Read Kangri 1 तीमुथियुस 3 Bible Online

1 तीमुथियुस 3 - Kangri bible

1 तीमुथियुस 3

¹एह़ गल्ल सच्च ऐ कि जेह्ड़ा कलीसिया दा अगुआ बणना चांह़दा ऐ, सैह़ खरे कम्मां करणे दी इच्छा करदा ऐ,

²इसतांई एह़ जरूरी ऐ कि कलीसिया दा अगुआ बेकसूर, कने इक्की लाड़िया दा लाड़ा, हर हालता च अपणे आप्पे जो काबू करणे आल़ा, सांत सभावे आल़ा, इज्जतदार, परोणेयां दी आदर-खातर करणे आल़ा, कने परमात्मे दे वचने जो खरे तरीके नैं सखाणे आल़ा होयैं।

³सैह़ पियक्कड़ कने मारपीट करणे आल़ा ना होयैं, अपर नरम दिले दा होयैं, कने ना लड़णे आल़ा, कने ना धन-दौलता दा लालची होयैं।

⁴सैह़ अपणे परवारे जो ठीक ढंगे नैं चलाणे आल़ा होयैं, कने तिसियो अपणे बाल बच्चेयां जो सारियां गल्लां च इज्जता सौगी सखाणा चाइदा।

⁵जे कोई अपणे परवारे जो ठीक ढंगे नैं चलाणा नीं जाणदा होयैं, तां परमात्मे दी कलीसिया दी रखवाल़ी किंआं करगा?

⁶भिरी एह़ कि सैह़ अगुआ नौआं बसुआसी नीं होणा चाइदी, क्जोकि सैह़ घमंडी होई सकदा ऐ कने सैह़ सैताने साइआं सज़ा पांगा।

⁷कने कलीसिया दे बाहरे आल़े लोकां च भी तिसदी इज्जत होणी चाइदी, तांजे सैह़ बेइज्जत होई नैं सैताने दे फंदे च नीं फंसी जां।

⁸तिंआं ई कलीसिया दे सेवक भी इज्जतदार कने ईमानदार होणे चाइदे, कने सैह़ पियक्कड़ कने नीच कमाईया दे लालची ना होन।

⁹अपर तिन्हां दी साफ अन्तर आत्मा होणी चाइदी, जिंआं सैह़ लगातार तिसा सच्चिया सिक्षा पर बसुआस करदे हन, जिसा जो परमात्मे प्रगट कित्या ऐ ।

¹⁰जाह़लू सेवकां जो चुणेया जांदा ऐ तां सैह़ पैहल्लैं परखे जान, कने जे बेकसूर निकल़न तां सेवक दा कम्म करन।

¹¹इन्हीं साह्भें सेवकां दियां लाड़ियां जो भी इज्जतदार होणा चाइदा। दोस लगाणे आल़िआं ना होन, अपर हर हालता च अपणे आप्पे जो काबू करणे आल़िआं कने सारियां गल्लां च बसुआसे जोग्गियां होन।

¹²सेवक इक्की लाड़िया दे लाड़े होन कने बाल बच्चेयां कने परवारे जो ठीक ढंगे नैं चलाणे आल़े होन।

¹³क्जोकि जेह्ड़े सेवक दा कम्म खरे कित्ते करदे हन, सैह़ लोकां ते इज्जत पांदे हन, इसदा नतीजा एह़ ऐ कि सैह़ यीशु मसीह च अपणे बसुआसे दे बारे च लोकां जो दिलेरिया नैं दस्सी सकदे हन।

¹⁴हलांकि मिन्जो आस ऐ कि मैं तौल़ी तिज्जो अल्ल ओंगा, अपर एह़ गल्लां तिज्जो इसतांई लिखा दा ऐ,

¹⁵कि जे मिन्जो ओणे च देर होई जां, तां तू जाणगा कि परमात्मे दे घराने च लोकां दा बर्ताब कदेया होणा चाइदा, जेह्ड़ा जिन्दे परमात्मे दी कलीसिया, खम्भा कने सच्चाईया दी नीई ऐ।

¹⁶कने इस च कोई शक नीं ऐ, कि अहां दे बसुआसे च बड़ा गैहरा भेत ऐ: मसीह जेह्ड़ा माणु बणी करी आया, कने पवित्र आत्मा दस्सेया कि सैह़ सच्च बिच्च परमात्मे दा पुत्तर था, सुअर्गदूतां तिसियो दिख्या, सारे संसारे दे लोकां च तिसदे बारे च प्रचार होएया, संसारे दे लोकां तिस पर बसुआस कित्ता, कने परमात्मे तिसियो सुअर्गे च लेई गेआ।