Read Kangri 1 थिस्सलुनीकियों 3 Bible Online

1 थिस्सलुनीकियों 3 - Kangri bible

1 थिस्सलुनीकियों 3

¹आखर च जाह़लू अहां ते होर नीं रेई होएया, तां अहां एह़ सोचेया कि एथेंस सैहरे च किल्ले रेई जान,

²कने अहां तीमुथियुसे जो, जेह्ड़ा मसीह दे सुसमाचारे च अहां दा बसुआसी भाऊ कने परमात्मे दा सेवक ऐ, इसतांई तिसियो तुहां अल्ल घल्लेया ऐ, कि सैह़ तुहां जो बसुआसे च मजबूत करैं; तांजे तुहां दा बसुआस यीशु मसीह च लगातार बणी रैंह्।

³कि इन्हां मुसीबतां दिया बज़ाह ते तुहां बसुआसे ते डगमगाई नीं जान। क्जोकि तुहां अप्पु जाणदे हन, अहां जो इन्हां मुसीबतां जो झेलणा ई पोणा।

⁴क्जोकि पैहल्ले ई, जाह़लू अहां तुहां अल्ल थे तां तुहां ग्लांदे थे, कि अहां सबना जो मुसीबतां झेलणा ई पोणियां, कने इआं ई होएया ऐ, जिंआं कि तुहां जाणदे भी हन।

⁵इसा बज़ाह ते जाह़लू मिन्जो ते होर बरदासत नीं होएया, तां तुहां दे बसुआसे दा हाल जाणने तांई मैं तीमुथियुसे जो तुहां अल्ल घल्लेया, कि कुत्थी इआं ना होयैं, कि परीक्षा करणे आल़े सैताने तुहां दी परीक्षा कित्ती होयैं, कने अहां दी मेहनत बेकार होई गेई ऐ।

⁶अपर हुण तीमुथियुसें, जेह्ड़ा तुहां अल्ले ते अहां दे ऐत्थु आई करी, तुहां दा बसुआस कने प्यारे दा सुसमाचार सणाया। कने इसा गल्ला जो भी सणाया, कि तुहां सदा प्यारे नैं अहां जो याद करदे हन, कने अहां दे दिक्खणे दी इच्छा रखदे हन, जिंआं अहां भी तुहां जो दिक्खणे दी इच्छा रखदे हन।

⁷इसतांई हे मेरे प्यारे साथी बसुआसियो, अहां अपणे सारे दुख कने मुसीबता च तुहां दे बारे च सुणी करी अहां जो बड़ी खुसी होई, कि तुहां अह्ल्ली तिकर भी यीशु मसीह पर बसुआस करदे हन।

⁸क्जोकि हुण जे तुहां प्रभु च मजबूत बणी रैह़न, तां एह़ अहां तांई नौईआ ज़िन्दगिया साइआं ऐ।

⁹कने जितणी खुसी अहां जो तुहां दिया बज़ाह ते अपणे परमात्मे सामणै ऐ, तिसदे बदले तुहां दे बारे च अहां कुस तरीके नैं परमात्मे दा धन्यावाद करन?

¹⁰अहां रात दिन बड़ी प्रार्थना करदे रैंह्दे हन, कि तुहां जो दुवारी दिक्खन, कने तुहां दे बसुआसे च जेह्ड़ी कमी ऐ, तिसा जो पूरा करन।

¹¹अहां प्रार्थना करदे हन, कि अहां दा पिता परमात्मा कने अहां दा प्रभु यीशु, तुहां अल्ल ओणे च अहां दी मदत कने अगुआई करैं।

¹²कने प्रभु इआं करैं कि जिंआं अहां तुहां नैं प्यार रखदे हन, तिंआं ई तुहां दा प्यार भी अप्पु च कने सारे माणुआं सौगी बधदा जां, कने तरक्की करदा जां,

¹³तांजे सैह़ तुहां दे मनां जो ऐदेया मजबूत करैं, कि जाह़लू अहां दा प्रभु यीशु अपणे सारे परमात्मे दे लोकां सौगी दुवारी बापस औयें, तां तुहां अहां दे पिता परमात्मे दे सामणै पवित्रता च बेकसूर ठैह़रन।