Read Kangri फिलिप्पियों 1 Bible Online

फिलिप्पियों 1 - Kangri bible

फिलिप्पियों 1

¹मैं पौलुस कने तीमुथियुस जेह्ड़े यीशु मसीह दे दास हन, अहां दिया तरफा ते एह़ चिठ्ठी परमात्मे सारे पवित्र लोकां दे नां पर, कने स्याणेयां कने सेवकां जो जेह्ड़े यीशु मसीह च होई नैं फिलिप्पी सैहरे च रैंह्दे हन, लिखदा ऐ।

²मैं प्रार्थना करदा ऐ, कि अहां दे पिता परमात्मे कने प्रभु यीशु मसीह दे पास्से ते तुहां जो अनुग्रह कने सांति मिलदी रैंह्

³मैं जाह़लू-जाह़लू तुहां जो याद करदा ऐ, ताह़लू-ताह़लू अपणे परमात्मे दा धन्यावाद करदा ऐ,

⁴कने जाह़लू कदी मैं तुहां सारेयां तांई विणती करदा ऐ, तां सदा खुसिया नैं विणती करदा ऐ।

⁵इसतांई कि तुहां पैहल्ले दिन ते लेई नैं अज्जे तिकर प्रभु यीशुये दा सुसमाचार फैलाणे च मिन्जो सौगी साझी रैह् हन।

⁶मिन्जो इसा गल्ला दा भरोसा ऐ कि परमात्मा जिन्हीं तुहां च खरा कम्म सुरू कित्ता ऐ, सैई तिस कम्मे जो जाह़लू यीशु मसीह भिरी बापस ओंगा, तिस दिने तिकर पूरा करगा।

⁷ठीक ऐ कि मैं तुहां सारेयां तांई ऐदेया ई बचार करैं, क्जोकि मैं तुहां नैं बड़ा प्यार करदा ऐ, कने जाह़लू मैं जेला च ऐ कने सुसमाचारे दी रक्षा तांई कने सच्च साबित करणे च तुहां सारे मिन्जो सौगी परमात्मे दे अनुग्रह च साझी हन।

⁸इस च परमात्मा मेरा गवाह ऐ कि जिंआं ई यीशु मसीह तुहां सारेयां नैं प्यार करदा ऐ, सच्च-बिच्च मैं भी तुहां नैं तिंआं ई प्यार करदा ऐ।

⁹मैं एह़ प्रार्थना करदा ऐ, कि तुहां दा इक्की दूये नैं प्यार, ज्ञान कने पूरिया समझा नैं होर भी बधदा जां,

¹⁰इसतांई कि तुहां इन्हां गल्लां जो परखणे जोग्गे बणी जान, कि कुण देहई गल्ल ग्लाणे तांई ठीक ऐ, कने मसीह दे दुवारी बापस ओणे तिकर पवित्र कने बेकसूर बणी रेह्आ;

¹¹यीशु मसीह दे जरिये पैदा होणे आल़े धार्मिकता दे कम्मां नैं अपणे आप्पे जो भरी लेआ, जिसते परमात्मे दी महिमा कने स्तुति हुंदी रैंह्।

¹²हे प्यारे साथी बसुआसियो, मैं चांह़दा ऐ, कि तुहां एह़ जाणी लेआ कि मिन्जो पर जेह्ड़ा बितेया ऐ, जिसदिया बज़ाह ते मतेआं लोकां सुसमाचारे पर बसुआस कित्ता।

¹³ऐत्थु तिकर कि कैसर राजे दे राज्जभवने दी सारिया पलटना च कने बाक्कि सारे लोकां च एह़ प्रगट होई गेआ ऐ कि मैं मसीह दी खातर जेला च कैद ऐ।

¹⁴कने प्रभु च जेह्ड़े बसुआसी भाऊ हन, तिन्हां च होर सारे मेरे जेला च कैद होणे दिया बज़ाह ते, मजबूत बसुआसे नैं परमात्मे दा वचन बेझिझक सणाणे दी होर भी हिम्मत करदे हन।

¹⁵एह़ सच्च ऐ कि कुच्छ लोक तां जल़ण कने झगड़े दिया बज़ाह ते मसीह दे सुसमाचारे दा प्रचार करदे हन, कने कुच्छ लोक अच्छे नेक इरादे नैं।

¹⁶एह़ सैह़ लोक हन, जेह्ड़े सुसमाचार दा प्रचार अच्छे नेक इरादे कने प्यार नैं करदे हन, कि सैह़ जाणदे हन, मैं यीशु मसीह दे सुसमाचारे दा जवाब दैणे तांई जेला च कैद ऐ।

¹⁷अपर एह़ सैह़ झगड़ालू लोक हन, जेह्ड़े सुसमाचार दा प्रचार सच्चाईया नैं नीं, अपर अपणे मतलबे तांई मसीह दा सुसमाचार सणांदे हन, एह़ सोची नैं कि मिन्जो जेला च होर जादा परेसान करन।

¹⁸तां क्या होएया? सिर्फ एह़ कि हर तरीके नैं मसीह दा सुसमाचार सणाया जांदा ऐ, चाहे बुरिआ बज़ाह नैं, चाहे सच्चाईया नैं, कने मैं इसते खुस हुंदा ऐ। कने हाँ खुस रैंह्गा भी।

¹⁹क्जोकि मैं जाणदा ऐ, कि तुहां दिया प्रार्थना दे जरिये, कने यीशु मसीह दे पास्से ते घल्लेया पवित्र आत्मा दिया मदता दे जरिये, इसदा प्रतिफल़ मिन्जो तांई खरा होणा ऐ।

²⁰मैं तां बड़ी इच्छा कने आसा रखदा ऐ, कि मैं कुसा भी गल्ला च बेइज्जत ना होयैं, अपर जिंआं मैं पूरिया हिम्मता दिया बज़ाह ते मसीह दी बड़ेयाई मेरे सरीरे दे जरिये सदा हुंदी रेई ऐ, तिंआं ई हुण भी होयैं, चां मैं जिन्दा रैंह् या मरी जां।

²¹क्जोकि मेरा जिन्दा रैहणा मसीह तांई ऐ, कने मेरा मरी जाणा भी फायदा ऐ, क्जोकि मैं मरने ते बाद भी मसीह सौगी रैंह्गा।

²²अपर जे सरीरे च जिन्दा रैहणा ई मेरे कम्मे तांई फायदेमंद ऐ तां मैं नीं जाणदा ऐ, कि कुसियो चुणैं?

²³क्जोकि इन्हां दून्नी च इक्की जो चुणना मिन्जो तांई बड़ा औखा ऐ। जी तां चांह़दा ऐ, कि मसीह अल्ल जाई करी रैंह्, क्जोकि एह़ मिन्जो तांई बड़ा खरा ऐ,

²⁴अपर सरीरे च रैहणा होर भी जरूरी ऐ, क्जोकि तुहां जो मेरी मदत दी जरूरत ऐ।

²⁵इसतांई कि मिन्जो इसदा भरोसा ऐ, कने मैं जाणदा ऐ, कि मैं जिन्दा रैंह्गा, हलांकि तुहां सारेयां सौगी रैंह्, जिसते मैं तुहां जो बसुआसे च मजबूत करणे कने तिस च खुस रैहणे च तुहां दी मदत करगा।

²⁶कने जेह्ड़ा घमंड तुहां मेरे बारे च करदे हन, सैह़ मेरे भिरी ते तुहां अल्ल ओणे नैं यीशु मसीह च बड़ा बधदा रैंह्।

²⁷सिर्फ इतणा करा, कि तुहां दा चाल-चलण मसीह दे सुसमाचारे मताबक होयैं, कि चां मैं आई नैं तुहां जो दिक्खैं, चां ना भी औयें, तुहां दे बारे च ऐई सुणैं कि तुहां इक्को ई इरादे च मजबूत रेह्आ, कने इक्क मन होई नैं सुसमाचार दे बसुआसे तांई मेहनत करदे रैंह्दे हन,

²⁸कने कुसी भी गल्ला च बरोधियां ते डरणे दी जरूरत नीं। तुहां दी हिम्मत तिन्हां तांई विनाशे दी साफ नसाणी ऐ, अपर तुहां तांई छुटकारे दा, कने एह़ परमात्मे दे पास्से ते ऐ।

²⁹क्जोकि मसीह दिया बज़ाह ते तुहां पर ऐदेया अनुग्रह होएया कि ना सिर्फ तिस पर बसुआस करा अपर तिस तांई दुख भी झेला,

³⁰कने तुहां तिंआं ई दुख झेलणा ऐ, जिंआं तुहां मिन्जो झेलदे दिख्या ऐ, जाह़लू मैं तुहां सौगी फिलिप्पी सैहरे च था, कने हुण भी सुणदे हन कि मैं तिंआं ई दुख झेलदा ऐ।