Read Kangri 2 तीमुथियुस 1 Bible Online

2 तीमुथियुस 1 - Kangri bible

2 तीमुथियुस 1

¹मैं पौलुस जेह्ड़ा परमात्मे दी इच्छा ते यीशु मसीह दा प्रेरित ऐ; कने तिसा सदा दी ज़िन्दगिया दे वादे मताबक जेह्ड़ी यीशु मसीह पर बसुआस करणे दे जरिये मिलदी ऐ।

²मैं तुहां जो एह़ चिठ्ठी तीमुथियुसे दे नांऐ पर लिखा दा ऐ, जेह्ड़ा मिन्जो तांई मेरे जागते साइआं ऐ। मैं प्रार्थना करदा ऐ, कि अहां दे पिता परमात्मे कने प्रभु यीशु मसीह दे पास्से ते तिज्जो अनुग्रह कने दया कने सांति मिलदी रैंह्।

³मैं रात-दिन अपणिया प्रार्थना च तुहां जो याद करी नैं परमात्मे जो धन्यावाद दिंदा ऐ, जिसदी सेवा मैं साफ अन्तर आत्मा नैं तिंआं ई करदा ऐ, जिंआं मेरे पूर्वज करदे थे।

⁴कने जाह़लू अहां दोयो अप्पु च लग्ग होएयो थे, तां हुण मैं तेरे तिस रोणे जो याद करी नैं रात-दिन तिज्जो नैं मिलणे दी इच्छा रखदा ऐ, कि मैं खुसिया नैं भरोई जां।

⁵मैं तेरिया माँऊ यूनीके दे तिस सच्चे बसुआसे जो भी याद करदा ऐ। कने तेरिया नानिया लोईसा दा बसुआस भी सैदेया था, मैं इसा गल्ला च पक्का ऐ कि सैई बसुआस तिज्जो च भी ऐ।

⁶इसा बज़ाह ते मैं तिज्जो याद करांदा ऐ कि परमात्मे दे तिस वरदाने जो भिरी ते इस्तेमाल कर, जेह्ड़ा तिज्जो मेरे हत्थ रखणे पर मिल्लेया था।

⁷क्जोकि परमात्मैं अहां जो डरफोक नीं बणाया, तिसदी आत्मा अहां दे मनां जो मजबूत करदी ऐ, कने इक्की दूये नैं प्यार करणे तांई कने हर हालता च अपणे आप्पे जो काबू च रखणे तांई मदत करदी ऐ।

⁸इसा बज़ाह ते तू दूये लोकां जो अहां दे प्रभु यीशु मसीह दे बारे च दस्सणे ते मत सर्मा, कने ना ई मेरिया बज़ाह ते जेह्ड़ा तिस सुसमाचारे दिया सेवा तांई जेला च ऐ। अपर तुहां जो परमात्मे दिया तिसा सामर्थी दा इस्तेमाल करणा चाइदा ऐ, जेह्ड़ी सैह़ तुहां जो दिंदा ऐ कने तुहां जो मिन्जो सौगी तिन्हां दुखां च सामिल होई जाणा चाइदा, जेह्ड़े मैं सुसमाचारे दिया बज़ाह ते झेला दा ऐ।

⁹जिन्हीं अहां दा उद्धार कित्ता कने पवित्र ज़िन्दगी जीणे तांई अहां जो सद्देया। अहां दे खरेया कम्मां दिया बज़ाह ते तिन्हीं अहां जो नीं सद्देया, अपर अपणे मकसदे कने तिस अनुग्रह मताबक सद्देया ऐ, जिसदी योजना परमात्मे पैहल्ले ते ई यीशु मसीह जो इस संसारे च घल्लणे दे जरिये बणाईयो थी,

¹⁰अपर हुण अहां दा उद्धारकर्ता यीशु मसीह आई रेह्आ ऐ, कने तिन्हीं अहां पर अपणा अनुग्रह कित्या ऐ, जिन्हीं इक्क तां मौत्ती दिया ताकता जो हराई दित्ता कने दूआ सुसमाचारे दे जरिये अहां जो सदा दी ज़िन्दगिया दा रस्ता दस्सेया ऐ।

¹¹परमात्मे मिन्जो इस सुसमाचारे दा प्रचार करणे कने प्रेरित बणने तांई कने होरनी जातिआं दे लोकां जो सिक्षा दैणे तांई चुणेया ऐ।

¹²इस सुसमाचारे दिया बज़ाह ते मैं ऐत्थु जेला च भी इन्हां दुखां जो झेला दा ऐ, अपर भिरी भी सर्मांदा नीं, क्जोकि मैं मसीह जो जाणदा ऐ; जिस पर मैं बसुआस कित्या ऐ, कने मिन्जो पक्का पता ऐ कि ताह़लू तिकर सैह़ मेरे इस सुसमाचारे दी रखवाल़ी करी सकदा ऐ, जाह़लू तिकर सैह़ बापस नीं ओंदा।

¹³भरोसा रख कि जेह्ड़ी सच्ची सिक्षा तैं मिन्जो ते सुणी ऐ, सैह़ तिज्जो तांई उदारणे साइआं ऐ। तिसा जो बसुआसे कने प्यारे सौगी कर, क्जोकि जेह्ड़ा तू यीशु मसीह च इक्क ऐ।

¹⁴कने पवित्र आत्मा दे जरिये जेह्ड़ा अहां च बसदा ऐ, इस सुसमाचारे दी रखवाल़ी कर।

¹⁵तू जाणदा ऐ, कि आसिया प्रदेसे दे सारे बसुआसी लोकां मिन्जो छड्डी दित्या ऐ, जिन्हां च फूगिलुस कने हिरमुगिनेस हन।

¹⁶उनेसिफुरूसे दे परवारे पर प्रभु दया करैं, क्जोकि तिन्हीं मिन्जो अल्ल आई नैं मती बरी मेरी मदत कित्ती, कने सैह़ ऐत्थु जेला च मिन्जो नैं मिल्ली करी सर्मिंदा नीं होएया।

¹⁷अपर जाह़लू सैह़ रोम सैहरे च आया, तां तिन्हीं बड़ी कोसस करी नैं मिन्जो तोपेया, कने मिन्जो नैं मिल्लेया।

¹⁸मैं विणती करदा ऐ, कि जाह़लू प्रभु बापस ओंगा, तां प्रभु तिस पर दया करैं कने तू अप्पु ई खरे कित्ते जाणदा ऐ, कि जाह़लू मैं इफिसुस सैहरे च था। तां तिन्हीं मेरी कितणी मदत कित्ती।