Read Kangri इफिसियों 2 Bible Online

इफिसियों 2 - Kangri bible

इफिसियों 2

¹अतीत च तुहां मरेयो थे, क्जोकि तुहां परमात्मे दे खलाफ बगाबत कने पाप कित्ता।

²तिस बग्ते च तुहां इस संसारे दे लोकां पचांह़ चलदे थे, जेह्ड़े परमात्मे जो नीं जाणदे, कने तुहां सैताने पचांह़ चल्ले जेह्ड़ा अम्बरे च दुष्टआत्मां पर राज्ज करणे आल़ा प्रधान ऐ। जेह्ड़ा हुण भी परमात्मे दा हुक्म नीं मन्नणे आल़ेआं च कम्म करदा ऐ।

³इन्हां च अहां भी सारे दे सारे पैहल्ले अपणे सरीरे दी इच्छां च दिन बितांदे थे, कने सरीर कने मने दियां इच्छां पूरियां करदे थे, कने होरनी लोकां साइआं सभाव ते ई बुरे थे, कने परमात्मे दे गुस्से दे अधीन थे।

⁴अपर परमात्मा जेह्ड़ा दया दा धनी ऐ, अपणे तिस बड्डे प्यारे दिया बज़ाह ते जिसते तिन्हीं अहां नैं प्यार कित्ता,

⁵जाह़लू अहां अपराधां दिया बज़ाह ते मरेयो थे तां तिन्हीं अहां जो अहां दे मसीह सौगी रिस्ते दिया बज़ाह ते सदा दी ज़िन्दगी हासल करणे जोग्गा बणाया। (परमात्मे दे अनुग्रह ते ई तुहां दा उद्धार होएया ऐ),

⁶क्जोकि तिन्हीं अहां दे यीशु मसीह सौगी मेल-जोल दिया बज़ाह ते अहां जो मरेयां ते जिन्दा कित्ता, कने सुअर्गीय जगाह च तिस सौगी बठाया

⁷कि सैह़ अपणिया तिसा दया नैं जेह्ड़ी यीशु मसीह च अहां पर ऐ, ओणे आल़े बग्ते च इस संसारे दे लोकां जो दस्सी सकैं कि तिसदा अनुग्रह कितणा म्हान ऐ।

⁸क्जोकि परमात्मे तुहां दा अपणे अनुग्रह नैं उद्धार कित्या, जाह़लू तुहां बसुआस करदे थे; कने एह़ तुहां दे पास्से ते नीं अपर परमात्मे दा दान ऐ,

⁹कने कुसी भी खरे कम्मे दिया बज़ाह ते नीं। इसतांई तुहां अल्ल घमंड करणे दी कोई भी बज़ाह नीं ऐ।

¹⁰क्जोकि अहां परमात्मे दे बणायो हन, कने यीशु मसीह च तिन्हां खरेयां कम्मां तांई बणायो हन जिन्हां जो परमात्मैं पैहल्ले ते अहां दे करणे तांई त्यार कित्यो।

¹¹इसा बज़ाह ते याद करा कि तुहां बसुआसे ते होरनी जातिआं आल़े हन (यहूदी लोकां होरनी जातिआं आल़े लोकां नैं नफरत कित्ती, क्जोकि तिन्हां दा खतणा नीं होएया था )

¹²तुहां लोक तिस बग्त मसीह जो नीं जाणदे थे, कने तुहां इस्राएल देसे च परमात्मे दे चुणेयो लोक नीं थे, कने तुहां परमात्मे दे लोकां सौगी तिस वादे च भी सामिल नीं थे। कने बगैर आसा ते कने परमात्मे जो बिना जाणे इस संसारे च रैंह्दे थे।

¹³इक्क बग्त था जाह़लू तुहां परमात्मे ते बड़ी भरी दूर थे, अपर हुण परमात्मा तुहां जो यीशु मसीह दे खून बहाणे दे जरिये अपणे नेड़े लेई आया ऐ।

¹⁴मसीयैं अप्पु ई अहां बिच्च सांति बणाई जिन्हीं यहूदी लोकां कने होरनी जातिआं दे लोकां जो इक्क करी लेआ, कने लग्ग करणे आल़िआ कंदा जो जेह्ड़ी बिच्च थी ढाई दित्ता,

¹⁵क्जोकि मसीह दी सूल़िया पर मौत्ती दे जरिये तिन्हीं मूसा दिया व्यबस्था दियां सारियां तरकीबां जो खत्म करी दित्ता। तिसदा इआं करणे मकसद एह़ था कि सैह़ दो लग्ग-लग्ग झुंड बणा, जिसते कि इक्क नौआं झुंड बणी जां, कने तिस च मिल्ली जां,

¹⁶कने सूल़िया पर मौत्ती दे जरिये तिन्हीं यहूदी लोकां कने होरनी जातिआं दे लोकां बिच्च बैर खत्म करी दित्ता, इआं करणे दे जरिये तिन्हीं दून्नी जो इक्क सरीर बणाई नैं परमात्मे नैं मिल्लाया।

¹⁷कने मसीयैं आई नैं तुहां जो जेह्ड़े होरनी जातिआं आल़े हन परमात्मे ते दूर थे कने यहूदी लोकां जो जेह्ड़े नेड़े थे दून्नी जो मेल-जोल दा सुसमाचार सणाया।

¹⁸क्जोकि मसीह दे जरिये इक्की आत्मा च अहां सारे पिता परमात्मे अल्ल पुज्जी सकदे हन।

¹⁹इसतांई तुहां होरनी जातिआं आल़े लोक परदेसी कने मुसाफिर नीं रैह्, अपर परमात्मे दे लोकां सौगी संगी-वासी कने तुहां तिसदे परवारे दे माणु हन।

²⁰अहां सारे मिल्ली नैं तिसदा घर हन जेह्ड़ा प्रेरितां कने भविष्यवक्तां दियां नीआं पर बणेया ऐ, कने यीशु मसीह अप्पु तिस घरे दे कुणे दा पत्थर ऐ।

²¹जिस च सारा घर मिल्ली नैं प्रभु तांई इक्क पवित्र मंदर बणदा जांदा ऐ,

²²क्जोकि तुहां मसीह च इक्क हन, तुहां होरनी जातिआं दे बसुआसी भी परमात्मे दे सारे दूयेयां लोकां सौगी इक्क होएया दे हन। तांजे तुहां तिसदा घर बणी जान, जित्थु परमात्मे दी आत्मा रैंह्दी ऐ।