Read Kangri 2 तीमुथियुस 4 Bible Online

2 तीमुथियुस 4 - Kangri bible

2 तीमुथियुस 4

¹जाह़लू प्रभु यीशु मसीह राजे साइआं राज्ज करणे ओंगा, तां सैह़ जिन्दे कने मरेयां दा न्याय करदा ऐ। मैं परमात्मे सौगी कने मसीह जो गवाह मन्नी करी तुहां नैं विणती करदा ऐ,

²कि तू परमात्मे दे वचने दा प्रचार कर। बग्तें बेबग्तें त्यार रैह्। तुहां जो लोकां जो एह़ दस्सणा चाइदा कि तिन्हां क्या गलत कित्या ऐ, कने तिन्हां जो तिन्हां दे पापां तांई झिड़क। अपर तुहां तिन्हां जो हिम्मत भी देआ, जिंआं तुहां तिन्हां जो सेहनसक्ति रखी नैं सखांदे हन।

³क्जोकि ऐदेया बग्त भी औणां, कि जाह़लू लोक खरी सिक्षा जो झेली नीं सकगे, अपर जेह्ड़ा तिन्हां जो सुणना खरा लगगा, तिसदे मताबक सैह़ अपणे तांई मते सारे गुरू कठ्ठेरी लैंगे।

⁴कने सैह़ अपणे कन्नां जो सच्चाईया दे पास्से ते फेरी करी बनावटी कने पूर्वजां दियां मनगढ़ंत काहणियां पर मन लगांगे।

⁵अपर तू सारियां गल्लां ते चौकन्ना रैह्, कने दुख झेल, सुसमाचार सणाणे दा कम्म कर, कने अपणिया सेवा जो पूरा कर।

⁶मैं तुहां जो एह़ हुक्म इसतांई दिंदा ऐ, कि मेरी ज़िन्दगी कने मेरा परमात्मे तांई कम्म खत्म होणे आल़ा ऐ क्जोकि मैं जाणदा कि मैं तौल़ी ई मरी जांगा।

⁷मैं मसीह दी सेवा तांई बड़ी मेहनत कित्ती ऐ, कने अपणिया दौड़ा जो पूरी करी लेआ ऐ, कने मैं आखरी तिकर बसुआसे च पक्का रेह्आ ऐ।

⁸प्रभु मिन्जो इक्क मुकट दिंगा, जेह्ड़ा धार्मिकता दा मुकट ऐ। सैह़ सच्चा न्याय करणे आल़ा अपणे बापस ओणे आल़े दिन च मिन्जो तिस इनामे जो दिंगा। सैह़ मिन्जो नीं अपर तिन्हां सबना जो भी जेह्ड़े तिसदे बापस ओणे दे इन्तजारे च हन।

⁹मिन्जो अल्ल तौल़ी ओणे दी कोसस कर।

¹⁰क्जोकि देमासें इस संसारे दियां चीज्जां जो प्यारा समझी करी मिन्जो छड्डी दित्ता ऐ, कने थिस्सलुनीक सैहरे जो चली गेआ। कने क्रेसकेंस गलातिया प्रदेसे जो कने तीतुस दलमतिया प्रदेसे जो चली गेआ ऐ।

¹¹सिर्फ लूका मिन्जो सौगी ऐ। तू ओंदे बग्त मरकुसे जो भी अपणे सौगी लेई करी औयेयां; क्जोकि सेवा तांई सैह़ मेरे बड़े कम्मे दा ऐ।

¹²तुखिकुसे जो मैंई इफिसुस सैहरे जो घल्लेया ऐ।

¹³जेह्ड़ा कोट मैं त्रोआस सैहरे च करपुसे दे घरे च छड्डी आया था, जाह़लू तू ओंगा तां तिस कोटे, कताबा कने खास करी नैं चमड़े दे लिख्यो कागजां जो भी लैंदा औयेयां।

¹⁴सिकन्दर ठठैरें मिन्जो नैं बड़ा बुरा कित्ता; प्रभु तिसदे बुरे कम्मां दे मताबक बदला दिंगा।

¹⁵तूमी तिसते बची करी रेह्आं, क्जोकि तिन्हीं भी अहां दे मसीह दिया सिक्षा दा बड़ा बरोध कित्या ऐ।

¹⁶मेरी पैहल्ली सुणवाईया दे बग्त कोई भी मिन्जो सौगी नीं था, अपर सारेयां मिन्जो छड्डी दित्या था। इसतांई तिन्हां जो अपराधी नीं मन्नेया जां।

¹⁷अपर प्रभु मिन्जो सौगी रेह्आ, कने मिन्जो सामर्थ दित्ती, तांजे मेरे जरिये पूरा-पूरा प्रचार होयैं, कने सारे होरनी जातिआं दे लोक भी सुणी लैंन, क्जोकि तिन्हीं मिन्जो मौत्ती दे मुँऐ ते बचाया ऐ।

¹⁸कने प्रभु मिन्जो हर इक्क बुरे कम्मां ते छड्डांदा ऐ, कने अपणे सुअर्गीय राज्जे च मिन्जो सम्भाल़ी नैं पज्जांगा। तिसदी महिमा जुगा-जुग हुंदी रैंह्। आमीन।

¹⁹प्रिसका कने तिसादे लाड़े अक्विला जो कने उनेसिफुरूस दे परवारे जो मेरे पास्से ते नमस्कार।

²⁰इरास्तुस कुरिन्थुस सैहरे च रेई गेआ, कने त्रुफिमुसे जो मैं मीलेतुस सैहरे च छड्डी आया ऐ, क्जोकि सैह़ बमार था।

²¹स्याल़े ते पैहल्लैं बापस ओणे दी कोसस कर। यूबूलुसे, कने पूदेंसे, कने लीनुसे कने क्लौदिया, कने सारे बसुआसी भाऊआं दा तिज्जो नमस्कार।

²²मैं प्रार्थना करदा ऐ, कि प्रभु तिज्जो सौगी रैंह्। कने तिसदा अनुग्रह भी तिज्जो पर हुंदा रैंह्।