Read Kangri तीतुस 2 Bible Online

तीतुस 2 - Kangri bible

तीतुस 2

¹अपर तीतुस तिज्जो तांई एह़ जरूरी ऐ कि तू बसुआसियां जो यीशु मसीह दे बारे च सिर्फ सैई सिक्षां दे, जेह्ड़ियां सच्चियां हन।

²स्याणे माणुआं जो अपणे आप्पे पर काबू रखणा, इज्जतदार बणना, कने अक्लमंदिया नैं जीणा सखा। तिन्हां अल्ल मजबूत बसुआस, प्यार कने सबर होणा चाइदा।

³तिंआं ई स्याणियां जणासा जो भी जीणा चाइदा, जिसते परमात्मे जो इज्जत मिल्लैं। सैह़ दोस लगाणे आल़ी कने पियक्कड़ नीं होणी चाइदी, अपर खरियां गल्लां जो सखाणे आल़ी होणी चाइदी।

⁴तांजे सैह़ जुआन जणासां तांई उदारण बणी सकैं, कने एह़ भी सखाई सकैं कि तिन्हां जो अपणे लाड़ेयां कने बच्चेयां सौगी किंआं प्यार करणा चाइदा।

⁵जुआन जणांस अपणे आप्पे जो काबू रखणे आल़ी, कने अपणे लाड़े सौगी बफादार रैंह्, कने घरे दा कम्म-काज्ज करणे आल़ी, खरी कने अपणे लाड़े दे अधीन रैहणे आल़ी होयैं। तांजे परमात्मे दे वचने दी निंदा नीं होयैं।

⁶इस तरीके नैं जुआन मर्दां जो भी समझांदे रेह्आ कि सैह़ भी अपणे आप्पे पर काबू करणे आल़े होन।

⁷तुहां जो हमेसा खरे कम्म करणा चाइदा, तांजे तुहां दूयेयां लोकां तांई उदारण बणन। जाह़लू तुहां बसुआसियां जो सखांदे हन, तां तुहां जो खरे इरादे सौगी सखाणा चाइदा, जिसते लोक तुहां दी इज्जत करन।

⁸कने तुहां जो सैह़ सखाणा चाइदा, जेह्ड़ा सच्च ऐ तांजे कोई भी तुहां पर दोस नीं लगाई सकैं, जिसते तुहां दे दुश्मणा दी बेइज्जती होयैं। क्जोकि तिसा सिक्षा च कोई बुरी गल्ल नीं, जिसते कि सैह़ तुहां दे खलाफ कुच्छ ग्लाई सकन।

⁹दासां जो समझा कि अपणे-अपणे मालके दे अधीन रैह़न, कने सारियां गल्लां च तिन्हां जो खुस रखन कने टाई नैं जवाब नीं दैन।

¹⁰चोरी चलाकी नीं करन, अपर हर तरीके नैं पूरे ईमानदार निकल़न, कि सैह़ सारियां गल्लां च अहां दे उद्धार करणे आल़े परमात्मे दी सिक्षा च सोभा बधान।

¹¹तिन्हां बसुआसियां जो इआं ई सखा, क्जोकि परमात्मे अपणा अनुग्रह सारे लोकां जो तिन्हां दे पापां ते बचाणे तांई प्रगट कित्ता ऐ।

¹²इस अनुग्रह दे जरिये परमात्मा अहां जो चतौणी दिंदा ऐ, कि अहां तिस सभावे जो छड्डणा सीखन, जेह्ड़ा परमात्मे दी बेइज्जती करदा ऐ, कने अहां जो सारियां संसारिक चीज्जां दियां इच्छां जो भी छड्डणा चाइदा। अपर इसदिया जगाह इस बग्ते च अहां जो सबर कने पवित्र ज़िन्दगी जीणी चाइदी, जेह्ड़ी साबित करैं कि अहां परमात्मे दी इज्जत करदे हन।

¹³कने तिसा खरिया आसा दा मतलब अपणे म्हान परमात्मे कने उद्धार करणे आल़े यीशु मसीह दी महिमा दे प्रगट होणे दा इन्तजार करदे रैह़न।

¹⁴जेह्ड़ा अप्पु अहां तांई सूल़िया पर चढ़ी गिया, कि अहां जो हर किस्मा दिया बुराईया ते छड्डाई लैं, कने पापां ते सुद्ध करी नैं अप्पु तांई इक्क ऐदई प्रजा बणां जेह्ड़ी खरे कम्मां तांई पूरे जोशे नैं हमेसा त्यार रैंह्।

¹⁵इसतांई तीतुस तू पूरे हक्के नैं क्रेते दे बसुआसियां जो इन्हां गल्लां जो ग्ला, कने समझा कने सखांदा रैह्। इआं करणे दा मेरे पास्से ते पूरा हक्क ऐ, कोई भी तिज्जो नजर अंदाज नीं करैं।