Read Kangri 2 थिस्सलुनीकियों 1 Bible Online

2 थिस्सलुनीकियों 1 - Kangri bible

2 थिस्सलुनीकियों 1

¹मैं पौलुस, सिलवानुस कने तीमुथियुस अहां थिस्सलुनीकियों दी कलीसिया जो एह़ चिठ्ठी लिखदे हन, जेह्ड़े पिता परमात्मे कने यीशु मसीह च हन।

²मैं प्रार्थना करदा ऐ, कि अहां दे पिता परमात्मे ते कने प्रभु यीशु मसीह ते तुहां जो अनुग्रह कने सांति मिलदी रैंह्।

³हे प्यारे साथी बसुआसियो, तुहां दे बारे च अहां जो हमेसा परमात्मे दा धन्यावाद करणा चाइदा, कने एह़ ठीक भी ऐ, इसतांई कि तुहां दा बसुआस यीशु मसीह च बड़ा जादा बधी गेआ ऐ, कने तुहां सारेयां दा प्यार अप्पु च बड़ा ई बधदा जा दा ऐ।

⁴इसतांई अहां परमात्मे दी कलीसिया दे बसुआसी तुहां दे बारे च घमंड करदे हन, बेसक तुहां दुखां कने मुसीबतां च होई नैं जा दे हन, भिरी भी तुहां इन्हां जो बड़े सबरे नैं लगातार झेलदे हन, कने मसीह पर बसुआस करदे हन।

⁵कने जिन्हां दुखां जो जेह्ड़े तुहां झेला दे हन, परमात्मा अपणा न्याय दस्सणे तांई इन्हां दा इस्तेमाल करगा, कने तुहां जो अपणे राज्जे च पुज्जणे जोग्गा बणांगा।

⁶क्जोकि परमात्मा हमेसा ठीक न्याय करदा ऐ, कि जेह्ड़े तुहां जो दुख दिंदे हन, तिन्हां जो बदले च दुख दैं।

⁷सैह़ तुहां जो कने अहां जो भी चैन दिंगा, जेह्ड़े हुण दुख झेला दे हन, एह़ ताह़लू हुंगा, जाह़लू प्रभु यीशु मसीह अपणे सामर्थी सुअर्गदूतां सौगी सुअर्गे ते अग्गी दियां लपटां च होई नैं ओंगा,

⁸कने जेह्ड़े परमात्मे जो नीं पणछैणदे, कने अहां दे प्रभु यीशुये दे सुसमाचारे जो नीं मनदे, तिन्हां जो सज़ा दिंगा।

⁹प्रभु तिन्हां जो अप्पु ते दूर करगा, कने तिन्हां जो अपणिया महिमा च सामर्थी जो मसूस करणे दी इजाजत नीं दिंगा, कने सैह़ तिन्हां जो सदा दी सज़ा दिंगा

¹⁰एह़ तिस दिन हुंगा, जाह़लू यीशु मसीह अपणे लोकां च महिमा पाणे, कने सारे लोक जेह्ड़े तिस पर बसुआस करदे हन; तिन्हां ते आदर पाणे तांई ओंगा। तुहां भी तिन्हां च सामिल हुंगे, क्जोकि तुहां तिस सुसमाचारे पर बसुआस कित्ता, जेह्ड़ा अहां तुहां जो तिसदे बारे च दस्सेया था।

¹¹इसतांई अहां लगातार तुहां तांई प्रार्थना भी करदे हन, कि अहां दा परमात्मा तुहां जो इस जोग्गा बणा, जिसियो करणे तांई तिन्हीं तुहां जो सद्देया ऐ, कने भलाई दी हर इक्क इच्छा कने बसुआसे दे हर इक्की कम्मे जो सामर्थी सौगी पूरा करैं,

¹²इस तरीके नैं अहां दे प्रभु यीशु मसीह दा नां तुहां दे जरिये महिमा पां। कने तुहां तिसदे जरिये आदर पांगे। एह़ सब कुच्छ अहां दे परमात्मे कने यीशु मसीह दे अनुग्रह ते हुंगा।