Read Kangri इब्रानियों 10 Bible Online

इब्रानियों 10 - Kangri bible

इब्रानियों 10

¹मूसा दी व्यबस्था सिर्फ ओणे आल़ी खरी चीज्जां दी छाया ऐ, तिन्हां च असली चीज्जां नीं हन। हर साल इक्क तरीके दी बल़ि चढ़ाणे दे जरिये सैह़ व्यबस्था भक्ति करणे आल़ेआं जो कदी भी सिद्ध नीं बणाई सकदी।

²जे लोकां दा परमात्मे दी भक्ति करणा तिन्हां जो तिन्हां दे पापां ते सच्ची च सुद्ध करदा, तां तिन्हां जो अपणे पाप करणे दा पछतावा नीं हुंदा, कने तिन्हां जो अपणे पापां तांई बल़ि चढ़ाणा बंद करणा था।

³अपर हर साल बल़ि चढ़ाणा, लोकां जो तिन्हां दे पाप याद करवांदा था।

⁴क्जोकि ऐदेया होणा तां औखा ऐ, कि जानवरां दा खून पापां जो दूर करैं।

⁵इसतांई जाह़लू मसीह संसारे च आया ऐ, कने परमात्मे जो ग्लांदा ऐ, “बलिदान कने भेंट तैं नीं चाई अपर तैं मिन्जो बलिदान करणे तांई इक्क सरीर त्यार कित्ता ऐ।

⁶होमबल़ियां कने पाप बल़ियां चढ़ाणे ते तू खुस नीं होएया।

⁷ताह़लू मैं ग्लाया, ‘हे परमात्मा, दिक्ख, मैं तेरी इच्छा जो पूरी करणे तांई आई गेआ ऐ, जिंआं पवित्रशास्त्र च मेरे बारे च लिख्या ऐ।’ ”

⁸पैहल्ले तिन्हीं एह़ ग्लाया ऐ, “ना तैं बलिदान कने भेंट कने होमबल़ियां कने पाप बल़ियां जो चाया, कने ना तू तिन्हां ते खुस होएया,” क्जोकि एह़ बलिदान तां मूसा दिया व्यबस्था मताबक चढ़ाये जांदे हन।

⁹कने भिरी एह़ भी ग्लाया, “हे परमात्मा, दिक्ख, मैं तेरी इच्छा जो पूरी करणे तांई आई गेआ ऐ।” इसतांई सैह़ बलिदान करणे दा पैहल्ला तरीका हटाई नैं, तिसा जगाह च नौआं तरीका लेयोंदा ऐ।

¹⁰परमात्मे दिया इच्छा ते अहां यीशु मसीह दे सरीरे दे इक्क ई बरी बलिदान चढ़ाणे दे जरिये सदा तांई पवित्र कित्ते गै हन।

¹¹हर इक्क याजक तां खड़े होई नैं हर दिन सेवा करदा ऐ, कने इक्की तरीके नैं बार-बार बलिदान चढ़ांदा ऐ, जेह्ड़ा पापां जो कदी दूर नीं करी सकदा।

¹²अपर अहां दा महायाजक यीशु मसीह अहां दे पापां दी खातर इक्क बरी सदा तांई अपणे आप्पे जो बलिदान करी दित्ता। कने हुण परमात्मे दे सज्जे बक्खे जाई बैठेया।

¹³कने मसीह तिस बग्त ते इसदा इन्तजार करदा ऐ, कि परमात्मा तिसदे सारे बैरियां जो तिसदे बसे च करी दैं।

¹⁴क्जोकि तिन्हीं इक्की बलिदाने दे जरिये तिन्हां जो हमेसा तांई सिद्ध करी दित्ता ऐ, जेह्ड़े तिस तांई लग्ग कित्ते गै हन।

¹⁵कने पवित्र आत्मा भी अहां जो ऐई गवाही दिंदा ऐ। क्जोकि तिन्हीं पैहल्ले ग्लाया था,

¹⁶प्रभु ग्लांदा ऐ, कि “जेह्ड़ा वादा मैं तिन्हां दिनां बाद तिन्हां सौगी करगा सैह़ एह़ ऐ, कि मैं अपणिया व्यबस्था जो तिन्हां दे मनां पर लिखगा, कने मैं तिन्हां दे दमागे च पांगा।”

¹⁷तां सैह़ एह़ भी ग्लांदा ऐ, “मैं तिन्हां दे पापां जो माफ करदा ऐ, कने तिन्हां दे बुरे कम्मां जो भिरी कदी याद नीं करगा।”

¹⁸कने जाह़लू परमात्मैं तिन्हां दे पाप माफ करी दित्ते, तां भिरी पापे तांई कुसी भी बलिदान दी जरूरत नीं ऐ

¹⁹इसतांई हे प्यारे साथी बसुआसियो, हुण अहां यीशुये दे खूने दे जरिये पूरे बसुआसे सौगी सुअर्गे दी बड़ी पवित्र जगाह च जाई सकदे हन।

²⁰यीशु मसीह दिया मौत्ती इक्क पड़दे दे जरिये बड़ी पवित्र जगाह च इक्क नौई ज़िन्दगी दैणे आल़ा रस्ता खोलेया ऐ,

²¹कने इसतांई कि अहां दा ऐदेया म्हान महायाजक ऐ जेह्ड़ा परमात्मे दे मंदरे दा हक्कदार ऐ,

²²तां ओआ, अहां परमात्मे दे नेड़े सच्चे मने कने पूरे बसुआसे सौगी जान, क्जोकि अहां दे मने दे अपराधां पर मसीह दा खून छिड़की नैं सरीर सुद्ध पांणिये नैं धोत्तेया ऐ तांजे अहां सुद्ध होई जान।

²³हुण अहां बगैर शक कित्ते अपणी तिसा आसा च सिद्ध रैह़न, जिसा जो अहां अपनाया ऐ, क्जोकि जिन्हीं वादा कित्या ऐ, सैह़ बसुआसे जोग्गा ऐ।

²⁴अपणा प्यार, कने खरे कम्मां जो बधाणे तांई अहां इक्की दूये दी फिकर करदे रैह़न।

²⁵कने अराधना च इक्की दूये सौगी किठ्ठे होणा मत छड्डा, जिंआं कुच्छ लोक करदे हन, अपर इक्की दूये जो हौंसला दिंदे रेह्आ। कने जिंआं-जिंआं तुहां प्रभु दे बापस ओणे दे दिन नेड़े ओंदे दिक्खन, तां तिंआं-तिंआं इक्की दूये दे हौंसले जो होर बधांदे रेह्आ।

²⁶क्जोकि सच्चाईया दे ज्ञाने जो जाणने ते बाद भी जे अहां जाणी बुझी करी पाप करदे रैह़न, तां पापां तांई भिरी कोई बलिदान बाक्कि नीं ऐ।

²⁷हाँ, सज़ा दा इक्क डरौणा दिन कने अग्गी दी लपट अह्ल्ली बाक्कि ऐ, जेह्ड़ी परमात्मे दे बरोधियां जो नास करी दिंगी।

²⁸जाह़लू मूसा दी व्यबस्था नीं मन्नणे आल़ा, दूँ या त्रीं माणुआं दी गवाहिया पर बगैर दया ते मारी दित्ता जांदा था।

²⁹तां सोची लेआ कि सैह़ कितणी होर भी मती सज़ा जोग्गा हुंगा, जिन्हीं परमात्मे दे पुत्तरे जो पैरां नैं रौल़ेया कने वादे दे खूने जो जिसदे जरिये सैह़ पवित्र बणेया था, अपवित्र जाणेया ऐ, कने अनुग्रह दी आत्मा दा अपमान कित्ता।

³⁰क्जोकि अहां तिसियो जाणदे हन, जिन्हीं ग्लाया ऐ, “बदला लैणां मेरा कम्म ऐ, मैंई बदला दिंगा।” कने भिरी एह़ भी ग्लाया, कि “प्रभु अपणे लोकां दा न्याय करगा।”

³¹जिन्दे परमात्मे दे हत्थां च पोणा डरौणी गल्ल ऐ।

³²तुहां तिन्हां पचांह़ आल़ेआं दिनां जो याद करा, जाह़लू तुहां मसीह दे वचने दी जोत्ती पाई, तां तुहां दुखे दिया बड़िया मुसीबता जो झेलणे च मजबूत रैह्।

³³कदी-कदी तां इआं होएया, कि तुहां दी सबना सामणै बेइज्जती होई, कने तुहां बड़ियां मुसीबतां झेलियां। कने कई बरी तुहां तिन्हां तांई बड़ी फिकर कित्ती, जिन्हां सौगी एह़ होएया था।

³⁴क्जोकि तुहां कैदियां दे दुखे च भी दुखी होये, कने अपणी धन दौलत भी खुसिया नैं लुटणा दित्ती। एह़ जाणी करी कि तुहां अल्ल सुअर्गे च इक्क होर भी खास कने सदा काल तिकर रैहणे आल़ी धन दौलत ऐ।

³⁵इसतांई जाह़लू तुहां जो सतांगे, तां अपणी हिम्मता मत छड्डदे, क्जोकि इसदा इनाम बड्डा ऐ।

³⁶ऐदेय बग्ते च तुहां जो सबर रखणा जरूरी ऐ, तांजे परमात्मे दी इच्छा जो पूरी करी नैं जेह्ड़ा तुहां तांई वादा कित्या ऐ, सैह़ मिल्लैं।

³⁷क्जोकि जिंआं पवित्रशास्त्रे च लिख्या ऐ, “हुण बड़ा ई थोड़ा बग्त रेई गेआ ऐ, जाह़लू कि ओणे आल़ा ओंगा, कने देर नीं करगा।

³⁸अपर मेरा सैह़ माणु जेह्ड़ा बसुआसे दे जरिये धर्मी बणेया ऐ, जिन्दा रैंह्गा। जेह्ड़ा डरी करी बसुआसे जो छड्डी नैं पचांह़ हटी जांदा ऐ, तां मेरा मन तिसते खुस नीं हुंगा।”

³⁹अहां तिन्हां लोकां साइआं नीं हन, जेह्ड़े डरी नैं परमात्मे ते दूर होई जांदे हन, कने नास होई जांदे हन, अपर तिन्हां लोकां साइआं हन जेह्ड़े अपणे बसुआसे दे जरिये ज़िन्दगी पांदे हन।