Read Kangri 1 तीमुथियुस 6 Bible Online

1 तीमुथियुस 6 - Kangri bible

1 तीमुथियुस 6

¹जितणे बसुआसी लोक दास हन, कने तिन्हां जो अपणे-अपणे मालके दियां हर गल्लां च इज्जत दैणी चाइदी, तांजे दूये लोक परमात्मे दी कने अहां दिया सिक्षा दी निंदा नीं करगे।

²जिन्हां दे मालक बसुआसी हन तिन्हां जो बसुआसी होणे दे नाते घटिया ना समझन, बल्कि सैह़ तिन्हां भी ठीक ढंगे नैं सेवा करन, क्जोकि इसते फायदा लैणे आल़े बसुआसी कने प्रेमी हन। इन्हां गल्लां दी सिक्षा कने पालण करणे तांई लोकां जो हौंसला देआ कर।

³जे कोई झूठी सिक्षा दिंदा ऐ कने अहां दे प्रभु यीशु मसीह दे खरे संदेस, यानकि परमात्मे दी भक्ति दिया सिक्षा ते सेहमत नीं हुंदा,

⁴तां सैह़ घमंडी होई गेआ ऐ, कने सैह़ कुच्छ भी नीं जाणदा। ऐदेय माणु बैंह्सबाजी कने बेकार दियां गल्लां कने सब्दां दे बारे च झगड़ा करणा चांह़दे हन, जिसदा नतीजा जल़ण, झगड़े, निंदा दी गल्लां कने बुरे-बुरे शक,

⁵कने इक्की दूये सौगी नीं मुकणे आल़े झगड़े, जिन्हां दी अक्ल भरष्ठ होई गेई ऐ, कने सैह़ सच्चाईया जो नीं समझी सकदे हन, कने समझदे हन कि परमात्मे दी सेवा करणा ई अमीर होणे दा जरिया ऐ।

⁶अपर ऐई सेवा अहां तांई खरी ऐ, कि अहां सैई करन, जेह्ड़ा परमात्मे जो खुस करदा ऐ कने परमात्मा अहां जो जेह्ड़ा कुच्छ दिंदा ऐ, तिस च अहां खुस रैह़न।

⁷क्जोकि जाह़लू अहां पैदा होएयो थे, ताह़लू अहां इस संसारे च कुच्छ लेई करी नीं आएयो थे कने ना कुच्छ अहां इस संसारे ते मरने ते बाद लेई जाई सकदे हन।

⁸जे अहां अल्ल खाणे तांई रोटी कने पैहनणे तांई कपड़े होन, तां इन्हीं पर खुस रैहणा चाइदा।

⁹अपर जेह्ड़े लोक अमीर होणा चांह़दे हन, सैह़ ऐदई परीक्षा कने फंदे कने बड़ियां नकसान करणे आल़िआं इच्छां च जानवरां साइआं फंसदे हन, जेह्ड़ियां माणुआं जो बिगाड़ी कने पूरे तरीके नैं नास करी दिंदियां हन।

¹⁰क्जोकि धन-दौलता दा लालच सारियां बुराईआं दी जड़ ऐ, जिसा जो पाणे तांई कोसस करदे-करदे कुच्छ लोक बसुआसे ते भटकी नैं अपणे आप्पे जो हर किस्मां दे दुखां च पाई दित्या ऐ।

¹¹अपर हे परमात्मे दे जण तीमुथियुस, तू इन्हां गल्लां ते दूर होई जा, कने सच्चाई, परमात्मे दी भक्ति, मसीह पर बसुआस, लोकां नैं प्यार कने सबर कने नम्रता दा पीछा कर।

¹²जिंआं इक्क खरा सपाई लड़ाईया च लड़ाई करणा कदी नीं छड्डदा, तिंआं ई तिज्जो भी परमात्मे पर बसुआस करणा कने तिसदे पचांह़ चलणा कदी नीं छड्डणा चाइदा। तांजे तू अपणे इनामे दे रूपे च सदा दी ज़िन्दगिया जो पाई सकैं, जिस तांई तू सद्देया गेआ, जाह़लू तैं मते लोकां सामणै साफ-साफ ग्लाया था, कि तू मसीह पर बसुआस करदा ऐ।

¹³परमात्मे जो गवाह मन्नी करी जेह्ड़ा सबना जो ज़िन्दगी दिंदा ऐ, कने यीशु मसीह जो भी गवाह मन्नी करी, जिन्हीं पुन्तियुस पिलातुसे दे सामणै अपणे बारे च सच्च ग्लाया था, मैं तिज्जो हुक्म दिंदा ऐ।

¹⁴कि तू अहां दे प्रभु यीशु मसीह दे दुवारी ओणे तिकर सैह़ सब कुच्छ कर, जिसियो पूरी तरीके नैं करणे तांई परमात्मे तिज्जो हुक्म दित्या ऐ, तांजे कोई भी तेरी निंदा नीं करी सकैं कि तू गलत करा दा ऐ,

¹⁵मसीह परमात्मे दे नियुक्त कित्यो बग्ते पर ओंगा, परमात्मा जेह्ड़ा परमधन्य कने इकमात्र अधिपति कने राजेयां दा राजा कने प्रभुआं दा प्रभु ऐ,

¹⁶कने सिर्फ सैई ऐ, जेह्ड़ा हमेसा जिन्दा रैंह्दा ऐ, कने सैह़ बड़ी तेज जोत्ती च रैंह्दा ऐ, कि कोई तिसदे नेड़े नीं जाई सकदा, कने ना तिसियो कुणी माणुये दिख्या कने ना कदी दिक्खी सकदा ऐ। तिसदी महिमा कने सामर्थ हमेसा तांई रैंह्गी। आमीन।

¹⁷इस संसारे दे अमीरां माणुआं जो हुक्म दे कि सैह़ घमंडी ना होन कने सैह़ धन-दौलता पर आस ना रखन, जेह्ड़ी कुच्छ बग्ते तांई ऐ, अपर सैह़ परमात्मे पर आस रखन, जेह्ड़ा अहां दे सुखे तांई सब कुच्छ इमानदारिया नैं अहां जो दिंदा ऐ।

¹⁸तिन्हां जो खरे कम्म करणे तांई हुक्म दे, तांजे खरे कम्मां च अमीर बणन, कने दान दैणे कने दूयेयां दी मदत करणे जो हमेसा त्यार रैह़न,

¹⁹इस तरीके नैं सैह़ अपणे खरे कम्मां जो अप्पु तांई धन-दौलता साइआं किठ्ठा करगे जेह्ड़ी सुअर्गे च तिन्हां दे भविष्य तांई इक्क मजबूत नीआं साइआं हुंगी, तांजे सैह़ सच्ची ज़िन्दगी पाई सकन।

²⁰हे तीमुथियुस, तू एह़ निस्चा कर जेह्ड़ा परमात्मे तिज्जो दित्या ऐ कि तू सैई करदा ऐ। कने तिन्हां लोकां दी मत सुणदा जेह्ड़े हमेसा मूर्ख गल्लां करदे हन, जिन्हां नैं परमात्मे दी इज्जत नीं हुंदी ऐ कने बेकार च बैंह्स करदे हन, कने सैह़ ग्लांदे हन, कि एह़ ज्ञान ऐ, अपर सच्च बिच्च एह़ नीं ऐ।

²¹क्जोकि कुच्छ लोक इस ज्ञाने जो पाई करी बसुआसे ते भटकी गियो हन। तुहां सबना पर अनुग्रह हुंदा रैंह्।