Read Kangri तीतुस 3 Bible Online

तीतुस 3 - Kangri bible

तीतुस 3

¹बसुआसी लोकां जो याद करांदा रैह् कि हाकमां कने अधिकारियां दे अधीन रैह़न, कने तिन्हां दे हुक्म मनन, कने हर इक्क खरे कम्मे तांई त्यार रैह़न।

²कुसी जो भी बदनाम मत करा, झगड़ालू मत बणा; अपर दूये लोकां पर दया करा, कने सारे लोकां सौगी बड़े नरम सभावे नैं रेह्आ।

³क्जोकि अहां भी पैहल्ले मूर्ख, कने परमात्मे दे हुक्म जो नीं मन्नणे आल़े, कने लोकां ते धोखा खाणे आल़े, कने बुरी इच्छां च, संसारिक चीज्जां दिया गुलामिया च पैयो थे, बैरभाव, जल़ण करणे च ज़िन्दगी जींदे थे, लोकां नैं नफरत करदे थे कने इक्की दूये नैं बैर रखदे थे।

⁴अपर फिरी भी अहां दे उद्धार करणे आल़े परमात्मे अपणी दया कने प्यार अहां लोकां पर प्रगट कित्ता,

⁵तां तिन्हीं अहां जो अहां दे पापां दिया सज़ा ते बचाया, कने एह़ धार्मिकता दे कम्मां दिया बज़ाह ते नीं ऐ, जेह्ड़े अहां अप्पु कित्ते, अपर तिन्हीं अपणिया दया मताबक कित्ता ऐ, तिन्हीं अहां दे पापां जो धोई नैं दूर कित्ता ऐ, कने पवित्र आत्मा दे जरिये अहां जो नौआं जन्म कने नौई ज़िन्दगी दित्ती ऐ।

⁶परमात्मे अहां जो पवित्र आत्मा मुफ्ते च दित्ता ऐ, तांजे सैह़ अहां च सामर्थी आल़े कम्म करैं। क्जोकि प्रभु यीशु मसीह अहां दा उद्धारकर्ता बणने तांई अहां दे पापां तांई मरेया।

⁷जिसते अहां तिसदे अनुग्रह दे जरिये धर्मी बणी करी सदा दी ज़िन्दगिया दी आसा दे मताबक हक्कदार बणन।

⁸एह़ गल्लां सच्चियां हन, कने मैं चांह़दा ऐ कि तू इन्हां गल्लां दे बारे च मजबूतिया नैं सखा। इसतांई कि जिन्हां परमात्मे दे रस्ते जो दिख्या कने बसुआस कित्या ऐ, सैह़ खरे-खरे कम्मां च लग्गी रैहणे दा ध्यान रखन। एह़ गल्लां खरियां कने लोकां दे फायदे दियां हन।

⁹अपर मूर्खता दिया बैंह्सबाजिया ते, कने पूर्वजां दियां मनगढ़ंत काहणिया ते, दुश्मणी ते, कने तिन्हां झगड़ेयां ते जेह्ड़े मूसा दिया व्यबस्था दे बारे च होन, बची करी रेह्आ, क्जोकि तिन्हां गल्लां दा कोई फायदा नीं कने मतलब दियां नीं हन।

¹⁰कलीसिया च झगड़े करणे आल़े माणुये जो इक्क या दो बरी समझाई दैणे ते बाद तिस पर होर अपणा बग्त बरबाद मत कर।

¹¹तुहां एह़ पक्का जाणी लेआ, कि ऐदेया माणु जाणी बुझी करी गलत रस्ते पर चला दा ऐ, कने तिसदे अपणे बुरे कम्म तिसियो बुरा बणांदे हन।

¹²जाह़लू मैं तिज्जो अल्ल अरतिमासे कने तुखिकुसे जो घल्लगा, तां मिन्जो अल्ल निकुपुलिस सैहरे च ओणे दी कोसस करेयां, क्जोकि मैं स्याल़ा तित्थु कटणे दे बारे सोचा दा ऐ।

¹³जाह़लू अपुल्लोस कने जेनास बकील अपणे सफरे जो सुरू करन, तां जितणा तुहां करी सकदे हन, तिन्हां दी मदत करनेयों। एह़ ध्यान रखणेयो कि तिन्हां जो कुसी भी चीज्जा दी कमी नीं होयैं।

¹⁴कने अहां दे लोक भी जरूरतां जो पूरियां करणे तांई खरेयां कम्मां च लग्गी रैहणा सीखन, तांजे कुच्छ कम्माई सकन।

¹⁵मेरे सारे साथी बसुआसियां दा जेह्ड़े मिन्जो सौगी हन, तिज्जो नमस्कार। कने जेह्ड़े बसुआसे दिया बज़ाह ते अहां नैं प्यार रखदे हन, तिन्हां जो भी नमस्कार। मैं प्रार्थना करदा ऐ कि तुहां सबना पर प्रभु दा अनुग्रह हुंदा रैंह्।