Read Kangri 1 तीमुथियुस 5 Bible Online

1 तीमुथियुस 5 - Kangri bible

1 तीमुथियुस 5

¹कुसी भी बुढे माणुये जो मत झिड़क, अपर तिसियो अपणे बुढ़े साइआं समझी करी प्यारे नैं समझाई दे, कने जुआनां जो अपणे भाऊये साइआं समझी करी;

²बुढियां जणासां जो अपणिया माँऊ साइआं समझी करी; कने जुआन जणासां जो पूरी पवित्रता नैं बैह्णी साइआं समझी करी प्यारे नैं समझाई दे।

³तिन्हां बिधवां दी जिन्हां दी देखभाल करणे आल़ा कोई नीं ऐ, तिन्हां दी इज्जत करा।

⁴अपर जे कुसी बिधवा दे बच्चे या नाती पोते होन, तां सैह़ पैहल्लैं अपणे ई परवारे दे प्रति अपणी जिम्मेवारी नभाणा सीखें, जिंआं इक्क मसीह बसुआसी जो करणा चाइदा, कने एह़ करणे दे जरिये सैह़ अपणे माँऊ-बुढ़े कने दादा-दादी दे उपकारां जो चुकाई सकदा ऐ, क्जोकि इसते परमात्मा खुस हुंदा ऐ।

⁵तिसा बिधवा दी जिसादी देखभाल करणे आल़ा कोई नीं ऐ, सैह़ परमात्मे पर आस रखदी ऐ, कने मदत तांई रात दिन परमात्मे नैं विणती कने प्रार्थना च लग्गी रैंह्दी ऐ।

⁶अपर जेह्ड़ी बिधवा भोग बलासे तांई ज़िन्दगी जींदी ऐ, सैह़ मरेयो माणुये साइआं ऐ, हलांकि सैह़ बिधवा जिन्दा ऐ।

⁷इन्हां गल्लां दा भी बसुआसियां जो हुक्म देआ कर तांजे सैह़ बेकसूर रैह़न।

⁸अपर जे कोई अपणे रिस्तेदारां दा कने खास करी नैं अपणे परवारे दा ख्याल ना रखे, तां सैह़ बसुआसे ते मुकरी गेआ ऐ कने बेबसुआसिये ते भी बुरा बणी गेआ ऐ।

⁹बिधवां दिया सूचिया च तिसा बिधवा नां लिख्या जां जिसादी उम्र सठ साल ते ऊपर होयैं, कने जेह्ड़ी अपणे लाड़े दे प्रति बफादार रेई होयैं,

¹⁰कने खरेयां कम्मां करणे च तिसादा खरा नां होयैं, जिन्नै बच्चेयां दा पालण-पोसण कित्या होयैं, परोणेयां दी आदर-खातर कित्तियो होयैं, परमात्मे दे लोकां दी सेवा कित्तियो होयैं, दुखियां दी मदत कित्तियो होयैं, कने हर इक्की खरे कम्मे च मन लगाया होयैं।

¹¹अपर जुआन बिधवां दा नां सूचिया च मत लिखणा, क्जोकि जाह़लू तिन्हां दे सरीरे दी इच्छा परमात्मे दिया सेवा करणे दिया इच्छा ते जादा बधी जांदी ऐ, तां सैह़ मसीह दा बरोध करी नैं दुवारी ते ब्याह करणा चांह़दियां हन।

¹²कने इस तरीके नैं सैह़ दोसी बणदियां हन, क्जोकि तिन्हां अपणा पैहल्ला वादा तोड़ी दित्ता।

¹³कने इसदे अलावा तिन्हां जो घर-घर जाई नैं आलसी होणे दी आदत पेई जांदी ऐ, कने सिर्फ आलसी नीं, अपर बक-बक करदियां रैंह्दियां कने दूयेयां दे कम्मे च दखल अंदाजी करदियां हन कने बेकार दियां गल्लां ग्लांदियां हन, जेह्ड़ा तिन्हां जो ग्लाणा नीं चाइदा।

¹⁴इसतांई मैं सलाह दिंदा ऐ, कि जुआन बिधवां ब्याह करन; कने बच्चे जम्मन कने घरबार सम्भाल़न, कने कुसी भी दुश्मणे जो बदनाम करणे दा मौका ना दैन।

¹⁵क्जोकि कुच्छ जुआन बिधवां हन, जेह्ड़ियां बसुआसे ते भटकी करी सैताने दे पचांह़ चली पेईआं हन।

¹⁶जे कुसी बसुआसणी दे परवारे च बिधवां होन, तां सैई तिन्हां दी मदत करैं तांजे सैह़ कलीसिया पर बोझ ना बणन, कि कलीसिया दे लोक तिन्हां दी मदत करी सकन, जिन्हां दी देखभाल करणे आल़ा कोई नीं ऐ।

¹⁷जेह्ड़े स्याणे कलीसिया दे कम्मां जो ठीक ढंगे नैं करदे हन, खास करी नैं सैह़ जेह्ड़े वचन सणाणे कने सखाणे च मेहनत करदे हन, सैह़ दो गुणा आदर करणे जोग्गे समझे जान।

¹⁸क्जोकि पवित्रशास्त्रे च लिख्या ऐ, “गाणी गांदे बग्त दांदे दा मुँ नीं बन्नणा,” कने दूईआ जगाह च पवित्रशास्त्रे च एह़ भी लिख्या ऐ, “मजदूर अपणी मजदूरिया दा हक्कदार ऐ।”

¹⁹कलीसिया दे कुसी भी स्याणे दे खलाफ दूँ या त्रीं गवाहां दे बगैर कुसी भी अपराधे जो मत मन्ना।

²⁰पाप करणे आल़ेआं जो सारेयां सामणै झिड़क, तांजे होर लोक भी डरन।

²¹परमात्मा, कने यीशु मसीह कने चुणेयां सुअर्गदूतां जो सामणै समझी करी मैं तिज्जो हुक्म दिंदा ऐ कि तू बिना भेदभाव ते इन्हां गल्लां जो मन्ना कर, कोई भी कम्म भेदभाव करी नैं मत कर।

²²कुसी पर बड़ी तौल़ी हत्थ रखी करी अगुऐ मत बणांदा, कने जे तू एह़ करदा ऐ तां तू दूयेयां दे पापां दा साझीदार हुंगा; अपणे आप्पे जो पवित्र बणाई रख।

²³भविष्य च सिर्फ पाणी ई पीणे आल़ा ना रैह्, अपर अपणे पेटे दी खराबी कने बार-बार बमार होणे दिया बज़ाह ते थोड़ी-थोड़ी अंगूरी मदिरा भी इस्तेमाल कर।

²⁴मैं तिज्जो कुसी जो भी तौल़ी अगुऐ दे रूपे च चुणने तांई इसतांई नीं ग्ला दा ऐ, क्जोकि कुच्छ लोक खुल्लेआम पाप करदे हन। सैह़ तिन्हां दे न्याय होणे ते पैहल्ले ई बसुआसियां सामणै साफ तौर पर अपराधी हन, अपर कुच्छ लोकां दा पाप तां बादे च ई दुस्सदा ऐ।

²⁵इसी तरीके नैं कुच्छ लोकां दे खरे कम्म साफ तौर पर दुस्सदे हन; कने जेह्ड़े साफ तौर पर दुस्सदे भी नीं, सैह़ छुपी नीं सकदे।