Read Kangri कुलुस्सियों 2 Bible Online

कुलुस्सियों 2 - Kangri bible

कुलुस्सियों 2

¹मैं चांह़दा ऐ, कि तुहां जाणी लैन कि तुहां कने तिन्हां तांई जेह्ड़े लौदीकिया सैहरे च हन, कने तिन्हां सारेयां तांई जिन्हां मिन्जो नीं दिख्या, मैं कितणी मेहनत करदा ऐ,

²मैं इसतांई मेहनत कित्ती, तांजे तिन्हां दा बसुआस मजबूत होई जां, कने सैह़ प्यारे नैं अप्पु च मिल्ली नैं रैह़न, मैं चांह़दा ऐ, सैह़ पूरा भरोसा रखन, क्जोकि तिन्हां अल्ल परमात्मे दे गुप्त रहस्य दी पूरी समझ ऐ, जेह्ड़ा यीशु मसीह अप्पु ऐ।

³जिस च अक्ला दे कने ज्ञाने दे सारे खजाने छुपेयो हन।

⁴एह़ मैं इसतांई ग्लादा ऐ, कि कोई माणु तुहां जो अपणी झूठी सिक्षां पर बसुआस करणे तांई राज्जी नीं करी लैं।

⁵क्जोकि जे मैं तुहां ते दूर ऐ, तमी मैं तुहां दे बारे च सोचदा रैंह्दा ऐ, कने मैं खुस हुंदा ऐ, कि जिंआं तुहां जो जीणा चाइदा था, तिंआं ई तुहां ज़िन्दगी जींदे हन, कने तुहां दा बसुआस मसीह च पक्का ऐ।

⁶कने जिंआं तुहां यीशु मसीह जो प्रभु मन्नी करी ग्रहण करी लेआ ऐ, तिंआं ई लगातार तिसदे पचांह़ चलदे रेह्आ।

⁷कने तिस च जड़ पकड़दे कने बधदे भी जा। कने जिंआं तुहां सखाऐयो हन, तिंआं ई बसुआसे च मजबूत हुंदे जा, कने जादा ते जादा परमात्मे दा धन्यावाद करदे रेह्आ।

⁸ध्यान रखा कि कोई तुहां लोकां जो तिन्हां बेकार गल्लां ते वेबकूफ ना बणा। एह़ बेकार गल्लां सुणने च तां ज्ञाने दियां लगदियां हन, क्जोकि एह़ गल्लां तां सिर्फ संसारे दे लोकां दे पास्से ते हन, अपर मसीह दे पास्से ते नीं।

⁹क्जोकि मसीह दे सरीरे च परमात्मे दे सारे गुण पाये जांदे हन,

¹⁰मसीह संसारे दे अधिकारियां कने हकुमता ऊपर राज्ज करदा ऐ, कने जे तुहां मसीह च हन, तां तुहां तिस च पूरे हन।

¹¹मसीयैं भी तुहां दे पापे आल़िआं आदतां जो दूर कित्या ऐ। ठीक तिंआं ई जिंआं खतणा करदे बग्त थोड़ा देहया मास सरीरे ते हटाया जांदा ऐ।

¹²जाह़लू तुहां बपतिस्मा लेआ, तां तुहां भी मसीह साइआं दब्बे गै, जिंआं मसीह मरेयां ते जिन्दा होएया, तिंआं तुहां भी नौये सभावे सौगी जिन्दे होये। एह़ इसतांई होएया कि तुहां परमात्मे पर बसुआस कित्ता, जिन्हीं अपणिया सामर्थी दे जरिये मसीह जो मरेयां ते जिन्दा कित्ता।

¹³तुहां जाह़लू अपणे अपराधां कने बगैर खतणे ते मतलब बपतिस्मे ते पैहल्ले तुहां दा खरा सभाव मरेया था, परमात्मे तुहां दे सारे अपराधां जो माफ करदे होये तुहां जो मसीह सौगी जिन्दा करी दित्या ऐ।

¹⁴कने तिन्हीं अहां दे अपराधां दा चिट्ठा सूल़िया पर मेखां नैं जड़ी करी सामणै ते हटाई दित्ता ऐ, जेह्ड़ा मूसा दिया व्यबस्था जो नीं मन्नणे दिया बज़ाह ते अहां दे नांऐ पर लगया था।

¹⁵कने तिन्हीं मसीह दे सूल़िया पर मरने दे जरिये संसारे दे अधिकारियां कने हकुमता जो हराई करी तिन्हां दा सारेयां सामणै तमासा बणाई दित्ता, कने तिन्हां पर जीत्त हासल करी नैं बड़ी खुसी मनाई।

¹⁶इसतांई कोई भी तुहां दा एह़ ग्लाई नैं, कि तुहां जो क्या खाणा पीणा, या होर त्योहार मनाणे, या नौये चन्द्रमे दा त्योहार मनाणा, या बिस्रामे आल़े दिने दे बारे च फैसला ना करैं।

¹⁷क्जोकि एह़ सारे नियम परछाईया साइआं हन, अपर सच्चाई तां मसीह च पाई जांदी ऐ।

¹⁸कोई भी माणु, जेह्ड़ा दीनता दे ढोंग कने सुअर्गदूतां दी अराधना च लीन ऐ, तुहां जो तुहां दे इनामे ते दूर नीं करी सकैं। ऐदेया माणु इश्वरे दे दर्शन दिक्खणे च ढींगा मारदा ऐ। अपर एह़ सब बकबास ऐ क्जोकि तिन्हां दे दिमाग मतलबी इच्छां नैं भरोया ऐ।

¹⁹कने सैह़ लोक यीशु मसीह सौगी बणी करी नीं रेई सकदे, जेह्ड़ा पूरे सरीरे दा सिर ऐ। जिंआं सरीरे दे सारे जोड़ कने नसां सरीरे सौगी बणी करी रैंह्दियां हन, तिंआं तुहां भी यीशु मसीह च मिल्ली जुली करी कने किठ्ठे रैह़न, क्जोकि सरीरे दे अंग परमात्मे दे पास्से ते बधदे जांदे हन।

²⁰जाह़लू ते तुहां दा पापी सभाव यीशु मसीह सौगी मरी गेआ ऐ, तां तुहां जो इस संसारे दे कायदे कानूना जो मन्नणे दी कोई जरूरत नीं ऐ। इसतांई हुण भी तुहां इस संसारे दे कायदे कानूना जो क्जो मनदे हन, जिसते लगदा ऐ कि तुहां हुण भी इस संसारे दे बसे च हन।

²¹“ऐदिआं चीज्जां जो अपणे हत्थां च मत लेआ! कने ऐदेय खाणे जो मत खा! ऐत्थु तिकर कि ऐदिआं चीज्जां जो छुआ भी मत!”

²²क्जोकि एह़ सारे कायदे कानून बेकार कने कुसी कम्मे दी नीं, क्जोकि एह़ माणुआं दे हुक्मां कने सिक्षां दे मताबक हन।

²³एह़ कायदे कानून तां खरे रस्ते दे पास्से लेई जाणे आल़े लगदे हन, सैह़ एह़ हन, जेह्ड़े अपणे आप्पे जो जबरदस्ती परमात्मे दे भक्त बणने दे जरिये, कने दखावटी दीनता, कने अपणे सरीरां नैं बड़ा बुरा बर्ताब। अपर ऐत्थु तिकर कि जाह़लू लोक इन्हां कायदे कानूना जो मनदे हन, भिरी भी सैह़ अपणे पापे आल़े चाल-चलणे जो नीं रोकी सकदे।