Read Kangri 2 तीमुथियुस 2 Bible Online

2 तीमुथियुस 2 - Kangri bible

2 तीमुथियुस 2

¹इसतांई हे मेरे पुत्तर तीमुथियुस, तू तिस अनुग्रह च जेह्ड़ा यीशु मसीह दिंदा ऐ, मजबूत होई जा,

²कने तैं यीशु मसीह दे बारे च जेह्ड़ियां सिक्षां मतेआं लोकां सामणै मिन्जो ते सुणियां हन। तां हुण मैं एह़ चांह़दा ऐ, कि सैई सिक्षां तिन्हां बसुआसी लोकां जो भी सखा, जिन्हां पर तू भरोसा रखदा ऐ; तांजे सैह़ बसुआसी भी तिन्हां सिक्षां जो दूयेयां लोकां जो सखाणे जोग्गे बणी जान।

³यीशु मसीह दे खरे सपाईये साइआं मिन्जो सौगी दुखां जो झेल।

⁴इक्क सपाई अपणे कम्मे जो छड्डी करी होर कोई कम्म नीं करदा, क्जोकि सैह़ अपणे बड्डे अफसरे जो खुस करणा चांह़दा ऐ, कने अपणे आप्पे जो संसारे दे कम्मां च नीं फसांदा।

⁵जाह़लू पिड़े च लड़णे आल़ा पैहलवाण भी जे नियमां मताबक नीं लड़दा ऐ तां तिस जो माली नीं मिलदी।

⁶जेह्ड़ा किसान मेहनत करदा ऐ, फसला दे पैहल्ले हिस्से पर तिसदा हक्क हुंदा ऐ।

⁷इन्हां उदारणा दे बारे च जरा सोचा कि एह़ क्या सखांदे हन, कने प्रभु इन्हां जो समझणे तांई तुहां दी मदत करगा।

⁸यीशु मसीह जो लगातार याद रखा, जेह्ड़ा राजा दाऊदे दे वंशे ते पैदा होएया, कने परमात्मे तिसियो मरेयां ते जिन्दा कित्ता, कने ऐई सुसमाचार ऐ, जेह्ड़ा मैं लोकां जो सणांदा ऐ।

⁹क्जोकि इस सुसमाचारे जो सणाणे दिया बज़ाह मैं इक्क अपराधियै साइआं दुख झेलदा ऐ, ऐत्थु तिकर कि जेला च बंद भी ऐ, फिरी भी परमात्मे दे वचने जो फैलणे ते कोई नीं रोकी सकदा ऐ।

¹⁰ऐई बज़ाह ऐ, कि मैं तिन्हां लोकां दे फायदे तांई दुख झेला दा ऐ जिन्हां जो परमात्मे चुणेया ऐ, तांजे सैह़ भी प्रभु यीशु मसीह पर बसुआस करन, कने उद्धार कने तिसा महिमा जो हासल करन जेह्ड़ी सदा तांई ऐ।

¹¹एह़ गल्ल सच्च ऐ, कि जे अहां मसीह सौगी मरी गियो हन, तां तिस सौगी जिन्दे भी हुंगे;

¹²जे अहां सबर रखी नैं तिस तांई दुख झेलदे रैह़न, तां तिस सौगी अहां राजेयां साइआं राज्ज भी करगे, जे अहां ग्लांदे हन कि अहां प्रभु जो नीं जाणदे, तां प्रभु भी ग्लांगा कि मैं तुहां जो नीं जाणदा,

¹³ऐत्थु तिकर कि जे अहां मसीह तांई बसुआसे जोग्गे नीं भी होन, तमी सैह़ अहां तांई बसुआसे जोग्गा बणी रैंह्दा ऐ, क्जोकि सैह़ हमेसा अपणे सभावे मताबक ई कम्म करदा ऐ।

¹⁴जेह्ड़ियां गल्लां मैं तिज्जो दस्सियां हन, तिन्हां जो अपणे लोकां जो भुलणा मत दिंदा, कने प्रभु दी मौजूदगिया च जेह्ड़ा इक्क गवाह ऐ। तिज्जो तिन्हां जो चतौणी दैणी चाइदी, कि सब्दां दे मतलबां जो लेई करी बैंह्सबाजी नीं करणी चाइदी, जिसा जो करणे ते कुच्छ फायदा नीं हुंदा, अपर सुणने आल़े लोकां तांई बड़ा बड्डा नकसान ई हुंदा ऐ।

¹⁵सच्चाईया दे वचने जो ठीक ढंगे नैं इस्तेमाल करदे होये परमात्मे दे ग्रहण करणे जोग्गे सेवक बणने दी पूरी कोसस करा, जिसियो सर्मिंदा ना होणा पोयैं।

¹⁶संसारिक कने बेकार दियां गल्लां ते दूर रेह्आ, क्जोकि जेह्ड़े लोक इन्हां गल्लां च सामिल हुंदे हन, सैह़ परमात्मे ते होर भी दूर होई जांदे हन।

¹⁷कने ऐदिआं गल्लां सड़ेयो फोड़े साइआं फैलदियां हन, कने लोकां दे बसुआसे जो तोड़दियां हन, जेह्ड़े तिन्हां जो सुणदे हन। हुमिनयुस कने फिलेतुस तिन्हां ते ई हन।

¹⁸तिन्हां सच्चाईया पर बसुआस करणा छड्डी दित्या ऐ, सैह़ एह़ ग्लांदे हन, कि परमात्मे मरेयां बसुआसियां जो सदा दी ज़िन्दगिया तांई पैहल्ले ते ई जिन्दा करी दित्या ऐ। जिसदा नतीजा एह़ ऐ कि सैह़ कुच्छ बसुआसियां जो मसीह दिया सिक्षा जो नीं करणे तांई मनांदे हन।

¹⁹तमी परमात्मे दे लोकां दा बसुआस पक्किया नीआ साइआं मजबूत बणी रैंह्दा ऐ, कने तिसा नीआ पर एह़ सब्द लखुयो हन, “प्रभु जाणदा ऐ कि तिसदे अपणे लोक कुण हन,” कने एह़ भी “जेह्ड़ा प्रभु दी अराधना करदा ऐ, तिसियो बुरे कम्म करणा छड्डी दैणे चाइदे।”

²⁰बड्डेयां घरां च ना सिर्फ सोन्ने चाँदी दे, अपर लकड़िया कने चिक्का दे भांडे भी हुंदे हन; कुच्छ भांडे खास मकसदे तांई कने कुच्छ भांडे आम मकसदे तांई इस्तेमाल हुंदे हन।

²¹तिंआं ई जे कोई बसुआसी अपणे आप्पे जो इन्हां बुरिआं चीज्जां ते लग्ग करगा, तां सैह़ तिस भांडे साइआं हुंगा, जिसियो खास मकसदे तांई इस्तेमाल करदे हन, जे तिसदी ज़िन्दगी पवित्र हुंगी, तां तिसदा मालक तिसियो खरे कम्मे तांई इस्तेमाल करगा।

²²तिन्हां बुरिआं चीज्जां ते अप्पु जो दूर रख, जिन्हां जो जुआन माणु करणा चांह़दे हन, कने जेह्ड़े लोक साफ मने नैं प्रभु दी अराधना करदे हन, तिन्हां सौगी-सौगी सच्चाईया नैं, बसुआस नैं, कने प्यार नैं भी मेल-जोल बणाई नैं रख।

²³अपर बेअक्ली कने उटपटांग दी बैंह्सबाजी ते दूर रैह्, क्जोकि तू जाणदा ऐ कि इन्हां ते झगड़े पैदा हुंदे हन।

²⁴प्रभु दे दासे जो झगड़ालू नीं होणा चाइदा। अपर सैह़ सबना सौगी सरीफिया नैं कने परमात्मे दे वचने जो खरे तरीके नैं सखाणे आल़ा कने सबर रखणे आल़ा होणा चाइदा।

²⁵कने जेह्ड़े तिसदा बरोध करदे हन, तिन्हां जो तिसियो बड़ी सरीफिया नैं समझाणा चाइदा, होई सकदा ऐ सायद परमात्मा तिन्हां जो सच्चाईया जो जाणने दा कने तिस पास्से फिरणे दा मौका दैं,

²⁶कने एह़ लोक दुवारी भिरी खरे कित्ते सोचणे काबल होई जांगे, कने सैताने जो मन्नणे ते कने तिसदिया चलाकिया ते जेह्ड़ी इक्क फंदे साइआं ऐ, छुटी जांगे।