Read Kangri फिलेमोन 1 Bible Online

फिलेमोन 1 - Kangri bible

फिलेमोन 1

¹मैं पौलुस जेह्ड़ा यीशु मसीह दी सेवा करणे दिया बज़ाह ते जेला च कैद ऐ, कने भाऊ तीमुथियुसे दिया तरफा ते अहां दे प्यारे साथी फिलेमोन,

²कने बैहण अफफिया, कने अहां दे साथी योद्धा अरखिप्पुस कने फिलेमोन दे घरे दी कलीसिया दे नांऐ पर चिठ्ठी लिखा दा ऐ:

³मैं प्रार्थना करदा ऐ कि अहां दे पिता परमात्मे कने प्रभु यीशु मसीह दिया तरफा ते तुहां जो अनुग्रह कने सांति मिलदी रैंह्।

⁴मैं सदा परमात्मे दा धन्यावाद करदा ऐ, कने अपणिया प्रार्थना च भी तिज्जो याद करदा ऐ,

⁵क्जोकि मैं तेरे तिस प्यारे कने बसुआसे दी चर्चा सुणी करी, जेह्ड़ी प्रभु यीशु मसीह पर कने सारे परमात्मे दे लोकां सौगी ऐ।

⁶मैं प्रार्थना करदा ऐ कि बसुआसे च तेरा साझी होणा, हर इक्क खरिया गल्ला दे ज्ञाने तांई असरदार होयैं, जेह्ड़ी यीशु मसीह च अहां अल्ल ऐ ।

⁷क्जोकि हे मेरे प्यारे बसुआसी भाऊ, मिन्जो तेरे प्यारे ते मती सारी खुसी कने सांति मिलियो ऐ, इसतांई कि तेरे जरिये परमात्मैं दे लोकां दे मन हरे भरे होई गियो हन।

⁸इसतांई जे मिन्जो मसीह च बड़ी हिम्मत ऐ, कि जेह्ड़ी गल्ल ठीक ऐ, तिसादा हुक्म तिज्जो दैं।

⁹भिरी भी मिन्जो स्याणे पौलुसे जो जेह्ड़ा हुण यीशु मसीह दी सेवा करणे दिया बज़ाह ते जेला च कैद ऐ, एह़ होर भी खरा लग्गा कि प्यारे नैं विणती करैं।

¹⁰मैं उनेसिमुस तांई जेह्ड़ा मेरे जागते साइआं ऐ, कने जेह्ड़ा जेला च मेरे जरिये बसुआसे च आया, तिज्जो नैं विणती करदा ऐ।

¹¹सैह़ तां पैहल्ले तेरे कुसी कम्मे दा नीं था, अपर हुण तेरे कने मेरे, दून्नी दे बड़े कम्मे दा ऐ।

¹²तिसियो मतलब जेह्ड़ा मेरे क्लेजे दा टुकड़ा ऐ, मैं तिसियो तिज्जो अल्ल बापस घल्ली दित्या ऐ।

¹³तिसियो मैं अप्पु अल्ल रखणा चांह़दा था कि सैह़ तेरे पास्से ते इसा कैदा च जेह्ड़ा सुसमाचारे दिया बज़ाह ते ऐ, मेरी सेवा करैं।

¹⁴अपर मैं तेरी इच्छा बगैर कुच्छ भी करणा नीं चाया, तांजे तेरी एह़ दया जबरदस्तिया नैं नीं अपर तेरिया खुसिया नैं होयैं।

¹⁵क्जोकि क्या पता सैह़ तिज्जो ते कुच्छ दिनां तांई इसा बज़ाह ते दूर होएया कि हर बग्त तिज्जो अल्ल रैंह्।

¹⁶अपर हुण दासे साइआं नीं अपर दासे ते भी खास, मतलब बसुआसी भाऊये साइआं रैंह्, जेह्ड़ा मिन्जो तांई तां जादा प्यारा ऐ ई, अपर हुण सरीरे च कने प्रभु च भी, तिज्जो तांई भी जादा प्यारा होई जां।

¹⁷जे तू मिन्जो अपणा साथी समझदा ऐ, तां तिसियो इस तरीके नैं अपनाआ जिंआं मिन्जो अपनाया।

¹⁸जे तिन्हीं तेरा कुच्छ नकसान कित्ता ऐ, या तिन्हीं तेरा कुच्छ दैणा ऐ तां मेरे खाते च लिखी लै।

¹⁹मैं पौलुस अपणे हत्थे नैं लिखा दा ऐ, कि मैं अप्पु आई नैं एह़ कर्ज चुकाई दिंगा, कने मैं तुहां जो एह़ याद दिलाणा जरूरी नीं समझेया कि तुहां दी सारी ज़िन्दगी मेरी कर्जदार ऐ।

²⁰हे मेरे बसुआसी भाऊ, एह़ खुसी मिन्जो प्रभु च तेरे पास्से ते मिल्लैं। मसीह च मेरे दिले जो हरा भरा करी दे।

²¹मैं तेरे आज्ञाकारी होणे दा भरोसा रखी नैं तिज्जो लिखदा ऐ, कने एह़ जाणदा ऐ कि जेह्ड़ा कुच्छ भी मैं ग्लांदा ऐ, तू तिसते भी जादा बधी नैं करगा।

²²कने एह़ भी कि मिन्जो तांई रैहणे दी जगाह त्यार रख। मिन्जो आस ऐ कि परमात्मा तुहां दिया प्रार्थना दा तौल़ी जवाब दिंगा, कि मैं तुहां अल्ल औयें।

²³इपफ्रास भी जेह्ड़ा यीशु मसीह च मिन्जो सौगी जेला च कैदी ऐ,

²⁴कने मरकुस कने अरिस्तर्खुस कने देमास कने लूका जेह्ड़े मेरे साथी हन, इन्हां दे पास्से ते तिज्जो नमस्कार।

²⁵मैं प्रार्थना करदा ऐ, कि अहां दे प्रभु यीशु मसीह दा अनुग्रह तुहां दिया आत्मा पर हुंदा रैंह्। आमीन।