Read Kangri 1 थिस्सलुनीकियों 5 Bible Online

1 थिस्सलुनीकियों 5 - Kangri bible

1 थिस्सलुनीकियों 5

¹अपर हे प्यारे साथी बसुआसियो, इसदी कोई जरूरत नीं, कि प्रभु यीशु मसीह दे बापस ओणे दे बग्तां दे कने तरीकां दे बारे च तुहां जो कुच्छ लिख्या जां।

²क्जोकि तुहां अप्पु च ठीक जाणदे हन कि जिंआं राती चोर ओंदा ऐ, तिंआं ई प्रभु यीशुये दा औणां भी हुंगा।

³जाह़लू लोक ग्लांगे, “कि सब कुच्छ ठीक ठाक ऐ, कने कुच्छ डर नीं,” तां तिन्हां पर चाणचक बड़ी मुसीबत आई पोंगी, जिंआं इक्क लैरथिया जणासा जो इक्क बच्चे जम्मणे दी पीड़ हुंदी; तिंआं ई सैह़ तिसा बड़िया मुसीबता ते कुसी भी तरीके नैं नीं बचगे।

⁴अपर हे प्यारे साथी बसुआसियो, तुहां तां नेहरे च नीं हन, कि एह़ प्रभु दे दिन तुहां पर चोरे साइआं आई पोन।

⁵क्जोकि तुहां सारे जोतिया दी कने दिने दी औलाद हन, कने अहां ना राती दी कने ना ई नेहरे दी औलाद हन।

⁶इसतांई अहां दूयेयां बेबसुआसियां साइआं सोई नीं रैह़न, जागदे कने चौकन्ने रेह्आ।

⁷क्जोकि जेह्ड़े सोंदे हन, सैह़ रातियो सोंदे हन, कने जेह्ड़े नशे च मतवाल़े हुंदे हन, सैह़ रातियो मतवाल़े हुंदे हन।

⁸अपर अहां जेह्ड़े दिन दे हन, बसुआसे कने प्यारे दा सुरक्षा कवच पैहनी नैं कने उद्धारे दी आसा दा टोप पैहनी करी चौकन्ने रेह्आ।

⁹क्जोकि परमात्मैं अहां जो गुस्से नैं सज़ा दैणे तांई नीं, अपर इसतांई चुणेया ऐ, कि अहां अपणे प्रभु यीशु मसीह दे जरिये उद्धार पाई सकन।

¹⁰यीशु मसीह अहां तांई इसा बज़ाह ते मरेया, कि अहां चाहे जिन्दे हन चाहे मरेयो हन, जाह़लू यीशु मसीह बापस ओंगा, तां अहां तिस सौगी हमेसा जीन।

¹¹इसा बज़ाह ते इक्की दूये जो हौंसला देआ, कने इक्की दूये दी बसुआसे च मजबूत होणे तांई मदत करा, जिंआं कि तुहां ऐदेया करदे भी हन।

¹²हे प्यारे साथी बसुआसियो, अहां तुहां नैं विणती करदे हन, कि जेह्ड़े तुहां च मेहनत करदे हन, कने प्रभु च जेह्ड़े तुहां दे अगुऐ हन, कने सिक्षा दिंदे हन, तिन्हां दी मन्ना कने आदर करा।

¹³कने तिन्हां दे कम्मां दिया बज़ाह ते प्यारे नैं तिन्हां जो बड़ा ई आदर मान जोग्गे समझा। कने अप्पु च मेल-जोल करी नैं रेह्आ।

¹⁴हे प्यारे साथी बसुआसियो, अहां तुहां जो समझांदे हन, कि जेह्ड़े लोक सुस्त हन, तिन्हां जो चतौणी देआ, डरफोकां जो हिम्मत देआ, बसुआसे च कमजोरेयां जो सम्भाल़ा, सबना सौगी सबरे नैं रेह्आ।

¹⁵चौकन्ने रेह्आ कोई कुसी नैं बुराईया दे बदले बुराई ना करैं, अपर हमेसा भलाई करणे जो त्यार रेह्आ, अप्पु च कने सबना नैं हमेसा भलाईया दे कम्म करणे दी कोसस करा।

¹⁶सदा खुस रेह्आ।

¹⁷लगातार प्रार्थना करदे रेह्आ।

¹⁸हर गल्ला च परमात्मे दा धन्यावाद करा; क्जोकि तुहां तांई यीशु मसीह च परमात्मे दी ऐई इच्छा ऐ।

¹⁹पवित्र आत्मा दे कम्मां जो लोकां दिया ज़िन्दगिया च होणे ते मत रोका।

²⁰भविष्यवाणियां जो सुणी करी अणसुणा मत करा।

²¹सारियां गल्लां जो परखा; जेह्ड़ियां खरिया हन, तिन्हां गल्लां जो ग्रहण करा।

²²कने हर किस्मा दी बुराईया ते बची रेह्आ।

²³परमात्मा जेह्ड़ा सांति दिंदा ऐ, सैई तुहां जो पूरे तरीके नैं पवित्र करगा। कने तुहां दिया आत्मा, प्राण, कने सरीर अहां दे प्रभु यीशु मसीह दे बापस ओणे तिकर पूरी रीतिया नैं बेकसूर कने सम्भाल़ी नैं रखगा।

²⁴जिन्हीं तुहां जो सद्देया ऐ, सैह़ इसियो पूरा भी करगा, क्जोकि सैह़ बसुआसे जोग्गा ऐ

²⁵हे प्यारे साथी बसुआसियो, अहां तांई प्रार्थना करा।

²⁶कने सारे बसुआसियां जो साफ मने नैं गल़े मिल्ली करी नमस्कार करा।

²⁷मैं तुहां जो प्रभु दा हुक्म दिंदा ऐ, कि एह़ चिठ्ठी सारे बसुआसी भाऊआं जो पढ़ी नैं सणाई जां।

²⁸मैं प्रार्थना करदा ऐ, कि अहां दे प्रभु यीशु मसीह दा अनुग्रह तुहां पर हुंदा रैंह्।