Read Kangri 2 कुरिन्थियों 6 Bible Online

2 कुरिन्थियों 6 - Kangri bible

2 कुरिन्थियों 6

¹अहां जेह्ड़े परमात्मे सौगी कम्म करणे आल़े हन, कने तुहां लोकां नैं एह़ विणती भी करदे हन, कि तिसदा अनुग्रह जेह्ड़ा तुहां पर होएया, तिसियो बेकार मत जाणा देआ।

²क्जोकि पवित्रशास्त्रे च लिख्या ऐ, “ठीक बग्ते पर मैं तेरी प्रार्थना सुणी लेई, कने उद्धारे दे दिने मैं तेरी मदत कित्ती।” सुणा! हुण ऐई ऐ सैह़ ठीक बग्त ऐ। दिक्खा, हुण ऐई ऐ सैह़ उद्धारे दा दिन ऐ।

³जिंआं अहां परमात्मे सौगी कम्म करणे आल़े हन, तां अहां कुसा भी गल्ला च ठोकर खाणे दा कोई भी मौका नीं दिंदे, तांजे अहां दिया सेवा पर कोई दोस नीं औयें।

⁴अपर हर गल्ला च अहां एह़ साबित करदे हन, कि अहां परमात्मे दे सच्चे सेवक हन। अहां अपणे खरे गुण दस्सी करी बड़िया हिम्मता सौगी दुखां झेलणे च, मुसीबतां च, खतरेयां च,

⁵कोड़े खाई नैं, जेला च जाई नैं, दंगा फसादे नैं, मेहनत करी नैं, जागदे रेई नैं, ब्रत करी नैं,

⁶पवित्रता नैं, ज्ञान नैं, सबर रखी नैं, दया करी नैं, पवित्र आत्मा नैं,

⁷सच्चे प्यारे नैं, सच्चाईया दे वचने नैं, परमात्मे दी सामर्थी नैं, अहां अपणे आप्पे दी धार्मिकता दे रस्तेयां दा इस्तेमाल करणे तांई तारीफ करदे हन, जेह्ड़े सज्जे कने खब्बे हत्थे दे हत्थयारां साइआं हन।

⁸जाह़लू लोक अहां दी इज्जत कने बेइज्जती करन, कने जाह़लू लोक दूयेयां नैं ग्लान, कि अहां बुरे कने खरे लोक हन, कने अहां पाखंडी समझे गै, अपर अहां सच्च ग्लांदे हन।

⁹कुच्छ लोक अहां जो जाणदे हन, भिरी कुच्छ लोक अहां जो अणजाण समझदे हन। लोक अहां जो मरेयां साइआं समझदे हन अपर दिक्खा! अहां जिन्दे हन! अहां जो सज़ा तां दित्ती जांदी ऐ अपर अहां दे प्राण नीं लेई सके।

¹⁰अहां दा तां दुखां दा बग्त था, अपर हमेसा खुस रैंह्दे हन। अहां अप्पु तां कंगाल हन, अपर मतेआं जो आत्मिक रूप ते अमीर बणाई दिंदे हन। अहां ऐदेय हन जिंआं अहां अल्ल कुच्छ नीं भिरी सब कुच्छ रखदे हन।

¹¹हे कुरिन्थियों दे बसुआसियो, अहां खुली नैं तुहां नैं गल्लां कित्तियां हन, अहां तुहां नैं खुले दिले नैं प्यार कित्ता।

¹²अपर अहां तुहां पर कोई रोक-टोक नीं लगाई, तुहां अप्पु ई अहां तांई अपणे मनां पर रोक टोक लगाई।

¹³अपर अपणे बच्चे जाणी नैं तुहां नैं ग्लांदा ऐ, कि तिंआं ई तुहां भी अहां नैं खुले दिले नैं प्यार करा।

¹⁴बेबसुआसी लोकां सौगी संगति मत रखा। क्जोकि धार्मिकता कने बुरे कम्मां दा क्या मेल जोल? या जोतिया दी कने नेहरे दी क्या संगति?

¹⁵कने मसीह दा बलियाल नांऐ दे सैताने सौगी क्या लगाव? या बसुआसिये सौगी बेबसुआसी दा क्या नाता?

¹⁶कने मूर्तियां तांई परमात्मे दे मंदरे च कोई जगाह नीं, क्जोकि अहां तां जिन्दे परमात्मे दे मंदर हन। जिंआं पवित्रशास्त्रे च परमात्मैं ग्लाया ऐ, “मैं तिन्हां लोकां सौगी रैंह्गा कने तिन्हां सौगी चलगा फिरगा; कने मैं तिन्हां दा परमात्मा हुंगा, कने सैह़ मेरे लोक हुंगे।”

¹⁷इसतांई प्रभु पवित्रशास्त्रे च ग्लांदा ऐ, “तिन्हां लोकां ते लग्ग होई जा, जेह्ड़े परमात्मे जो नीं मनदे; कने बुरिआं चीज्जां ते दूर रेह्आ, तां मैं तुहां जो अपनांगा।

¹⁸कने मैं तुहां दा पिता हुंगा, कने तुहां मेरे बच्चे हुंगे। एह़ सर्वशक्तिमान प्रभु परमात्मे दा वचन ऐ।”