Read Kangri 1 थिस्सलुनीकियों 1 Bible Online

1 थिस्सलुनीकियों 1 - Kangri bible

1 थिस्सलुनीकियों 1

¹मैं पौलुस कने सिलवानुस कने तीमुथियुस अहां थिस्सलुनीकियों दी कलीसिया जो एह़ चिठ्ठी लिखदे हन, जेह्ड़े पिता परमात्मे कने यीशु मसीह च हन: मैं प्रार्थना करदा ऐ, कि तुहां जो अनुग्रह कने सांति मिलदी रैंह्।

²अहां अपणिया प्रार्थना च तुहां जो याद करदे कने सदा तुहां सबना दे बारे च परमात्मे दा धन्यावाद करदे हन,

³अहां हमेसा ई पिता परमात्मे दे सामणै तुहां दे बसुआसे दे कम्म, कने प्यारे दी मेहनत, कने अहां दे प्रभु यीशु मसीह च तुहां दी आसा दा सबर याद करदे हन।

⁴हे मेरे प्यारे साथी बसुआसियो, परमात्मे दे प्यारे लोको, अहां जाणदे हन, कि तुहां जो परमात्मे अपणे लोक होणे तांई चुणी लेआ ऐ।

⁵क्जोकि अहां दे प्रभु यीशु मसीह दा सुसमाचार तुहां अल्ल ना सिर्फ ग्लाणे ते ई नीं, अपर पवित्र आत्मा दिया सामर्थी नैं, कने बड़े बसुआसे सौगी पुज्जया ऐ; जिंआं तुहां जाणदे हन, जाह़लू अहां तुहां सौगी थे, अहां तुहां दे भले दी खातर तुहां बिच्च कदेई ज़िन्दगी जीत्ती।

⁶तुहां तिसा बड़िया मुसीबता च, पवित्र आत्मा दे जरिये मिलियो खुसिया सौगी वचनां जो मन्नी करी अहां दी कने प्रभुये साइआं ज़िन्दगी जीणा लग्गे।

⁷जिसदा नतीजा एह़ होएया कि तुहां मकिदुनिया प्रदेस कने अखाया प्रदेसे दे सारे बसुआसियां तांई इक्क मिसाल बणी गै।

⁸तुहां दे जरिये घल्लेया गेआ परमात्मे दा वचन ना सिर्फ मकिदुनिया प्रदेस कने अखाया प्रदेसे च सणाया गेआ, कने बधदा गेआ, अपर तुहां दा बसुआस जेह्ड़ा परमात्मे पर ऐ, तिसदी एह़ चर्चा हर जगाह च फैली गेई, कि इसदे बारे च अहां जो ग्लाणे दी जरूरत ई नीं पेई।

⁹क्जोकि सैई अप्पु ई अहां दे बारे च ग्लांदे हन, कि जाह़लू अहां तुहां अल्ल आये, तां तुहां अहां दा सुआगत कितणे आदरे नैं कित्ता; कने एह़ भी कि कुस तरीके नैं तुहां मूर्तियां ते दूर होई नैं परमात्मे पास्से फिरे तांजे जिन्दे कने सच्चे परमात्मे दी सेवा करन।

¹⁰कने हुण तुहां तिसदे पुत्तरे दा सुअर्गे ते बापस ओणे दा इन्तजार करदे रेह्आ जिसियो परमात्मे मरेयां ते जिन्दा कित्या, मतलब यीशु मसीह जो, जेह्ड़ा अहां जो ओणे आल़े कोपे ते बचांदा ऐ।