Read Kangri 1 थिस्सलुनीकियों 4 Bible Online

1 थिस्सलुनीकियों 4 - Kangri bible

1 थिस्सलुनीकियों 4

¹आखरी च हे प्यारे साथी बसुआसियो, अहां तुहां नैं विणती करदे हन, कने तुहां जो प्रभु यीशु च समझांदे हन, कि तुहां प्रभु दे नांऐ च इस तरीके नैं ज़िन्दगी जीआ, जेह्ड़ी परमात्मे जो खुस करदी ऐ। कने जिंआं अहां तुहां जो सखाया भी ऐ। तुहां पैहल्ले ते ई इआं करदे आएयो हन, कने तिंआं ई होर भी बधदे जा।

²क्जोकि तुहां हुक्मां जो जाणदे हन, जेह्ड़े हुक्म अहां तुहां जो प्रभु यीशु मसीह दे पास्से ते दित्ते हन।

³क्जोकि परमात्मे दी इच्छा एह़ ऐ, कि तुहां पवित्र बणा मतलब ब्यभिचारे ते बची रेह्आ,

⁴कने इसते बचणे तांई तुहां च हर इक्क माणु अपणे सरीरे जो बसे च करणा सीखें, कने अपणिया लाड़िया सौगी पवित्रता कने आदरे नैं रैंह्।

⁵तुहां जो होरनी जातिआं दे लोकां साइआं गंदे कम्म करणे दी इच्छा नीं करणी चाइदी, जेह्ड़े परमात्मे जो नीं जाणदे हन।

⁶इन्हां सरीरे दियां इच्छा तांई कोई भी अपणे बसुआसी भाऊये जो धोखा ना दैं, कने ना तिसदा फायदा उठां, क्जोकि प्रभु यीशु इन्हां सारियां गल्लां दा न्याय करणे आल़ा ऐ; जिंआं कि अहां पैहल्लैं ई तुहां लोकां जो ग्लाया, कने समझाया भी था।

⁷क्जोकि परमात्मैं अहां जो असुद्ध ज़िन्दगी जीणे तांई नीं, अपर पवित्र ज़िन्दगी जीणे तांई सद्देया ऐ।

⁸इसतांई जेह्ड़ा इन्हां नियमां मताबक ज़िन्दगी जीणे ते इन्कार करदा ऐ, सैह़ माणुये दा नीं अपर परमात्मे दा इन्कार करदा ऐ, जेह्ड़ा अपणा पवित्र आत्मा तुहां जो दिंदा ऐ।

⁹अपर बसुआसी भाईचारे दे प्यारे दे बारे च एह़ जरूरत नीं ऐ कि मैं कुच्छ लिखें, क्जोकि अप्पु च प्यार रखणा तुहां अप्पु ई परमात्मे ते सिखया ऐ,

¹⁰कने सारे मकिदुनिया प्रदेसे दे बसुआसी भाऊआं सौगी ऐदेया ई प्यार होणा चाइदा। अपर हे प्यारे साथी बसुआसियो, अहां तुहां जो समझांदे हन, कि तुहां मसीह दे प्यारे च होर भी बधदे जा।

¹¹जिंआं अहां तुहां जो समझाया ऐ, तिंआं ई चुपचाप रैहणे कने अपणा-अपणा कम्मकार करणे, कने अपणे-अपणे हत्थां नैं कम्माणे दी कोसस करा।

¹²कि बेबसुआसी लोकां सौगी आदरे नैं बर्ताब करा, तांजे तुहां जो कुसा भी चीज्जा दी कमी ना होयैं।

¹³हे प्यारे साथी बसुआसियो, अहां नीं चांह़दे हन, कि तुहां तिन्हां दे बारे च अणजाण रेह्आ। जेह्ड़े मसीह च इस संसारे जो छड्डी करी चली गियो हन, इआं ना होयैं, कि तुहां दूयेयां साइआं सोक करन जिन्हां जो उम्मीद नीं ऐ।

¹⁴क्जोकि अहां जे बसुआस करदे हन कि यीशु मरेया, कने जिन्दा भी होएया, तां तिंआं ई परमात्मे तिन्हां जो भी जेह्ड़े बसुआसी यीशु च इस संसारे जो छड्डी करी चली गियो हन, परमात्मा तिन्हां जो दुवारी यीशु मसीह सौगी लेई ओंगा।

¹⁵क्जोकि अहां प्रभु यीशुये दे वचने मताबक तुहां नैं एह़ ग्लांदे हन, कि अहां जेह्ड़े जिन्दे हन, कने प्रभु दे बापस ओणे तिकर बची रैंह्गे, कने जेह्ड़े बसुआसी मसीह च इस संसारे जो छड्डी करी चली गियो हन, सैह़ अहां ते पैहल्लैं यीशु मसीह नैं मिलगे।

¹⁶क्जोकि प्रभु यीशु अप्पु ई सुअर्गे ते ओंगा; कने तिस बग्त ललकार, कने प्रधान सुअर्गदूते दी उआज़ सुम्मगी, कने परमात्मे दी तुरही बजगी। कने जेह्ड़े बसुआसी मसीह च इस संसारे जो छड्डी करी चली गियो हन, सैह़ पैहल्लैं जिन्दे हुंगे।

¹⁷ताह़लू अहां जेह्ड़े जिन्दे कने बची रैंह्गे, तिन्हां सौगी बदल़ां पर चुक्की लियो जांगे, कि अम्बरे च प्रभुये नैं मिलगे; कने तिस बग्त ते अहां सदा प्रभुये सौगी रैंह्गे।

¹⁸इस तरीके नैं इन्हां गल्लां ते इक्की दूये जो हौंसला देआ करा।