Read Kangri इफिसियों 4 Bible Online

इफिसियों 4 - Kangri bible

इफिसियों 4

¹इसतांई मैं जेह्ड़ा प्रभु च कैदी ऐ तुहां नैं विणती करदा ऐ, कि जिसा बुलाहटा नैं तुहां सद्देयो थे, तिसा मताबक ज़िन्दगी जीआ,

²सारी दीनता कने नम्रता सौगी, कने सबर रखी करी प्यारे नैं इक्की दूये दे बर्ताबे जो झेली लेआ;

³कने इसियो अपणिया तरफा ते खरा करणे दी कोसस करदे रेह्आ, तांजे तुहां लगातार मिल्ली नैं रैह़न, क्जोकि परमात्मे दिया आत्मा दे जरिये तुहां इक्क कित्यो हन।

⁴अहां सारे बसुआसी इक्क सरीरे दे अंगा साइआं हन, कने अहां सारेयां इक्क ई पवित्र आत्मा पाया ऐ, ठीक तिंआं सैह़ आसा भी इक्क ई ऐ, जिसा च तुहां परमात्मे दे लोक होणे तांई सद्देयो थे।

⁵अहां सारेयां अल्ल इक्क ई प्रभु यीशु मसीह ऐ, अहां सारे सिर्फ प्रभु यीशु मसीह पर ई बसुआस करदे हन, कने अहां दा सिर्फ यीशु मसीह दे नांऐ पर बपतिस्मा होएया ऐ,

⁶कने सबना दा इक्क ई परमात्मा ऐ, जेह्ड़ा सबना दा पिता ऐ, जेह्ड़ा सबना ऊपर कने सबना बिच्च कने अहां सबना च ऐ।

⁷अपर मसीयैं अहां च हर इक्की जो तिसदा कम्म करणे तांई कुच्छ खास काबलियतां दित्तियां हन।

⁸इसतांई एह़ पवित्रशास्त्रे च लिख्या ऐ: “ जाह़लू सैह़ ऊचिया जगाह पर चढ़ेया, तां तिन्हीं मतेआं कैदियां जो अप्पु सौगी लेआ, कने माणुआं जो वरदान दित्ते।”

⁹एह़ पवित्रशास्त्रे च लिख्या ऐ, कि “सैह़ ऊपर गेआ,” इसदा मतलब एह़ कि मसीह धरतिया दे अंदर बड़िया डुगिया जगाह च था।

¹⁰मसीह जेह्ड़ा थल्लैं गेआ सैह़ सैई ऐ, जेह्ड़ा सारे अम्बरां ते ऊपरे जो भी गेआ, तांजे तिसदी मौजूदगी हर जगाह होयैं।

¹¹तिन्हीं कुच्छ लोकां जो प्रेरित, कुच्छ भविष्यवक्ता, कुच्छ सुसमाचार सणाणे आल़े, कुच्छ रखवाल़े कने सिक्षक होणे दा वरदान देई दित्ता,

¹²जिसते परमात्मे दे लोक पक्के होई नैं सेवा दे कम्मां तांई त्यार होई जान, जिसते कि मसीह दा सरीर जेह्ड़ा कलीसिया ऐ, मजबूतिया नैं बधदी जां,

¹³एह़ लगातार हुंदा रैंह्गा, कि जाह़लू तिकर अहां सारे अहां दे बसुआसे कने परमात्मे दे पुत्तरे दे ज्ञाने दे जरिये इक्क मन नीं होई जान। तां अहां मसीह साइआं सिद्ध बणगे कने पूरे तरीके नैं तिस साइआं हुंगे।

¹⁴तांजे अहां गांह तांई बच्चेयां साइआं नीं रैह़न। अहां जो कदी भी धोखे बाज लोकां दिया झूठिया सिक्षा च नीं फसणा चाइदा, जेह्ड़ियां हौआ साइआं अहां जो इक्की जगाह ते दूईआ जगाह पटकदियां हन।

¹⁵अपर प्यारे नैं सच्च ग्लाणे दे जरिये कने सारियां गल्लां च अहां जो मसीह साइआं सिद्ध बणना चाइदा, जेह्ड़ा कलीसिया दा सिर ऐ,

¹⁶अहां सारे जेह्ड़े मसीह पर बसुआस करदे हन, तिसदे सरीरे दे अंगा साइआं हन, ठीक तिंआं ई जिंआं इक्क माणुये दा सरीर अप्पु च जुड़ेया हुंदा ऐ, तां तिस सरीरे दा हर अंग बधदा कने मजबूत हुंदा ऐ; तिंआं ई जाह़लू अहां च हर इक्क मसीह दे कम्मे जो जेह्ड़ा तिन्हीं अहां जो दित्या ऐ तिसियो करदा ऐ तां अहां भी सिद्ध कने मजबूत होई नैं बधदे जांगे, कने इक्की दूये नैं होर भी जादा प्यार करगे।

¹⁷इसतांई मैं एह़ ग्लांदा ऐ, कने प्रभु च इसा गल्ला पर जोर दिंदा ऐ, कि जिंआं होरनी जातिआं दे लोक अपणे मनां दियां बेकार गल्लां पर चलदे हन, तुहां अज्जे ते लेई करी भिरी इआं मत करा।

¹⁸क्जोकि तिन्हां अंदर समझ नीं ऐ, कने तिसा नासमझा कने जिद्दा दिया बज़ाह ते सैह़ तिसा नौईआं ज़िन्दगिया दे हिस्सेदार नीं हन, जेह्ड़ी परमात्मा दिंदा ऐ;

¹⁹कने तिन्हां जो कोई सर्म नीं ऐ। क्जोकि सैह़ सरीरे दियां इच्छां च जीआ दे हन, कने हर किस्मा दे गंदे कम्मां करणे जो बड़े उतावल़े हन।

²⁰अपर एह़ सैह़ नीं ऐ, जेह्ड़ा तुहां मसीह दियां सिक्षां ते सिखया।

²¹मैं इसा गल्ला च पक्का ऐ, कि जाह़लू तुहां यीशु मसीह दे बारे च सुणेया, तां तुहां तिसदे बारे च सच्चियां सिक्षां जो सिखया।

²²अपणे पराणे पापी सभावे जो छड्डी देआ, कने अपणी पराणी ज़िन्दगी जीणे दे तरीके जो जेह्ड़ी सरीरे दियां इच्छां कने धोखेबाजिया नैं भरोईयो ऐ।

²³अपर पवित्र आत्मा तुहां दे मनां कने सभावे जो नौआं बणांदा जां,

²⁴क्जोकि परमात्मे तुहां जो इक्क नौआं सभाव दित्या ऐ, जेह्ड़ा बिलकुल तिसदे अपणे सभावे साइआं ऐ। इसतांई तिस नौये सभावे साइआं बर्ताब करा। सच्चे धार्मिक कने पवित्र बणा।

²⁵इसा बज़ाह ते झूठ ग्लाणा छड्डी करी हर इक्क अपणे बसुआसी भाऊये नैं सच्च ग्ला, क्जोकि अहां सारे इक्की सरीरे दे अंग हन।

²⁶गुस्सा तां करा, अपर पाप मत करा; इसा गल्ला च पक्के होई जा, कि तुहां दा गुस्सा दिन ढलणे ते पैहल्ले सांत होई जां।

²⁷कने इआं करी नैं सैताने जो मौका मत देआ, कि सैह़ तुहां ते बुरे कम्म करवां।

²⁸चोरी करणे आल़ा भिरी चोरी ना करैं, अपर तिसियो इमानदारिया नैं कम्म करणा चाइदा, तांजे तिस अल्ल इतणा होयैं कि सैह़ गरीब लोकां दी भी मदत करी सकैं।

²⁹कोई गंदी गल्ल तुहां दे मुँऐ ते ना निकल़ें, अपर जरूरता मताबक सैई निकल़ें जेह्ड़ी लोकां दी तरक्की कने बसुआसे च बधणे तांई होयैं, तांजे तिसते सुणने आल़ेआं दा भला होयैं।

³⁰अपणे कम्मां दे जरिये परमात्मे दिया पवित्र आत्मा जो दुखी मत करा, जिसा सौगी छुटकारे दे दिन तांई तुहां पर मोहर लगियो ऐ।

³¹हर किस्मा दी कड़वाहट, पागलपन, गुस्सा, झगड़ा, निंदा, कने सारी नफरत तुहां ते दूर कित्ती जां।

³²इक्की दूये पर दया, कने दयाबान बणा, कने जिंआं परमात्मैं मसीह च तुहां दे अपराध माफ कित्ते, तिंआं ई तुहां भी इक्की दूये दे अपराध माफ करा।