Read Kangri 2 कुरिन्थियों 8 Bible Online

2 कुरिन्थियों 8 - Kangri bible

2 कुरिन्थियों 8

¹हुण हे प्यारे साथी बसुआसियो, अहां तुहां जो परमात्मे दे तिस अनुग्रह दा समाचार दिंदे हन, जेह्ड़ा मकिदुनिया प्रदेसे दी कलीसियां दे बसुआसियां पर होएया ऐ।

²जाह़लू बड़ियां मुसीबतां दे जरिये तिन्हां दी परीक्षा होई, तां तिन्हां बड़ी खुसी मनाई, कने बेसक सैह़ बड़े भारी गरीब थे, तमी तिन्हां दूयेयां बसुआसियां दी खुले दिले नैं मदत कित्ती।

³तिन्हां दे बारे च मेरी एह़ गवाही ऐ, कि सैह़ जितणा देई सकदे थे दित्ता इतणा ई नीं अपर अपणी सामर्थ ते भी जादा दिल खोली नैं दित्ता।

⁴कने इस दाने तांई कने परमात्मे दे लोकां दी सेवा च साझी होणे दे मौके तांई, अहां बार-बार बड़ी विणती कित्ती,

⁵कने अहां नीं सोचेया था, कि सैह़ अहां जो इस तरीके नैं दिंगे, अपर तिन्हां परमात्मे दी इच्छा मताबक ई पैहल्ले प्रभु जो कने भिरी अहां जो दित्ता।

⁶इसतांई अहां तीतुसे नैं विणती कित्ती, कि जिंआं तिन्हीं पैहल्ले सुरू कित्या था, तिंआं ई सैह़ तुहां गरीब बसुआसियां बिच्च इसा दान दैणे दिया सेवा जो पूरा भी करैं।

⁷ठीक जिंआं तुहां हर गल्ला च मतलब बसुआस, वचन, ज्ञान कने हर तरीके दियां कोससां च, कने तिस प्यारे च जेह्ड़ा अहां रखदे हन, बधदे जांदे हन, तिंआं ई तुहां भी हुण गरीब बसुआसियां बिच्च दान दैणे दिया सेवा च बधदे जा।

⁸मैं तुहां जो कोई हुक्म नीं दिंदा, अपर मैं सिर्फ दूयेयां दे हौंसले नैं तुहां दे प्यारे दिया सच्चाईया जो परखणे तांई ग्लांदा ऐ।

⁹तुहां अहां दे प्रभु यीशु मसीह दा अनुग्रह जाणदे हन, कि सैह़ अमीर होई नैं भी तुहां तांई कंगाल बणी गेआ, तांजे तिसदे कंगाल होई जाणे ते तुहां अमीर होई जान।

¹⁰इसा गल्ला च मेरी सलाह ऐई ऐ; जिस च तुहां दा भला ऐ, पिछले साल तुहां सबना ते पैहल्ले थे जेह्ड़े दान दैणा चांह़दे थे कने तुहां दान दैणा सुरू भी कित्ता।

¹¹इसतांई जेह्ड़ा कम्म तुहां सुरू कित्या था, तिसियो पूरा भी करा, कने इस कम्मे जो पूरा करणे तांई भी तिंआं ई हौंसला रखी नैं करदे रेह्आ, जिंआं इसदी योजना बणांदे बग्त करदे थे। इस कम्मे जो पूरा करणे तांई अपणी तिसा कमाईया कने ताकता नैं करा, जेह्ड़ी इस बग्त तुहां अल्ल ऐ।

¹²जे कुसी च दान दैणे दी इच्छा ऐ तां जेह्ड़ा कुच्छ तिस अल्ल ऐ, तिसदे मताबक तिसदा दान ग्रहण भी हुंदा ऐ, तिसदे मताबक नीं, जेह्ड़ा तिस अल्ल नीं ऐ।

¹³मैं नीं चांह़दा कि दूयेयां दी भलाई करणे तांई तुहां दी ज़िन्दगी मुसीबता च पेई जां। अपर सबना अल्ल एह़ इक्क बराबर होणा चाइदा।

¹⁴अपर बराबरी दे बचार ते इस बग्त तुहां अल्ल जादा होणा तिन्हां दी कमी घटी च कम्म औयें, तांजे तिन्हां अल्ल जादा होणा भी तुहां दी कमी घटी च कम्म औयें, कि बराबरी होई जां।

¹⁵जिंआं पवित्रशास्त्रे च लिख्या ऐ, “जिन्हीं मता बटीणेया तिसियो भी तिसदिया जरूरता मताबक मिल्लेया ऐ, कने जिन्हीं थोड़ा बटीणेया तिसियो भी तिसदिया जरूरता मताबक मिल्लेया ऐ।”

¹⁶मैं परमात्मे दा धन्यावाद करदा ऐ, जिन्हीं तुहां दे बारे च सैई फिकर तीतुसे दे मने च पाई जेह्ड़ी मिन्जो च थी।

¹⁷जाह़लू अहां तिसियो तुहां अल्ल ओणे तांई ग्लाया, तिन्हीं अहां दा ग्लाणा मन्नी लेआ, कने बड़े जोशे नैं सैह़ अपणिया मर्जिया नैं तुहां अल्ल ओआ दा ऐ।

¹⁸अहां तिस सौगी दूये बसुआसी भाऊये जो घल्ला दे हन, जिसदा नां सुसमाचार प्रचार करणे तांई सारी कलीसिया दे बसुआसियां च फैलया ऐ।

¹⁹कने इतणा ई नीं, अपर सैह़ कलीसिया दे बसुआसियां दे जरिये चुणेया गेआ कि इसा दान दैणे दिया सेवा तांई अहां सौगी जां। कने अहां एह़ सेवा इसतांई करदे हन, कि प्रभु दी महिमा तांई कने एह़ दस्सणे तांई कि अहां यरूशलेम सैहरे दे बसुआसियां दी मदत करणे तांई मने च बड़ी इच्छा रखदे हन।

²⁰अहां इसा गल्ला च चौकन्ने रैंह्दे हन, कि इस दिलेरी दे कम्मे दे बारे च जिसदी सेवा अहां करदे हन, कोई अहां पर उंगली नीं चुक्की सकैं।

²¹अहां दा मकसद ना सिर्फ सैह़ ऐ, जेह्ड़ा प्रभु दिया नजरा च खरा ऐ, अपर माणुआं दिया नजरा च भी खरा होणा चाइदा।

²²अहां इन्हां सौगी इक्क होर बसुआसी भाऊये जो घल्ला दे हन। जिसियो अहां बार-बार परखणे दियां मतिआं गल्लां च तिसदा जोश दिख्या ऐ। अपर हुण तुहां पर तिसियो बड़ा भरोसा ऐ, इसा बज़ाह ते सैह़ होर भी जादा जोसीला ऐ।

²³जे कोई तीतुसे दे बारे च पुछैं, तां सैह़ मेरा साथी कने तुहां तांई कम्म करणे आल़ा ऐ। जे अहां दे बसुआसी भाऊआं दे बारे च पुछे, तां सैह़ कलीसियां दे घल्लेयो कने सैह़ मसीह दी महिमा करदे हन।

²⁴इसतांई अपणा प्यार कने अहां दा सैह़ घमंड जेह्ड़ा तुहां दे बारे च ऐ कलीसियां दे सामणै तिन्हां जो साबित करी नैं दस्सा।