Read Kangri गलातियों 6 Bible Online

गलातियों 6 - Kangri bible

गलातियों 6

¹हे प्यारे साथी बसुआसियो, जे इक्क माणु पाप करदे पकड़ेया जां, तां तुहां जो जिन्हां दी अगुआई पवित्र आत्मा करदा ऐ, एह़ करणा चाइदा, कि बड़ी सरीफिया नैं तिसियो धार्मिकता दे रस्ते पर बापस लेयोणे तांई तिसदी मदत करा, कने अपणा भी ध्यान रखा कि तुहां भी परीक्षा च नीं पोन, जिसते कि तुहां ते भी पाप होई जां।

²जाह़लू अहां च कोई मुसीबता च होयैं, तां इक्की दूये दी मदत करा। इआं करी नैं ई मसीह दी व्यबस्था जो मनदे हन।

³क्जोकि जे कोई कुच्छ ना होणे पर भी अपणे आप्पे जो कुच्छ खास समझदा ऐ, तां अपणे आप्पे जो धोखा दिंदा ऐ।

⁴अपर अपणे कम्मां जो खरे कित्ते करा, तां तुहां कुच्छ घमंड करी सकदे हन, कने अपणे आप्पे दी दूयेयां सौगी बराबरी मत करा।

⁵क्जोकि अहां जेह्ड़ा कुच्छ करदे हन, तिसदे अहां अप्पु ई जिम्मेवार हुंगे।

⁶जिन्हां जो परमात्मे दे वचनां दी सिक्षा दित्ती जांदी ऐ, तिन्हां फर्ज बणदा ऐ कि जेह्ड़ा कुच्छ तिन्हां अल्ल ऐ, सैह़ तिन्हां दा सखाणे आल़े जो दैणा चाइदा।

⁷तुहां परमात्मे जो धोखा नीं देई सकदे। इसतांई अपणे आप्पे जो धोखा मत देआ, जेह्ड़ा तुहां बांदे हन सैई बड्डगे।

⁸क्जोकि जेह्ड़ा माणु अपणे पापी सभावे जो खुस करणे तांई बांदा ऐ, तिस सभावे दे जरिये सैह़ बरबादी दी फसल बड्डगा; कने जेह्ड़ा परमात्मे दिया आत्मा जो खुस करणे तांई बांदा ऐ, तां तिसा आत्मा दे जरिये सैह़ सदा दी ज़िन्दगिया दी फसल बड्डगा।

⁹अहां दूयेयां दी मदत करणे च हिम्मत नीं छड्डन, जे इआं करन, तां परमात्मा ठीक बग्ते पर तुहां जो प्रतिफल़ दिंगा।

¹⁰इसतांई जित्थु तिकर मौका मिल्लैं अहां जो सबना दी मदत करणी चाइदी, खास करी नैं बसुआसी भाऊआं दी जेह्ड़े मसीह च हन।

¹¹दिक्खा, मैं किंआं बड्डे-बड्डे अखरां च तुहां जो अपणे हत्थे नैं एह़ चिठ्ठी लिखा दा ऐ।

¹²जेह्ड़े लोक तुहां दा खतणा करवाणे तांई दबाब पांदे हन, सैह़ सिर्फ ऐई दस्सणा चांह़दे हन, कि सैह़ कितणे खास हन, कने सैह़ नीं चांह़दे, कि मसीह दी सूल़िया दा प्रचार करणे तांई तिन्हां जो कोई सतां।

¹³हलांकि सैह़ यहूदी बसुआसी जिन्हां दा खतणा होएया ऐ, सैह़ मूसा दिया व्यबस्था जो नीं मनदे, अपर सैह़ चांह़दे हन, कि तुहां दा खतणा होयैं, तांजे सैह़ दूयेयां यहूदी लोकां सामणै एह़ घमंड करी सकन, कि तुहां दा खतणा तिन्हां दिया बज़ाह ते होएया ऐ।

¹⁴जित्थु तिकर मेरा सवाल ऐ, अहां दे प्रभु यीशु मसीह दी सूल़िया पर मौत्ती जो छड्डी करी मैं होर कुसी चीज्जा पर घमंड नीं करणा चांह़दा। हुण संसारे दियां चीज्जां दा मिन्जो पर कोई हक्क नीं ऐ, कने मेरे अंदर एह़ इच्छा नीं रेई, कि इन्हां संसारिक चीज्जां दी होर गुलामी करैं।

¹⁵इसदा कोई मतलब नीं ऐ कि तुहां दा खतणा होएया कि नीं होएया, अपर इन्हां सारियां गल्लां दा मतलब एह़ ऐ कि तुहां अपणिया ज़िन्दगिया जो बिलकुल नौये तरीके नैं जीन।

¹⁶परमात्मा तिन्हां सारेयां जो सांति कने आसीष दिंगा, जेह्ड़े इन्हां नियमां पर चलदे हन, क्जोकि सैह़ परमात्मे दे लोक हन।

¹⁷गांह जो कोई मिन्जो दुख ना दैं, क्जोकि जेह्ड़े नसाण मेरे सरीरे च हन, सैह़ एह़ दस्सदे हन कि मैं यीशु मसीह दा प्रेरित ऐ।

¹⁸हे प्यारे साथी बसुआसियो, मैं एह़ प्रार्थना करदा ऐ, कि अहां दे प्रभु यीशु मसीह दा अनुग्रह तुहां सबना सौगी रैंह्। आमीन।