Read Kangri 1 तीमुथियुस 4 Bible Online

1 तीमुथियुस 4 - Kangri bible

1 तीमुथियुस 4

¹पवित्र आत्मा साफ तरीके नैं ग्लांदा ऐ, कि आखरी दिनां च कुच्छ लोक मसीह दिया सिक्षा पर बसुआस करणा छड्डी करी दुष्टआत्मां दियां सिक्षां पर बसुआस करगे, कने सैह़ तिन्हां भटकाणे आल़ी दुष्टआत्मां जो अपनांगे।

²जेह्ड़े लोक एह़ झूठी सिक्षा दिंदे हन, सैह़ झूठे हन, क्जोकि तिन्हां दी अन्तर आत्मा मरी चुकियो ऐ, जिंआं इक्क गरम लोहें तिसा जो जल़ाई दित्या ऐ।

³ऐदेय लोक एह़ सखांदे हन, कि ब्याह करणा कने कुच्छ चीज्जां जो खाणा गलत ऐ। अपर परमात्मे एह़ खाणा बसुआसी लोकां तांई बणाया ऐ, जेह्ड़े सच्ची सिक्षा जो जाणदे हन, कि परमात्मे दा धन्यावाद करी नैं खादी जां।

⁴क्जोकि परमात्मे दी बणाईयो हर इक्क चीज्ज खरी ऐ, कने अहां सब कुच्छ खाई सकदे हन; अपर एह़ कि परमात्मे दा धन्यावाद करी नैं खादी जां।

⁵क्जोकि एह़ सब कुच्छ परमात्मे दे वचने नैं कने प्रार्थना दे जरिये सुद्ध होई जांदा ऐ।

⁶जे तू बसुआसियां जो लगातार इन्हां गल्लां दी याद दिलांदा रैंह्गा, कने जिंआं बसुआस कने तिसा खरिया सिक्षा दियां गल्लां ते, जेह्ड़ियां तू मनदा आया ऐ, तेरा पालण पोसण करदा ऐ, तां तू यीशु मसीह दा खरा सेवक बणगा।

⁷अपर तिन्हां बेकार कने पूर्वजां दियां मनगढ़ंत काहणियां ते दूर रैह्, जिन्हां ते परमात्मे दी इज्जत नीं हुंदी, बल्कि अपणे आप्पे जो सारियां गल्लां च परमात्मे जो मन्नणा सीख।

⁸क्जोकि सरीरे दिया वरजिसा ते घट फायदा मिलदा ऐ, अपर आत्मिक वरजिस सारियां गल्लां तांई फायदेमंद ऐ, क्जोकि एह़ माणुये दे जिन्दे रैंह्दे भी कने मरने दे बाद भी मदत करदी ऐ।

⁹एह़ गल्ल सच्च ऐ कने हर तरीके नैं मन्नणे जोग्गी ऐ।

¹⁰अहां मेहनत कने कोसस इसतांई करदे हन कि अहां दी आस तिस जिन्दे परमात्मे पर ऐ, जेह्ड़ा सारे लोकां दा कने खास करी नैं बसुआसियां दा उद्धार करणे आल़ा ऐ।

¹¹बसुआसी लोकां जो इन्हां गल्लां दा हुक्म दे, कने सखांदा रैंह्।

¹²इस तरीके नैं बर्ताब कर कोई भी तेरी जुआनिया दिया बज़ाह ते तेरी बेइज्जती नीं करैं, अपर तिज्जो अपणे सब्दां च जेह्ड़ा तू ग्लांदा ऐ, अपणे चाल-चलण च, प्यारे च, मसीह दे बसुआस च, कने पवित्र ज़िन्दगिया च बसुआसी लोकां तांई खरा उदारण बण।

¹³जाह़लू तिकर मैं नीं औयें, ताह़लू तिकर वचन पढ़णे, सिक्षा दैणे कने सखाणे च लग्गी रैह्।

¹⁴सैह़ वरदान जेह्ड़ा भविष्यवाणी दे जरिये स्याणेयां दे हत्थ रखदे बग्त तिज्जो मिल्लेया था, तिसियो तिज्जो लगातार इस्तेमाल करणा चाइदा।

¹⁵इन्हां गल्लां च बफादार बणी करी ध्याने नैं करदा रैह् तांजे तेरी तरक्की सारे लोक दिक्खी सकन।

¹⁶इस बारे च चौकन्ना रैह् कि तू किंआं जीआ दा ऐ कने क्या सखा दा ऐ। इन्हां गल्लां जो लगातार करदा रैह्, क्जोकि जे इआं करदा रैंह्गा तां तू अपणा कने अपणे सुणने आल़ेआं दा भी उद्धार करगा।