Read Kangri 2 कुरिन्थियों 7 Bible Online

2 कुरिन्थियों 7 - Kangri bible

2 कुरिन्थियों 7

¹हे प्यारे साथी बसुआसियो, जाह़लू अहां नैं एह़ वादे कित्ते, तां ओआ, अहां अपणे आप्पे जो सरीर कने आत्मा दिया सारी बुराईया ते दूर रखन, कने परमात्मे दा डर मन्नी करी पवित्र ज़िन्दगी जीणे दी कोसस करन।

²अहां जो अपणे मने च जगाह देआ। अहां ना कुसी नैं बुराई कित्ती, ना कुसी जो बिगाड़ेया, कने ना कुसी जो ठगेया।

³मैं तुहां जो दोसी ठैहराणे तांई एह़ नीं ग्लांदा। क्जोकि मैं पैहल्लैं ई ग्लाई दित्या ऐ, कि तुहां अहां दे मने च इआं बसी गियो हन कि अहां तुहां सौगी मरने जीणे तांई त्यार हन।

⁴मैं तुहां नैं पूरे भरोसे नैं ग्लांदा ऐ, मिन्जो तुहां पर बड़ा घमंड ऐ; कने मिन्जो हौंसला मिलदा ऐ। जिसते कि मैं अपणिया सारी मुसीबता च भी खुसिया नैं भरोई रैंह्दा ऐ।

⁵क्जोकि जाह़लू अहां त्रोआस सैहरे ते मकिदुनिया प्रदेसे च आये, तित्थु भी अहां जो कोई अराम नीं अपर चौंन्नी पास्सेयां ते मुसीबतां च घिरेयो थे। बाहर लड़ाईयां थियां, अंदर डरे दियां गल्लां थियां।

⁶अपर परमात्मा जेह्ड़ा दुखियां जो हौंसला दिंदा ऐ, तीतुसे जो ऐत्थु घल्ली करी अहां जो हौंसला दित्ता।

⁷कने ना सिर्फ तिसदे ओणे ते, अपर तिसदी तिसा सांतिया ते भी, जेह्ड़ी तिसियो तुहां दे पास्से ते मिलियो थी। तिन्हीं तुहां दी इच्छा, तुहां दे दुख कने मिन्जो तांई तुहां दी मेहनता दी खबर अहां जो सणाई, जिसते मिन्जो होर भी खुसी होई।

⁸हलांकि जे मैं तुहां जो अपणी चिठ्ठी घल्ली करी दुख दित्ता, भिरी भी तिसाते पछतांदा नीं जिंआं कि पैहल्ले पछतांदा था, क्जोकि मैं दिक्खदा ऐ, कि तिसा चिठ्ठिया पढ़ी नैं तुहां जो दुख तां होएया अपर सैह़ थोड़िया देरा तांई था।

⁹हुण मैं खुस ऐ अपर इसतांई नीं कि तुहां जो दुख दित्ता ऐ, अपर इसतांई कि तुहां तिस दुखे दिया बज़ाह ते मन बदलेया, क्जोकि तुहां दा दुख परमात्मे दी इच्छा दे मताबक था कि अहां दे पास्से ते तुहां जो कुसी भी गल्ला च नकसान नीं होयैं।

¹⁰क्जोकि सैह़ दुख जेह्ड़ा परमात्मा अहां जो अनुभव करवाणा चांह़दा ऐ। जे इक्क माणु परमात्मे दिया इच्छा मताबक दुखी ऐ, तां सैह़ अपणे मने बदली लैंगा, तां उद्धार पांगा। इस च पछताणे दी कोई गल्ल नीं ऐ। अपर संसारे दे लोक दुखे च कने सदा दी मौत्ती च लेई जांदे हन।

¹¹कने दिक्खा, इसा गल्ला ते कि सैह़ दुख जेह्ड़ा परमात्मा तुहां जो अनुभव करवाणा चांह़दा ऐ। तिन्हीं तुहां च कितणा हौंसला, कने सच्चाई दस्सणे तांई जल़ण, डर, कने मिन्जो दिक्खणे दी इच्छा, मेहनत कने सज़ा दैणे दा बचार पैदा होएया? तुहां हर गल्ला च एह़ दस्सी दित्ता ऐ, कि इस बारे च तुहां कितणे बेकसूर हन।

¹²भिरी भी मैं सैह़ चिठ्ठी ना तां तुहां जो इसतांई लिखियो, कि मिन्जो तिसदी फिकर थी, जेह्ड़ा जुल्म करदा ऐ, कने ना ई तिस तांई जेह्ड़ा जुल्म झेलदा ऐ, अपर इसतांई कि परमात्मे दे सामणै अप्पु तुहां एह़ दिक्खी लेआ कि तुहां अहां तांई कितणे सच्चे हन।

¹³इसतांई अहां जो हौंसला मिल्ला। कने अहां दे इस हौंसले नैं तीतुसे दिया खुसिया दिया बज़ाह ते होर भी खुसी होई क्जोकि तिसदा मन जेह्ड़ा तुहां सबना दिया बज़ाह ते हरा भरा होई गेआ ऐ।

¹⁴क्जोकि जे मैं तिसदे सामणै तुहां दे बारे च कुच्छ घमंड दस्सेया, तां सर्मिंदा नीं होएया, अपर जिंआं अहां तुहां नैं सारियां गल्लां सच्च-सच्च ग्लाई दित्तियां थियां, तिंआं ई अहां दा घमंड दस्सणा तीतुसे सामणै भी सच्च निकल़ेया।

¹⁵तीतुस जाह़लू एह़ याद करदा ऐ कि तुहां सबना कुस तरांह तिसदे हुक्म मन्ने कने डरे दे मारे कम्मदे होये तुहां किंआं तिसियो अपनाया तां तुहां तांई तिसदा प्यार होर भी बधदा जांदा ऐ।

¹⁶मैं खुस ऐ, क्जोकि मिन्जो हर गल्ला च तुहां पर पूरा भरोसा ऐ।