Read Kangri गलातियों 5 Bible Online

गलातियों 5 - Kangri bible

गलातियों 5

¹मसीयैं अहां जो मूसा दिया व्यबस्था दिया गुलामिया ते अजाद कित्या ऐ। तां इसा अजादिया च बणी रेह्आ, कने कुसी जो भी एह़ मौका मत देआ कि सैह़ भिरी तुहां जो दुवारी व्यबस्था दा गुलाम बणाई लैन।

²सुणा, मैं पौलुस तुहां नैं ग्लांदा ऐ, कि परमात्मे सामणै धर्मी बणने तांई जे खतणा करांगे, तां मसीह ते तुहां जो कुच्छ फायदा नीं हुंगा, जेह्ड़ा तिन्हीं तुहां तांई कित्या ऐ।

³मैं भिरी भी हर इक्क खतणा करवाणे आल़े जो दस्सी दिंदा ऐ, कि तिसियो सारी मूसा दी व्यबस्था मन्नणा पोंगी।

⁴तुहां जेह्ड़े व्यबस्था जो मन्नी करी धर्मी बणना चांह़दे हन, तां तुहां अपणे आप्पे जो मसीह ते लग्ग करदे हन, कने परमात्मे दे अनुग्रह जो अपनाणे ते इन्कार करदे हन।

⁵मैं एह़ ग्लाई सकदा ऐ, क्जोकि अहां जो पवित्र आत्मा दे पास्से ते पूरा भरोसा ऐ, कि परमात्मा अहां जो धर्मियां साइआं अपनांगा, क्जोकि अहां यीशु मसीह पर बसुआस करदे हन।

⁶जे तुहां यीशु मसीह जो मनदे हन, तां इसते कोई फर्क नीं पोंदा, कि तुहां दा खतणा होएया या नीं होएया। अपर जरूरी गल्ल एह़ ऐ, कि अहां मसीह पर बसुआस करदे हन, कने अहां च परमात्मे तांई कने दूये लोकां तांई प्यार ऐ।

⁷तुहां मसीह सौगी गांह बधणे च खरी तरक्की करा दे थे। हुण तुहां जो मसीह दी सच्चाईया जो नीं मन्नणे ते कुणी रोकी दित्ता?

⁸एह़ सिक्षा परमात्मे दे पास्से ते नीं ऐ, जिन्हीं तुहां अपणे बच्चे होणे तांई सद्देया ऐ।

⁹इक्क काहवत ऐ, जेह्ड़ी एह़ दस्सदी ऐ कि थोड़ा देह़या खमीर सारे गुन्नेयो आटे जो खमीरा बणाई दिंदा ऐ।

¹⁰मैं प्रभु पर तुहां दे बारे च भरोसा रखदा ऐ, कि तुहां दूये लोकां दियां सिक्षां पर नीं चलगे, अपर मेरियां सिक्षां पर चलगे। क्जोकि जेह्ड़ा तुहां जो परेसान करदा ऐ, सैह़ कोई भी क्जो नीं होयैं, परमात्मे ते सज़ा पांगा।

¹¹अपर हे प्यारे साथी बसुआसियो, मैं प्रचार करदा ऐ कि खतणा जरूरी नीं ऐ, कने इसतांई यहूदी लोक मिन्जो बार-बार सतांदे हन। जे मैं मसीह दिया मौत्ती दा प्रचार करणे दे बजाये एह़ प्रचार करदा, कि लोकां दा खतणा होणा जरूरी ऐ, तां मैं यहूदी लोकां दा अपमान नीं करदा हुंदा।

¹²खरा हुंदा कि जेह्ड़े तुहां जो परेसान करदे हन, तिन्हां दा ना सिर्फ खतणा हुंदा, अपर तिन्हां दा सैह़ अंग कुच्छ जादा ई बड्डी दित्ता जांदा, जिसदे जरिये सैह़ अपणे आप्पे जो नामर्द बणाई लैंदे।

¹³हे प्यारे साथी बसुआसियो, तुहां अजाद होणे तांई सद्देयो हन; अपर इसा अजादिया जो अपणी सरीरे दी इच्छा जो पूरी करणे दा मौका मत बणा, अपर प्यारे नैं इक्की दूये दी सेवा करा।

¹⁴क्जोकि सारी व्यबस्था इसा इक्की गल्ला च पूरी होई जांदी ऐ, “तू अपणे प्ड़ेसिये नैं अपणे साइआं प्यार रख।”

¹⁵अपर जे तुहां इक्क दूये जो जंगली जानवरां साइआं दंदे नैं कटदे कने फाड़दे हन, तां चौकन्ने रेह्आ कि इक्की दूये दा नास नीं करी दैंन।

¹⁶अपर मैं ग्लांदा, पवित्र आत्मा मताबक चलगे तां तुहां सरीरे दी इच्छा कुसी भी तरीके नैं पूरी नीं करगे।

¹⁷क्जोकि सरीर पवित्र आत्मा दे खलाफ कने पवित्र आत्मा सरीरे दे खलाफ इच्छा करदा ऐ, कने एह़ इक्की दूये दे बैरी हन, इसतांई कि जेह्ड़ा तुहां करणा चांह़दे हन सैह़ नीं करी सकन।

¹⁸कने जे तुहां पवित्र आत्मा दे मताबक चलदे हन तां तुहां मूसा दिया व्यबस्था जो मन्नणे आल़े नीं रैह्।

¹⁹पापी सभाव क्या करदा ऐ, तिसियो हर कोई दिक्खी सकदा ऐ, मतलब ब्यभिचार, गंदे कम्म, लुचपण,

²⁰मूर्तिपूजा, जादू टूणा, बैर, झगड़ा, जल़ण, गुस्सा, सवार्थ, कल़ाह्, फूट,

²¹कपट, नशे च मतवाल़ा होणा, रंगरल़ियाँ, कने इन्हां साइआं होर भी कम्म हन, इन्हां दे बारे च मैं तुहां जो चतौणी दे दा ऐ, जिंआं मैं पैहल्लैं भी तुहां जो दित्तियो थी, कि इन्हां कम्मां जो करणे आल़ेआं परमात्मे दे राज्जे दे वारस नीं होणा।

²²अपर पवित्र आत्मा दा फल़ प्यार, खुसी, सांति, सबर, दया, भलाई, बसुआस,

²³नम्रता, कने अप्पु जो काबू रखणा। इन्हां कम्मां करणे आल़ेआं दे खलाफ कोई व्यबस्था नीं ऐ।

²⁴कने जेह्ड़े यीशु मसीह दे हन, तिन्हां अपणे सरीरे दे एह्सासे कने इच्छा जो मारी दित्या ऐ।

²⁵जे अहां परमात्मे दिया आत्मा दे जरिये जिन्दे हन, तां आत्मा मताबक ज़िन्दगी जीन भी।

²⁶अहां घमंडी होई नैं ना इक्की दूये जो छेड़न, कने ना इक्की दूये सौगी कपट रखन।