Read Kangri इब्रानियों 1 Bible Online

इब्रानियों 1 - Kangri bible

इब्रानियों 1

¹पराणे जमाने च परमात्मैं पूर्वजां नैं मती बरी कने हर तरीके नैं भविष्यवक्तां दे जरिये गल्लां कित्तियां,

²अपर इन्हां आखरी दिनां च अहां नैं पुत्तरे दे जरिये गल्लां कित्तियां। परमात्मे अपणे पुत्तरे दे जरिये सारी सृष्टि बणाई, कने तिसियो तिन्हीं सारियां चीज्जां दा हक्कदार बणाई दित्ता।

³पुत्तर ई परमात्मे दिया महिमा दी चमक ऐ, कने सैह़ हर किस्मां ते तिस साइआं ऐ। कने सैह़ अपणे सामर्थी दे वचनां ते सारिया सृष्टिया जो मजबूत बणाई रखदा ऐ। सैह़ लोकां दे सारे पापां जो धोई करी सबते ऊची पदविया पर परमात्मे दे सज्जे बक्खे जाई बैठा ऐ।

⁴इसतांई परमात्मैं पुत्तरे जो ऐदेया नां दित्ता, जेह्ड़ा सुअर्गदूतां ते भी म्हान ऐ। जिसते अहां एह़ दिक्खदे हन कि पुत्तर तिन्हां ते बड़ा म्हान ऐ

⁵परमात्मे अपणे कुसी भी सुअर्गदूते जो एह़ नीं ग्लाया: “तू मेरा पुत्तर ऐ; अज्ज मैं एह़ प्रगट करदा ऐ, कि तू मेरा पुत्तर ऐ।” कने तिन्हीं भिरी एह़ कुसी भी सुअर्गदूते नैं नीं ग्लाया: “मैं तिसदा पिता हुंगा, कने सैह़ मेरा पुत्तर हुंगा।”

⁶भिरी परमात्मा अपणे म्हान पुत्तरे जो संसारे च घल्ली नैं ग्लांदा ऐ: “परमात्मे दे सारे सुअर्गदूत तिसदी अराधना करन।”

⁷कने सुअर्गदूतां दे बारे च एह़ ग्लांदा ऐ, “सैह़ अपणे सुअर्गदूतां जो हौआ साइआं कने अपणे सेवकां जो अग्गी दियां लपटां साइआं बदली दिंदा ऐ।”

⁸अपर पुत्तरे दे बारे च ग्लांदा ऐ: “हे परमात्मा, जुगा-जुग तिकर तू राजे साइआं राज्ज करदा रैंह्गा। तू धार्मिकता सौगी अपणे राज्ज पर राज करगा।

⁹तू खरे कम्मां नैं प्यार कने बुरे कम्मां नैं बैर रखदा; इसतांई मैं तेरे परमात्मैं, तिज्जो तेरे साथियां ते बधी करी खुसिया दे तेले नैं तेरा अभिषेक कित्ता।”

¹⁰कने पवित्रशास्त्र भी ग्लांदा ऐ: “हे प्रभु सुरू च तैं धरतिया जो बणाया, कने सुअर्ग तेरे हत्थां दी कारीगरी ऐ।

¹¹सैह़ तां नास होई जांगे, अपर तू हमेसा बणी रैंह्गा; कने सैह़ सारे कपड़ेयां साइआं पराणे होई जांगे,

¹²कने तू तिन्हां जो चादरा साइआं लपेटगा, कने सैह़ कपड़ेयां साइआं बदली जांगे; अपर तू कदी नीं बदलगा, कने तेरी ज़िन्दगिया दा अन्त कदी नीं हुंगा।”

¹³परमात्मे अपणे कुसी भी सुअर्गदूते जो एह़ नीं ग्लाया: “तू मेरे सज्जे बक्खे बैठ, जाह़लू तिकर कि मैं तेरे बैरियां जो तेरे बसे च नीं करी दैं।”

¹⁴क्या सैह़ सारे सुअर्गदूत सेवा तांई चुणियां आत्मां नीं हन, कि तिन्हां दी सेवा करन जेह्ड़े उद्धार पाणे आल़े हन?