Read Kangri 1 तीमुथियुस 1 Bible Online

1 तीमुथियुस 1 - Kangri bible

1 तीमुथियुस 1

¹मैं पौलुस जेह्ड़ा अहां दे उद्धार करणे आल़े परमात्मे कने यीशु मसीह जिस पर अहां आसा रखदे हन, तिन्हां दे हक्के दे जरिये यीशु मसीह दा प्रेरित ऐ, तुहां जो एह़ चिठ्ठी लिखा दा ऐ।

²मैं तुहां जो एह़ चिठ्ठी तीमुथियुसे दे नांऐ पर लिखा दा ऐ, जेह्ड़ा मिन्जो तांई मेरे जागते साइआं ऐ। क्जोकि तिन्हीं भी मिन्जो साइआं यीशु मसीह पर बसुआस कित्ता, मैं प्रार्थना करदा ऐ, कि पिता परमात्मे कने अहां दे प्रभु यीशु मसीह ते तिज्जो अनुग्रह, दया कने सांति मिलदी रैंह्।

³मैं तिज्जो भिरी ग्ला दा ऐ, जेह्ड़ा तिज्जो नैं इफिसुस सैहरे जो छड्डी करी मकिदुनिया प्रदेसे जो जाणे ते पैहल्लैं करणे जो दस्सेया था, कि तिन्हां झूठे सिक्षकां जो हुक्म देई नैं रोका कि झूठी सिक्षा मत देआ,

⁴कने तिन्हां बेकार काहणियां कने पूर्वजां दियां मनगढ़ंत काहणियां पर मन मत लगा, जिन्हां ते लड़ाई झगड़े हुंदे हन, एह़ चीज्जां परमात्मे दा कम्म करणे च मदत नीं करदियां। क्जोकि परमात्मे दा कम्म तांई होई सकदा ऐ, जे कोई तिस पर बसुआस करैं।

⁵इस हुक्मे दा मकसद एह़ ऐ कि तुहां साफ मन, साफ अन्तर आत्मा कने सच्चे बसुआसे सौगी इक्की दूये नैं प्यार करा।

⁶झूठे सिक्षकां तां इन्हां जो छड्डी दित्या ऐ, कने लोक फ़ालतू दियां गल्लां दी बैंह्सबाजी च पेई गियो हन।

⁷एह़ मूसा दिया व्यबस्था जो सखाणे आल़े तां बणना चांह़दे हन, अपर जेह्ड़ियां गल्लां बड़िया हिम्मता नैं दूये लोकां जो सखांदे हन कने तिन्हां जो नीं जाणदे कि सैह़ क्या सखा दे हन।

⁸अहां जाणदे हन कि मूसा दी व्यबस्था खरी ऐ, सिर्फ तांई जे लोक इसा जो ठीक तरीके नैं सखान।

⁹अहां जाणदे हन कि मूसा दी व्यबस्था धार्मिक लोकां तांई नीं ऐ, अपर अपवित्र लोकां तांई कने परमात्मे दे बरोध करणे आल़े तांई ऐ, कने परमात्मे जो नीं मन्नणे आल़े कने हमेसा पाप करणे आल़े लोकां तांई, बुरे लोकां कने परमात्मे दी बेइज्जती करणे आल़े लोकां तांई, अपणे माँ-बुढ़े कने दूये लोकां दे हत्यारेयां तांई ऐ,

¹⁰ब्यभिचारियां, दूये मर्दां सौगी गलत कम्म करणे आल़े तांई, गुलामी तांई माणुआं जो बेचणे आल़े लोकां तांई, झूठ ग्लाणे आल़े कने झूठी कसम खाणे आल़े लोकां तांई, कने खरिया सिक्षा दे खलाफ कुसी भी तरीके दा कम्म करणे आल़े तांई ऐ।

¹¹एह़ सुसमाचार दी सिक्षा परमधन्य परमात्मे दे पास्से ते ऐ, जेह्ड़ी लोकां जो सणाणे तांई परमात्मे मिन्जो दित्तियो ऐ।

¹²मैं अपणे प्रभु यीशु मसीह दा धन्यावाद करदा ऐ, कि तिन्हीं मिन्जो सामर्थ दित्ती, कने मिन्जो बसुआसे जोग्गा समझी नैं अपणिया सेवा तांई चुणेया।

¹³मसीह च बसुआस करणे ते पैहल्लैं मैं मसीह दी निंदा करदा था, कने बसुआसी लोकां पर जुल्म करी नैं बड़ी बेरैहमिया नैं तिन्हां दा नकसान करदा था। अपर भिरी भी परमात्मे मिन्जो पर दया कित्ती, क्जोकि मिन्जो नीं पता था कि मैं क्या करा दा ऐ, कने तिस बग्ते तिकर मैं यीशु मसीह पर बसुआस नीं करदा था।

¹⁴यीशु मसीह च अहां दे प्रभु दा मता सारा अनुग्रह बसुआसे कने प्यारे नैं मिन्जो पर होएया।

¹⁵जेह्ड़ी गल्ल मैं तुहां जो दस्सी सैह़ सच्च कने पूरे तरीके नैं बसुआस करणे जोग्गी ऐ। क्जोकि यीशु मसीह अहां पापी लोकां दा उद्धार करणे तांई इस संसारे च आया कने तिन्हां च सबते बड्डा पापी मैं ऐ।

¹⁶अपर मिन्जो पर इसतांई दया होई, कि मिन्जो च जेह्ड़ा सबते बड्डा पापी ऐ, यीशु मसीह उदारणे साइआं अपणिया पूरिया सेहन सक्तिया दा सबूत दस्सें। जेह्ड़े लोक तिस पर सदा दी ज़िन्दगिया तांई बसुआस करगे।

¹⁷हुण सदा काल तिकर राज्ज करणे आल़ा राजा मतलब सदा जिन्दा रैहणे आल़ा, जिसियो कोई नीं दिक्खी सकदा कने इकलौते परमात्मे दा आदर कने महिमा जुगा-जुग हुंदी रैंह्। आमीन।

¹⁸हे मेरे पुत्तर तीमुथियुस, मैं तिज्जो एह़ सलाह दिंदा ऐ, कि तू भविष्यवक्ता दियां ग्लाईयां गल्लां याद कर कि तिज्जो नैं क्या होणा ऐ। तिज्जो तिसदियां ग्लाईयां गल्लां जो तिन्हां झूठी सिक्षा दैणे आल़े लोकां दे खलाफ हत्थयारां साइआं इस्तेमाल करणा जरूरी ऐ।

¹⁹तुहां यीशु मसीह च अपणे बसुआसे जो बणाई कने अपणिया अन्तर आत्मा जो साफ रखा। कुच्छ लोकां तां अपणिया साफ अन्तर आत्मा जो छड्डी दित्या ऐ, जिसदिया बज़ाह ते यीशु मसीह च तिन्हां दा बसुआस मुक्की गेआ ऐ।

²⁰मैं हुमिनयुसे कने सिकन्दरे जो कलीसिया ते कड्डी दित्या ऐ कने तिन्हां जो सैताने दे बसे च देई दित्या ऐ, तांजे सैह़ लोक समझी जान कि तिन्हां जो परमात्मे दी निंदा नीं करणी चाइदी।