Read Kangri गलातियों 4 Bible Online

गलातियों 4 - Kangri bible

गलातियों 4

¹मैं उदारण देई नैं एह़ समझांदा ऐ, कि वारस जाह़लू तिकर जागत ऐ, हलांकि सैह़ सारियां चीज्जां दा मालक ऐ, तमी तिस च कने दासे च कोई फर्क नीं।

²अपर सैह़ बग्त ओणे तिकर जेह्ड़ा पितैं पक्का कित्या ऐ, कि जागत सम्भाल़णे आल़े कने प्रबन्ध करणे आल़े दे अधिकार दे अधीन रैंह्दा ऐ।

³तिंआं ई अहां भी परमात्मे जो जाणने ते पैहल्लैं इस संसारे दे नियमां कने रीति रिवाजां दे गुलाम थे।

⁴अपर जाह़लू ठीक बग्त आया जिसदी योजना परमात्मैं बणाईयो थी, तां परमात्मैं अपणा इकलौता पुत्तर घल्लेया, जिन्हीं माणुये दे रूपे च जन्म लेआ, कने सैह़ इक्क यहूदी परवारे च पैदा होएया कने तिन्हीं मूसा दिया व्यबस्था दा पालण कित्ता,

⁵तांजे सैह़ तिन्हां सारेयां जो छड्डाई लैं, जेह्ड़े मूसा दिया व्यबस्था दे अधीन ज़िन्दगी जीआ दे थे, कने अहां जो अपणे बच्चेयां साइआं गोद लेई लैं।

⁶कने जे अहां तिसदे बच्चे हन, तां परमात्मैं अपणे पुत्तरे दिया आत्मा जो, जेह्ड़ी परमात्मे जो “हे अब्बा, हे पिता ग्लाई करी हक्कां पांदी ऐ,” अहां दे मनां च घल्लियो ऐ।

⁷इसतांई तुहां हुण गुलाम नीं, अपर परमात्मे दे बच्चे हन। कने इसतांई जे अहां परमात्मे दे बच्चे हन, तां सैह़ अहां जो सारियां चीज्जां दिंगा जेह्ड़ियां तिस अल्ल अपणे बच्चेयां तांई हन।

⁸जाह़लू तुहां परमात्मे जो नीं जाणदे थे तिस बग्त तुहां तिन्हां दे गुलाम थे, जेह्ड़े सच्ची च परमात्मा नीं हन।

⁹अपर हुण तां तुहां दा रिस्ता परमात्मे सौगी बणी गेआ ऐ, मिन्जो एह़ ग्लाणा चाइदा कि परमात्मैं इस रिस्ते दी सुरुआत तुहां सौगी करी लियो ऐ, तां तिन्हां कमजोर कने फ़ालतू सिक्षां दे पास्से क्जो फिरा दे हन, क्या तुहां तिन्हां दे दुवारी भिरी गुलाम बणना चांह़दे हन?

¹⁰मैं एह़ सुणा दा ऐ कि तुहां जेह्ड़े होरनी जातिआं आल़े बसुआसी हन, यहूदी लोकां दे दिनां दे, मीहनेयां दे, मौसमे दे, कने साल्लां दे त्योहारां जो एह़ सोची करी मनांदे हन कि परमात्मा तिन्हां ते खुस हुंदा ऐ।

¹¹जेह्ड़ा तुहां करा दे हन, मैं तिसते बड़ा परेसान ऐ, कुत्थी इआं ना होयैं कि जेह्ड़ी मेहनत मैं तुहां तांई कित्ती ऐ सैह़ बेकार ना होई जां।

¹²हे प्यारे साथी बसुआसियो, मैं तुहां नैं विणती करदा ऐ, कि तुहां अपणे आप्पे जो व्यबस्था ते अजाद करी लेआ, जिंआं मैं होएया। क्जोकि मैं व्यबस्था ते अजाद होएया, जिंआं तुहां होरनी जातिआं आल़े होये, तुहां पैहल्ले तां मिन्जो तांई बड़े भरी खरे थे।

¹³अपर तुहां जो याद होणा, कि जाह़लू मैं पैहल्ली बरी तुहां जो सुसमाचार सणाया ताह़लू मैं बमार था।

¹⁴हलांकि मैं बमार था, कने मेरिया बमारिया दिया बज़ाह ते तुहां बड़िया परेसानिया थे, भिरी भी तुहां मिन्जो नैं नफरत नीं कित्ती। अपर तुहां मेरा आदर कने खरे कित्ते देखभाल कित्ती, ठीक तिंआं ई जिंआं कि मन्ना तुहां परमात्मे दे सुअर्गदूते दा या प्रभु यीशु मसीह दा आदर कित्ता।

¹⁵तां हुण सैह़ तुहां दी खुसी कुत्थू गेई? मैं सच्च-बिच्च एह़ ग्लाई सकदा ऐ, कि तित्थु तुहां कुच्छ भी नीं छड्डेया, जेह्ड़ा तुहां मिन्जो नैं नीं कित्ता। जे जरूरत पोंदी तां तुहां अपणिया अखीं भी कड्डी करी मिन्जो देई दिंदे।

¹⁶तां क्या तुहां नैं सच्च ग्लाणे दिया बज़ाह ते मैं तुहां दा बैरी बणी गेआ ऐ?

¹⁷सैह़ लोक जेह्ड़े यहूदी व्यबस्था पर जोर दिंदे हन, तुहां जो अपणे हक्के च लेयोणे तांई बड़े भरी उतावल़े हन, अपर खरे मकसदे ते नीं। तिन्हां दा मकसद तुहां जो मिन्जो ते लग्ग करणा ऐ, तांजे तुहां तिन्हां दे चेले बणी जान।

¹⁸अपर खरे मकसदे तांई उतावल़े रैहणा हमेसा ठीक ऐ, ना सिर्फ तिस बग्त, कि जाह़लू मैं तुहां सौगी रैंह्दा ऐ।

¹⁹हे मेरे प्यारे बच्चेयो, जिंआं इक्क जणांस बच्चे जो जन्म दिंदे बग्त दर्द मसूस करदी ऐ, तिंआं ई मैं भी जाह़लू तिकर तुहां पूरे तरीके नैं मसीह साइआं नीं बणी जान, सैई दर्द मसूस करदा ऐ।

²⁰दिल तां एह़ करदा ऐ, कि हुण तुहां अल्ल आई नैं तुहां जो सरीफिया नैं ग्लां, क्जोकि तुहां दे बारे च मैं बड़ा भरी परेसान ऐ।

²¹तुहां जेह्ड़े मूसा दिया व्यबस्था दे अधीन होणा चांह़दे हन, सिर्फ मेरियां गल्लां सुणा, मैं तुहां जो सैह़ दस्सगा, जेह्ड़ा मूसा दी व्यबस्था दिया कताबा च लिख्या ऐ।

²²पवित्रशास्त्रे च एह़ लिख्या ऐ कि अब्राहमे दे दो जागत होये। इक्क जागत हाजिरा ते होएया, जेह्ड़ी दासी थी, कने दूआ जागत सारा ते होएया, जेह्ड़ी तिसदी लाड़ी थी।

²³अपर जेह्ड़ा जागत दासिया ते होएया, सैह़ सरीरे दिया इच्छा मताबक पैदा होएया। कने जेह्ड़ा लाड़िया ते होएया, सैह़ परमात्मे दे वादे मताबक पैदा होएया।

²⁴इन्हां सारियां गल्लां च होर मतलब भी ऐ, एह़ जणासां समझा दो वादे हन, इक्क तां सीनै प्हाड़े दा जिसते दास ई पैदा हुंदे हन; कने सैह़ हाजिरा ऐ।

²⁵कने हाजिरा जो समझा, कि सैह़ अरब दा सीनै प्हाड़ ऐ, कने अज्जे दा यरूशलेम सैहर तिसदे बराबर ऐ, क्जोकि सैह़ अपणे जागतां सौगी गुलामिया च ऐ।

²⁶अपर सुअर्गे दा यरूशलेम अब्राहमे दिया लाड़िया सारा साइआं ऐ, कने सैई ऐ जेह्ड़ी अहां अल्ल हुण इक्क माँऊ साइआं ऐ। क्जोकि सैह़ दासी नीं थी, कने अहां मूसा दिया व्यबस्था जो मन्नणे ते अजाद हन।

²⁷क्जोकि पवित्रशास्त्रे च लिख्या ऐ, “हे बाँझ जणांस, तू जेह्ड़ी बच्चे नीं जम्मदी खुसी मना। तू जेह्ड़ी बच्चे जम्मणे दियां दर्दां ते अणजाण ऐ, जोरे नैं जय-जयकार कर। क्जोकि छड्डियो जणासा दी औलाद सुहागणा जणासा दिया औलादी ते भी जादा ऐ।”

²⁸हे प्यारे साथी बसुआसियो, अहां इसहाके साइआं हन, क्जोकि अहां परमात्मे दे वादे मताबक जेह्ड़ा तिन्हीं अब्राहमे नैं कित्ता पैदा होएयो हन।

²⁹अपर तुहां हुण तिन्हां दे जरिये सताये जा दे हन, जेह्ड़े चांह़दे हन कि तुहां व्यबस्था जो मनन, ठीक इशमाएले साइआं सैह़ जागत जेह्ड़ा सरीरे दिया इच्छा मताबक पैदा होएया था, कने जेह्ड़ा इसहाके जो सतांदा था।

³⁰अपर इसदे बारे च पवित्रशास्त्र क्या ग्लांदा ऐ? “दासिया जो कने तिसदे जागते जो कड्डी दे, क्जोकि दासिया दा जागत बुढ़े दिया जायदाता दा हक्कदार नीं होणा चाइदा, इसा जायदाता दा हक्कदार सैह़ जागत होणा चाइदा, जेह्ड़ा लाड़िया ते पैदा होएया था।”

³¹इसतांई हे प्यारे साथी बसुआसियो, अहां दासी जणासा दे बच्चे नीं हन, जेह्ड़ी व्यबस्था ऐ। अपर अहां तिसा जणासा दे बच्चे हन, जेह्ड़ी बुढ़े दी लाड़ी ऐ सैह़ बसुआस ऐ।