Read Kangri 1 तीमुथियुस 2 Bible Online

1 तीमुथियुस 2 - Kangri bible

1 तीमुथियुस 2

¹सबना ते पैहल्लैं मैं इसा गल्ला पर जोर पाई नैं ग्लांदा ऐ कि परमात्मे दे सारे लोकां तांई विणती, प्रार्थना कने धन्यावाद कित्ते जान।

²सारे राजेयां कने अधिकारी लोकां तांई प्रार्थना करेया करा तांजे अहां सुख-चैन सौगी रेई सकन तांजे अहां परमात्मे दी अराधना करन कने दूये लोकां सौगी खरा बर्ताब रखन।

³इआं करणा खरी गल्ल ऐ कने एह़ अहां दे उद्धारकर्ता परमात्मे जो खरा लगदा ऐ,

⁴कने परमात्मा चांह़दा ऐ कि सारे लोक उद्धार पान, कने सच्चाईया जो जाणन,

⁵क्जोकि इक्क ई परमात्मा ऐ, कने सिर्फ परमात्मा ई माणुआं च मेल-जोल कराई सकदा कने सैह़ यीशु मसीह ई ऐ जेह्ड़ा इक्क माणु दे रूपे च पैदा होएया था।

⁶सारे लोकां जो सैतान कने पापे दे बसे ते छड्डाणे तांई मसीयैं अप्पु जो बलिदान करी दित्ता कने तिसदा बलिदान ठीक बग्ते पर इसा गल्ला दा सबूत था कि परमात्मा सारे लोकां जो छुटकारा दैणा चांह़दा था।

⁷परमात्मे मिन्जो सुसमाचारे दा प्रचार करणे कने प्रेरित बणने तांई कने होरनी जातिआं दे लोकां तांई चुणेया ऐ। मैं झूठ नीं ग्ला करदा ऐ अपर सच्च ग्ला करदा ऐ।

⁸इसतांई मैं चांह़दा ऐ कि हर जगाह सभां च मरद हत्थां जो ऊपर चुक्की करी बगैर कुसी गुस्से कने बैंह्सबाजी नैं प्रार्थना करा करैं।

⁹इआं ई मैं चांह़दा कि मसीह जणासां ना ऐदेय बाल़ बणाई करी कने ना सोन्ने मोती दे मैंह्गे-मैंह्गे गैहणे पाई कने ना ई ऐदेय कपड़े पाई नैं अपणे आप्पे जो संवारन जिसदिया बज़ाह ते मरद तिन्हां जो पाणा चान, अपर सैह़ चज्जे दे कपड़े पा करन जेह्ड़े तिन्हां दे सरीरे जो खरे तरीके नैं ढकन।

¹⁰अपर इन्हां चीज्जां जो करणे दे बजाये तिन्हां जो दूये लोकां तांई भलाई दे कम्म करी नैं अप्पु छैल़ बणाणा चाइदा क्जोकि मसीह जणासां जो इआं करणा सजदा।

¹¹कने जणासां जो चुप रेई करी कने बड़िया इज्जता नैं सब कुच्छ सीखणा चाइदा।

¹²कने मैं नीं चांह़दा कि जणासां कलीसिया च मर्दां जो सखान, अपर तिन्हां जो कलीसिया च चुप रैहणा चाइदा ।

¹³मैं एह़ इसतांई ग्ला दा ऐ, कि परमात्मे आदमे जो पैहल्ले बणाया कने तिसते बाद हव्वा जो बणाया ऐ।

¹⁴आदम सैताने दे बैहकावे च नीं आया था अपर जणांस तिसदे बैहकावे च आई थी जिसदिया बज़ाह ते तिन्नै परमात्मे दे हुक्मे जो तोड़ेया।

¹⁵भिरी भी जणासां मसीह पर बसुआस बणाई रखदियां, कने बाक्कि लोकां सौगी प्यारे नैं, पवित्र कने खरे तरीके नैं बर्ताब करन तां परमात्मा तिन्हां दा बच्चे जम्मणे दे जरिये उद्धार करगा।