Read Kangri कुलुस्सियों 1 Bible Online

कुलुस्सियों 1 - Kangri bible

कुलुस्सियों 1

¹एह़ चिठ्ठी पौलुस कने अहां दे भाऊ तीमुथियुसे दे पास्से ते ऐ। मैं पौलुस परमात्मे दिया इच्छा ते यीशु मसीह दा प्रेरित ऐ।

²मैं एह़ चिठ्ठी मसीह दे तिन्हां पवित्र कने सच्चे बसुआसी भाऊआं दे नांऐ पर लिखदा ऐ, जेह्ड़े कुलुस्से सैहरे च रैंह्दे हन। मैं प्रार्थना करदा ऐ, कि अहां दे पिता परमात्मे दिया तरफा ते तुहां जो अनुग्रह कने सांति मिलदी रैंह्।

³जाह़लू अहां तुहां तांई प्रार्थना करदे हन, अहां अपणे प्रभु यीशु मसीह दे पिता मतलब परमात्मे दा धन्यावाद करदे हन।

⁴क्जोकि अहां सुणेया ऐ, कि यीशु मसीह पर तुहां दा बसुआस ऐ, कने सारे परमात्मे दे लोकां नैं तुहां प्यार रखदे हन।

⁵तुहां एह़ इसतांई करदे हन, क्जोकि बसुआस कने प्यारे दी बुनियाद सैह़ आसा ऐ, जेह्ड़ी तुहां तांई सुअर्गे च रखियो ऐ, जिसदे बारे च तुहां पैहल्ले ते ई तिस सुसमाचारे दे सच्चे वचने च सुणी चुकेयो हन,

⁶जेह्ड़ा तुहां अल्ल पुज्जा ऐ। एह़ सुसमाचार सारे संसारे च फैला दा ऐ, कने मते सारे लोक बसुआसे च ओआ दे हन। जिस दिने ते तुहां इसियो सुणेया तधैड़ी ते तुहां भी परमात्मे दे अनुग्रह जो समझे।

⁷तिसदी सिक्षा तुहां अहां दे प्यारे साथी इपफ्रासे ते सिखियो ऐ, जेह्ड़ा अहां सौगी मसीह च बसुआसे जोग्गा सेवक ऐ।

⁸तिन्हीं तुहां दे प्यारे जो जेह्ड़ा पवित्र आत्मा च ऐ, अहां पर प्रगट कित्या ऐ।

⁹इसा बज़ाह ते जिस दिन ते एह़ सुणेया ऐ, अहां भी तुहां तांई एह़ प्रार्थना करणा नीं छड्डेया कने एह़ विणती करदे हन कि तुहां पूरे आत्मिक ज्ञान कने समझा च परमात्मे दी इच्छा दे सारे ज्ञाने च भरोंदे जा,

¹⁰इस तरीके नैं तुहां प्रभु दे मताबक ज़िन्दगी जी करी सारियां गल्लां च तिसियो खुस करगे। कने हर किस्मां दे खरे कम्म करदे रैंह्गे कने परमात्मे दे ज्ञाने च फल़दे कने बधदे जांगे।

¹¹तां मैं प्रार्थना करदा ऐ, कि परमात्मा अपणी महिमा दी सामर्थी दा इस्तेमाल करी नैं तुहां जो मजबूत करैं। इसतांई तुहां बड़े हौंसले कने खुसिया सौगी अपणियां मुसीबतां जो झेली सकन।

¹²तुहां लोक लगातार पिता परमात्मे दा धन्यावाद करदे रेह्आ, जिन्हीं अहां जो इस जोग्गा बणाया, कि जोत्ती दे राज्जे च परमात्मे लोकां सौगी विरासता च हिस्सेदार होन।

¹³क्जोकि परमात्मे अहां जो सैताने दे बसे ते छड्डाई करी अपणे प्यारे पुत्तरे दे राज्जे च लेई अंदा ऐ।

¹⁴अपणे पुत्तरे दे बलिदाने दे जरिये अहां जो छड्डांदा ऐ, मतलब पापां ते माफी दिंदा ऐ।

¹⁵कोई भी परमात्मे जो नीं दिक्खी सकदा, अपर जाह़लू तिसदा पुत्तर माणु दे रूपे च आया, ताह़लू तिन्हीं अपणे आप्पे जो लोकां पर प्रगट कित्ता, कने सैह़ जेठा ऐ कने सारी सृष्टिया पर परम प्रधान ऐ।

¹⁶क्जोकि एह़ सैई मसीह ऐ, जिन्हीं सारी सृष्टिया दियां चीज्जां जो बणाणे तांई परमात्मे सौगी कम्म कित्या था, चां सुअर्गे दियां होन, या धरती दियां, दिक्खियां या अणदिखियां, क्या सिंहासण क्या राज्ज, क्या राज्ज करणे आल़े कने क्या हक्क, सारियां चीज्जां तिसदे जरिये तिसदिया सेवा तांई बणाईयां हन।

¹⁷कने मसीह सारियां चीज्जां बणने ते पैहल्ले मजूद था, कने सारियां चीज्जां तिसदिया इच्छा मताबक कम्म करदियां हन।

¹⁸कने मसीह ई ऐ जेह्ड़ा कलीसिया जो चलांदा ऐ। ठीक तिंआं ई जिंआं इक्क माणुये दा सिर तिसदे पूरे सरीरे जो चलांदा ऐ, सैई सुरू ऐ, कने मरेयां ते जिन्दे होणे आल़ेआं च जेठा ऐ, कि सैई सबना च परम प्रधान होयैं।

¹⁹क्जोकि पिता परमात्मे दी खुसी इस च ऐ, कि तिसदा पूरा सभाव मसीह च वास करैं,

²⁰कने मसीयैं सूल़िया पर जेह्ड़ा खून बाहया, तिसदे जरिये परमात्मे मेल जोल दी सुरुआत कित्ती, परमात्मे जो खरा लग्गा कि सैह़ मसीह दे जरिये सारियां चीज्जां दा चाहे सैह़ धरती दियां होन, चाहे सुअर्गे दियां होन, अप्पु सौगी मेल करी लैन।

²¹तुहां लोक अपणे बुरे कम्मां दिया बज़ाह ते पैहल्ले परमात्मे ते दूर थे, कने तुहां दे मनां च बैर था।

²²अपर हुण परमात्मे मसीह दिया मौत्ती दे जरिये तुहां सौगी भी मेल-जोल करी लेआ, तांजे तुहां जो अपणे सामणै पवित्र कने बेदाग, कने बेकसूर बणाई करी खरेड़ें।

²³जे तुहां मसीह च बसुआस करदे हन, तां तुहां दा बसुआस तिस पर मजबूत रैहणा चाइदा, ठीक तिस घरे साइआं जेह्ड़ा मजबूत नीआं पर बणाया ऐ। कने अहां तिस सुसमाचारे जो सुणी करी जेह्ड़ी आसा अहां जो मिलदी ऐ तिसा जो मत छड्डा। जिसदा प्रचार इस संसारे दे लोकां च कित्ता गेआ, कने सुसमाचारे दा प्रचार करणे तांई मैं पौलुस सेवक बणेया ऐ।

²⁴हुण मैं तिन्हां दुखा दिया बज़ाह ते जेह्ड़े तुहां तांई झेला दा ऐ, खुसी मनांदा ऐ। कने मैं तिसदे सरीरे, मतलब कलीसिया तांई अपणे सरीरे च कने मसीह दे दुखां च बाक्कि रेई गेई कमियां जो पूरा करदे-करदे अपणी जिम्मेवारी निभा दा ऐ।

²⁵इसा कलीसिया तांई कने तुहां तांई मैं परमात्मे दे जरिये दित्तियो सेवा तांई सेवक चुणेया गेआ कि परमात्मे दे हुक्मां दा पूरे तरीके नैं प्रचार करी सकैं।

²⁶मतलब तिस रहस्य जो जेह्ड़ा सदियां ते कने पीढ़ियाँ ते गुप्त रेह्आ, अपर हुण परमात्मे दे लोकां पर प्रगट होएया ऐ।

²⁷परमात्मैं एह़ फैसला लेआ कि तिसदे लोक इस सानदार कने महिमा आल़े रहस्य जो जाणी सकन, जेह्ड़ा सारे लोकां तांई तिस अल्ल ऐ। एह़ रहस्य मसीह अप्पु ई ऐ जेह्ड़ा तुहां च रैंह्दा ऐ, सिर्फ सैई महिमा तांई अहां दी उम्मीद ऐ।

²⁸अहां मसीह दा प्रचार करी नैं हर इक्की माणुये जो परमात्मे दे तिस ज्ञाने दे जरिये चतौणी कने सिक्षा देई नैं समझांदे हन, तांजे अहां एह़ दिक्खी लैन कि हर इक्क बसुआसी परमात्मे सामणै खड़ोणे तांई मसीह च पक्का होई जां।

²⁹इसतांई मैं तिसा सामर्थी नैं तन मन लगाई नैं मेहनत करदा ऐ, जेह्ड़ी मिन्जो मसीह दे जरिये मिलदी ऐ, कने जेह्ड़ी मिन्जो च कम्म करदी ऐ।