ, कने मैं आसा करदा ऐ तुहां भी अहां जो पूरे अपणे मने नैं खरे कित्ते जाणदे हन।

¹²अहां भिरी भी अपणी बड़ेयाई तुहां सामणै नीं करदे, अपर अहां अपणे बारे च तुहां जो घमंड करणे दा मौका दिंदे हन कि तुहां तिन्हां जो जवाब देई सकन, जेह्ड़े मने पर नीं, अपर बाहरे दियां दखावटी गल्लां पर घमंड करदे हन।

¹³जे कोई ग्लां कि अहां अपणे आप्पे ते बाहर हन तां एह़ परमात्मे तांई ऐ, कने जे सांत मन हन, तां तुहां तांई हन।

¹⁴क्जोकि मसीह दा प्यार अहां जो मजबूर करी दिंदा ऐ। इसतांई कि अहां एह़ समझदे हन कि जाह़लू इक्क माणु सारे लोकां तांई मरेया, इसतांई सारे लोक भी मरी गियो।

¹⁵क्जोकि मसीह सारे लोकां तांई मरेया, कि जेह्ड़े लोक जिन्दे हन, सैह़ गांह बासती अपणे तांई नीं जीन, अपर तिस तांई जेह्ड़ा तिन्हां तांई मरेया कने भिरी जिन्दा होई गेआ।

¹⁶इसतांई अहां माणुये दिया नजरा नैं कुसी दा भी न्याय नीं करदे। हाँ इक्क बग्त था, जाह़लू अहां मसीह दा अंदाजा माणुये दिया नजरा नैं लगाया था, हुण नीं। हुण अहां तिन्हां जो जाणी गै हन।

¹⁷इसतांई जे कोई मसीह पर बसुआस करदा ऐ, तां सैह़ मसीह च नौआं माणु ऐ। पराणियां गल्लां बीती गियां हन। दिक्खा, सारियां गल्लां नौईआं होई गियां हन।

¹⁸एह़ सारियां गल्लां परमात्मे दे पास्से ते हन, जिन्हीं यीशु मसीह दे जरिये अप्पु सौगी अहां दा मेल-जोल करी लेआ कने मेल-जोल दी सेवा अहां जो दित्तियो ऐ।

¹⁹मतलब परमात्मैं मसीह च होई नैं अपणे सौगी संसारे दा मेल-जोल करी लेआ, कने तिन्हां लोकां दे अपराधां दा दोस तिन्हां पर नीं लगाया, कने परमात्मे मेल-जोल दा वचन अहां जो दित्या ऐ।

²⁰इसतांई अहां मसीह दे राजदूत हन। समझा कि परमात्मा अहां दे जरिये तुहां नैं विणती करा दा ऐ। अहां मसीह दे पास्से ते विणती करदे हन, कि परमात्मे सौगी मेल-जोल करी लेआ।

²¹मसीह जेह्ड़ा पापे ते अणजाण था, परमात्मे अहां तांई तिस नैं पापिये साइआं बर्ताब कित्ता, कि अहां तिस च होई नैं परमात्मे दे धर्मी माणु बणी जान।