Read Kangri 1 थिस्सलुनीकियों 2 Bible Online

1 थिस्सलुनीकियों 2 - Kangri bible

1 थिस्सलुनीकियों 2

¹हे प्यारे साथी बसुआसियो, तुहां अप्पु ई जाणदे हन, कि अहां दा तुहां अल्ल औणां फायदेमंद होएया,

²जिंआं तुहां अप्पु ई जाणदे हन, कि पैहल्ले अहां फिलिप्पी सैहरे च दुख झेलेया कने बुरा बर्ताब होणे दे बाद भी परमात्मैं अहां जो इतणी हिम्मत दित्ती, कि अहां परमात्मे दा सुसमाचार तुहां दे लाक्के च भारी बरोध दे होणे दे बावजूद भी तुहां जो सणाई सकन।

³क्जोकि अहां दी सिक्षा ना धोखे दी ऐ कने ना गलत इरादे दी, कने ना ठग बाजी दी ऐ।

⁴अपर जिंआं परमात्मैं अहां जो इस जोग्गा समझी करी सुसमाचार दित्या ऐ, इसतांई अहां माणुआं जो नीं, अपर अहां दे मना जो परखणे आल़े परमात्मे जो खुस करणे तांई सिक्षा दिंदे हन।

⁵एह़ तुहां जाणदे हन, कि ना तां अहां दियां गल्लां च हेरा फेरी थी, कने ना तां अहां तुहां ते कुच्छ पाणे तांई लालच कित्ता, इन्हां गल्लां तांई परमात्मा गवाह ऐ कि अहां सैदय लोक नीं थे।

⁶हलांकि अहां मसीह दे प्रेरित होणे दिया बज़ाह ते तुहां पर बोझ बणी सकदे थे, भिरी भी अहां लोकां ते आदर नीं चांह़दे थे, कने ना तुहां ते, ना होर कुसी ते।

⁷अपर जिंआं माँ अपणे बच्चेयां जो पाल़दी पोसदी ऐ, तिंआं ई अहां भी तुहां बिच्च रेई करी नरम सभाव दस्सेया ऐ;

⁸कने तिंआं ई अहां तुहां दी लालसा करदे होये, ना सिर्फ परमात्मे दा सुसमाचार पर अपणे-अपणे प्राण भी तुहां जो दैणे जो त्यार थे, इसतांई कि तुहां अहां दे बड़े भरी प्यारे होई गियो थे।

⁹क्जोकि, हे प्यारे साथी बसुआसियो, तुहां अहां दी मेहनत कने दुखां जो याद रखदे हन। कि अहां इसतांई रात दिन कम्म धंधा करदे होये तुहां च परमात्मे दा सुसमाचार प्रचार कित्ता कि तुहां च कुसी पर भी बोझ नीं बणन।

¹⁰तुहां अप्पु ई गवाह हन, कने परमात्मा भी गवाह ऐ कि तुहां सारे बसुआसियां सौगी अहां दा बर्ताब कितणा पवित्र कने धार्मिक कने बेकसूर था।

¹¹तुहां जाणदे हन, कि जिंआं पिता अपणे जागतां नैं बर्ताब करदा ऐ, तिंआं ई अहां भी तुहां च हर इक्की जो सिक्षा दिंदे, कने सांति दिंदे, कने समझांदे थे।

¹²कि तुहां दे चाल-चलण ते परमात्मे जो आदर मिल्लैं, जेह्ड़ा तुहां जो अपणे राज्जे च कने महिमा च सददा ऐ।

¹³इसतांई अहां भी परमात्मे दा धन्यावाद हमेसा करदे हन; कि जाह़लू अहां दे जरिये परमात्मे दे सुसमाचारे दा वचन तुहां सुणेया, तां तुहां तिसियो माणुआं दा नीं अपर परमात्मे दा वचन समझी नैं अपनाई लेआ, कने सच्च बिच्च एह़ सुसमाचारे दा वचन परमात्मे दे पास्से ते ऐ। कने सैह़ अपणे वचने दे जरिये तुहां दिया ज़िन्दगिया च जेह्ड़े मसीह पर बसुआस रखदे हन, कम्म करदा ऐ।

¹⁴इसतांई कि हे प्यारे साथी बसुआसियो, तुहां परमात्मे दी तिन्हां कलीसियां साइआं चाल चलणा लग्गे, जेह्ड़ियां यहूदिया प्रदेसे च यीशु मसीह च हन, क्जोकि तुहां भी अपणे लोकां ते तिंआं ई दुख झेलेया, जिंआं तिन्हां यहूदियां च झेलेया था,

¹⁵कने इन्हां यहूदियां प्रभु यीशुये जो कने भविष्यवक्तां जो भी मारी दित्ता कने अहां जो सताया, कने परमात्मा तिन्हां ते खुस नीं; कने सैह़ सारे माणुआं दा बरोध करदे हन,

¹⁶कने सैह़ होरनी जाति दे लोकां नैं तिन्हां दे उद्धारे तांई गल्लां करणे ते अहां जो रोकदे हन, इस तरीके नैं सैह़ सदा अपणे पापां दा घड़ा भरदे हन। कने हुण तिन्हां पर परमात्मे दा कोप आई पेआ ऐ।

¹⁷हे मेरे प्यारे साथी बसुआसियो, जाह़लू अहां थोड़ी देर तांई मने ते नीं अपर कुच्छ बग्त तांई तुहां ते लग्ग होई गियो थे, तां अहां बड़ी इच्छा सौगी तुहां जो दिक्खणे तांई होर भी जादा कोसस कित्ती।

¹⁸इसतांई अहां, खास करी मैं पौलुसैं इक्क बरी नीं अपर कई बरी तुहां अल्ल औणां चाया, अपर सैताने अहां जो तुहां अल्ल दुवारी नीं औणां दित्ता।

¹⁹अहां दिया आसा, खुसिया कने बड़ेयाई दा मुकट कुण ऐ? क्या अहां दे प्रभु यीशुये दे सामणै तिसदे ओणे दे बग्त तुहां नीं हुंगे?

²⁰अहां दी बड़ेयाई कने खुसी तुहां ई हन।