Read Kangri फिलिप्पियों 3 Bible Online

फिलिप्पियों 3 - Kangri bible

फिलिप्पियों 3

¹इसतांई हे प्यारे साथी बसुआसियो, प्रभु च खुस रेह्आ! सैई गल्लां तुहां जो बार-बार लिखणे च मिन्जो तां कोई तकलीफ नीं हुंदी, अपर एह़ गल्लां तुहां जो झूठी सिक्षा ते बचादियां हन।

²तिन्हां लोकां ते चौकनै रेह्आ, जेह्ड़े जंगली कुत्तेआं साइआं खतरनाक हन, बुरे कम्म करणे आल़े हन, कने ग्लांदे हन, कि छुटकारा पाणे तांई खतणा जरूरी ऐ।

³क्जोकि परमात्मे दे सच्चे लोक अहां ई हन, जेह्ड़े परमात्मे दिया आत्मा च होई नैं अराधना करदे हन, कने यीशु मसीह पर घमंड करदे हन, कने सरीरे दे कम्मां पर भरोसा नीं रखदे।

⁴जे कुसी होर जो सरीरे दे कम्मां पर भरोसा रखणे दा बचार ऐ, मिन्जो अल्ल तां सरीरे दे कम्मां पर भरोसा रखणे दी बज़ाह तां तिसते भी बधी करी ऐ।

⁵अठमे दिने मेरा खतणा होएया, जिंआं परमात्मे हुक्म दित्या था, इस्राएल दे वंश कने बिन्यामीन दे गोत्रे दा ऐ। मैं पक्का इब्रानी ऐ, कने मेरे पूर्वज भी पक्के इब्रानी थे; कने जे मूसा दिया व्यबस्था जो मन्नणे दी गल्ल ग्लान, तां मैं फरीसी ऐ।

⁶जोशे दे बारे च जे ग्लान, तां कलीसिया जो सताणे आल़ा। कने यहूदी व्यबस्था जो मन्नणे दी गल्ल ग्लान, तां मैं धर्मी माणु था, क्जोकि मैं तिसा व्यबस्था दा पालण करदा था।

⁷अपर जेह्ड़ियां-जेह्ड़ियां गल्लां मैं सोचियां कि मेरे फायदे दियां हन, तिन्हां जो मैं मसीह जो जाणने तांई बेकार समझी लेआ ऐ।

⁸अपर तिसते भी बधी करी मैं अपणे प्रभु यीशु मसीह जो जाणने दी जरूरता दे सामणै सारियां गल्लां जो बेकार समझदा ऐ। जिसदिया बज़ाह ते मैं सारियां चीज्जां दा नकसान झेलेया, कने तिन्हां जो कूड़ा समझदा ऐ, जिसते मैं मसीह जो जाणी सकैं।

⁹तांजे मैं तिस सौगी एकता च जी सकैं; ना कि अपणी तिसा धार्मिकता दे सौगी, जेह्ड़ी मूसा दिया व्यबस्था ते ऐ, अपर तिसा धार्मिकता दे सौगी जेह्ड़ा मसीह पर बसुआस करणे दिया बज़ाह ते ऐ, कने परमात्मे दे पास्से ते बसुआस करणे पर मिन्जो मिलदी ऐ,

¹⁰मैं एह़ चांह़दा ऐ कि मसीह जो जाणी लैं। कने तिसदे दुवारी जिन्दे होणे दिया सामर्थी जो मसूस करी सकैं, कने तिसदे दुख झेलणे च साझी होई नैं, कने मौत्ती च तिस साइआं बणी जां।

¹¹जिसते मैं कुसा भी रीतिया नैं मरेयां ते दुवारी जिन्दे होणे तिकर पुज्जी सकैं।

¹²एह़ मतलब नीं कि मैं इन्हां सारी चीज्जां जो पैहल्ले ते पाई चुकेया ऐ, या सिद्ध होई चुकेया ऐ। अपर मैं तिसा चीज्जा जो पाणे तांई गांह बधदा जा दा ऐ, तांजे मैं सिद्ध होई जां। जिस तांई यीशु मसीयैं मिन्जो चुणेया था,

¹³हे प्यारे साथी बसुआसियो, मेरे ग्लाणे दा मतलब एह़ नीं कि मैं पाई चुकेया ऐ। अपर सिर्फ एह़ इक्क कम्म करदा ऐ, कि जेह्ड़ियां गल्लां बीती गियां हन तिन्हां जो भुल्ली करी, जेह्ड़ियां गल्लां होणे आल़िआं हन, तिन्हां दे पास्से बधदा होएया,

¹⁴मैं लक्ष्य दे पास्से दौड़दा चली जांदा ऐ, तांजे सुअर्गीय इनाम पाई सकैं, जिस तांई परमात्मैं मिन्जो यीशु मसीह दे जरिये सुअर्गे जो सद्देया ऐ।

¹⁵अहां च जितणे भी बसुआसे च मजबूत हन, ऐई बचार रखन, कने जे कुसा गल्ला च तुहां दा होर ई बचार होयैं तां परमात्मा तिसियो भी तुहां पर प्रगट करी दिंगा।

¹⁶इसतांई अहां जो तिसा सच्चाईया दे मताबक जीणा चाइदा, जेह्ड़ी परमात्मैं पैहल्ले ते ई अहां पर प्रगट कित्तियो थी।

¹⁷हे प्यारे साथी बसुआसियो, तुहां सारे मिल्ली नैं मिन्जो साइआं ज़िन्दगी जीआ, कने तिन्हां जो पणछैणा, जेह्ड़े इसा रीतिया नैं जींदे हन, जिसदा उदारण तुहां अहां च पांदे हन।

¹⁸क्जोकि मते लोक बुरिआं चालां चलदे हन, जिन्हां दी चर्चा मैं तुहां नैं बार-बार कित्ती ऐ, कने हुण भी रोई-रोई करी ग्लांदा ऐ, कि सैह़ अपणे चाल-चलण ते मसीह दी कुर्बानी दे बैरी हन।

¹⁹तिन्हां दा अन्त विनाश ऐ, तिन्हां दा ईश्वर तिन्हां दे सरीरे दी इच्छा ऐ, अपणियां सर्मां दियां गल्लां पर घमंड करदे हन, कने संसारे दियां चीज्जां पर मन लगाई रखदे हन।

²⁰अपर अहां दा अपणा देस सुअर्गे पर ऐ; कने अहां इक्क उद्धार करणे आल़ा प्रभु यीशु मसीह दा औत्थू ते ओणे दा इन्तजार करदे हन।

²¹सैह़ अपणिया ताकता दे तिस असरे मताबक जिसदिया बज़ाह ते सैह़ सारियां चीज्जां जो अपणे बसे च करी सकदा ऐ। अहां दे कमजोर सरीरे दा रूप बदली नैं, अपणी महिमा दे सरीरे साइआं बणाई दिंगा।