Read Kangri इफिसियों 6 Bible Online

इफिसियों 6 - Kangri bible

इफिसियों 6

¹हे बच्चेयो, तुहां जेह्ड़े प्रभु च बसुआस करदे हन, अपणे माँऊ-बुढ़े दा हुक्म मन्नणे आल़े बणां, क्जोकि तुहां तांई एह़ करणा ठीक ऐ।

²परमात्मे पवित्रशास्त्रे च एह़ हुक्म दित्या ऐ, कि “अपणे माँऊ-बुढ़े दी इज्जत करा, तां तुहां खुसिया नैं इक्क लम्मी ज़िन्दगी जींगे।”

⁴तुहां च जितणे भी माँ-बुढ़े हन, अपणे बच्चेयां जो गुस्सा मत दुआ, अपर तिन्हां जो प्रभु दी सिक्षा कने तमीज्ज सखा, कने तिन्हां दा पालण-पोसण करा।

⁵हे दासो, जेह्ड़े संसारे मताबक तुहां दे मालक हन, तुहां साफ मने नैं कने इज्जता नैं तिन्हां दी मन्ना, जिंआं तुहां यीशु मसीह जो मनदे हन।

⁶कने हर बग्त अपणे मालकां जो खुस करणे दी कोसस करदे रेह्आ, सिर्फ ताह़लू ई नीं जाह़लू तुहां जो लग्गैं कि सैह़ तुहां जो दिक्खा दे हन। अपर मसीह दे दासां साइआं बणां, जेह्ड़े अपणे पूरे मने नैं सैई करदे हन जेह्ड़ा परमात्मा चांह़दा ऐ।

⁷कने तिसा सेवा जो माणुआं दी नीं, अपर प्रभु दी समझी करी सच्चे मने नैं करा।

⁸क्जोकि तुहां जाणदे हन, कि जेह्ड़ा कोई जदेया मर्जी खरा कम्म करगा, बेसक सैह़ दास होयैं या अजाद, तिस कम्मे दा प्रतिफल़ सैह़ प्रभु ते ई पांगा।

⁹इसी तरीके नैं हे मालको तुहां भी धमकियां दैणा छड्डी नैं तिन्हां सौगी तिंआं ई बर्ताब करा; क्जोकि तुहां जाणदे हन, कि तुहां दा दून्नी दा मालक सुअर्गे च ऐ, कने सैह़ कुसी दा पक्ष नीं लैंदा।

¹⁰आखरी च प्रभु दिया सामर्थी दे जरिये आत्मिकता च मजबूत बणां।

¹¹अहां माणुआं दे खलाफ लड़ाई नीं लड़दे, अपर अहां लड़ाई आत्मिक संसारे च नेहरे दियां ताकतां दे, अधिकारियां कने राजेयां दे खलाफ ऐ। इसतांई तिन्हां सारे आत्मिक हत्थयारां जो बन्नी लेआ, जिन्हां जो परमात्मा दिंदा ऐ, तांजे जाह़लू बुरे दिन ओन तां तुहां अपणे आप्पे जो सैताने दिया चलाकिया ते बचाई सकन, कने जाह़लू लड़ाई खत्म होई जां, तां तुहां भिरी भी मजबूतिया नैं खड़ोई सकन।

¹⁴इसतांई परमात्मे दिया सच्चाईया जो अपणे लक्के च बैल्टा साइआं कसी लेआ, कने अपणा खरा बर्ताब रखा, क्जोकि एह़ इक्क कबच पैहनणे साइआं ऐ।

¹⁵कने सांतिया दा सुसमाचार सणाणे तांई तुहां दी इच्छा ठीक तिंआं ई होणी चाइदी, जिंआं इक्क सपाई लड़ाई तांई अपणे जूत्तेयां पैहनी करी त्यार हुंदा ऐ।

¹⁶कने इन्हां सबना सौगी तुहां दा बसुआस इक्की ढालां साइआं मजबूत होयैं, जिसते तुहां तिस सैताने दे सारे बल़दे तीरां जो बझाई सकन।

¹⁷कने परमात्मे दे उद्धारे दी ताकत लोहे दे टोपे साइआं होयैं, कने तलवारा तांई परमात्मे दे वचने जो इस्तेमाल कर, जेह्ड़ा पवित्र आत्मा दे पास्से ते ओंदा ऐ।

¹⁸कने हर बग्त जिंआं पवित्र आत्मा दस्सदा ऐ, अहां जो प्रार्थना कने विणती करदे रेह्आ, कने इसतांई जागदे रेह्आ कि सारे परमात्मे दे लोकां तांई लगातार विणती करदे रेह्आ करा,

¹⁹कने मिन्जो तांई भी प्रार्थना करदे रेह्आ करा, जिसते मिन्जो ग्लाणे दे बग्त ऐदेया वचन दित्ता जां, कि मैं हिम्मता नैं सुसमाचारे दा भेत दस्सी सकैं,

²⁰मैं सोचदा ऐ, कि सिर्फ इसतांई मैं संगल़ां च जकड़ौई नैं राजदूते साइआं सेवा करा दा ऐ; प्रार्थना करा कि, जिस तरीके नैं मिन्जो ग्लाणा चाइदा ऐ, तिंआं ई मैं हिम्मता नैं सुसमाचारे दा प्रचार करी सकैं।

²¹प्रभु दिया संगतिया च प्यारा भाऊ कने बसुआसे जोग्गा सेवक तुखिकुस तुहां लोकां जो एह़ सब कुच्छ दस्सी दिंगा, तांजे तुहां भी जाणी लैन कि मैं कदेया ऐ कने क्या करा दा ऐ।

²²तिसियो मैं तुहां अल्ल इसतांई घल्लेया ऐ कि तुहां अहां दिया हालता जो जाणन, कने सैह़ तुहां दे मनां जो हौंसला दैं।

²³मैं प्रार्थना करदा ऐ, कि पिता परमात्मा कने प्रभु यीशु मसीह हर इक्क बसुआसी भाऊये जो सांति, प्यार कने बसुआस दिंगा।

²⁴जेह्ड़े अहां दे प्रभु यीशु मसीह नैं सच्चा प्यार रखदे हन, तिन्हां सबना पर अनुग्रह हुंदा रैंह्।