Read Kangri इब्रानियों 13 Bible Online

इब्रानियों 13 - Kangri bible

इब्रानियों 13

¹अप्पु च बैह्णी-भाऊआं साइआं प्यार रखा।

²तिन्हां दी भी आदर खातर करा, जेह्ड़े जरूरतमंद मुसाफिर हन, क्जोकि इन्हीं साह्भें कितणेयां अणजाणे च सुअर्गदूतां दी आदर खातर कित्तियो ऐ।

³कैदियां दा भी इन्हीं साह्भें हाल चाल पुछदे रेह्आ, कि समझा तुहां भी तिन्हां सौगी कैद हन। कने जेह्ड़े लोक दुखी कित्ते जांदे हन, तिन्हां दा भी एह़ समझी करी हाल चाल पुछा करा, जिंआं कि तुहां तिन्हां दे दुखे च साझी हन।

⁴ब्याह सबना लोकां च इज्जता दी गल्ल समझी जां, कने इस रिस्ते च दोयो अप्पु च बफादार रैह़न, क्जोकि परमात्मा ब्यभिचारियां, कने गंदे कम्म करणे आल़ेआं दा न्याय करगा।

⁵तुहां अपणिया ज़िन्दगिया जो धन-दौलता दे लालचे ते दूर रखा, कने जेह्ड़ा तुहां अल्ल ऐ, तिस च खुस रेह्आ। क्जोकि परमात्मे अप्पु ई ग्लाया ऐ, “मैं तिज्जो कदी नीं छड्डगा, कने कदी नीं भुलगा।”

⁶इसतांई अहां भरोसा करी नैं ग्लांदे हन, प्रभु मेरी मदत करदा ऐ, “मैं नीं डरगा। माणु मेरा कुच्छ नीं करी सकदा ऐ।”

⁷जेह्ड़े तुहां दे अगुऐ थे, कने जिन्हां तुहां जो परमात्मे दा वचन सणाया ऐ। तिन्हां जो याद रखा, कने ध्याने नैं तिन्हां दिया ज़िन्दगिया जो दिक्खा, कि किंआं तिन्हां अपणी ज़िन्दगी जी, कने सैह़ मरने तिकर परमात्मे दे बसुआसे च बफादार बणी रैह्। इसतांई अहां जो भी तिंआं ई तिस पर बसुआस करणा चाइदा जिंआं तिन्हां कित्या था।

⁸यीशु मसीह कल कने अज्ज कने जुगा-जुग कदी नीं बदलदा।

⁹इन्हां सारियां नौईआं कने लग्ग-लग्ग सिक्षां दा पालण मत करा, जेह्ड़ियां तुहां जो गलत रस्ते पास्से लेई जांदियां हन। क्जोकि तुहां दे मनां तांई खरा ऐ, कि परमात्मे दे अनुग्रह दे जरिये मजबूत बणन, ना कि तिन्हां नियमां जो मन्नणे दे जरिये जेह्ड़े खाणे दे बारे च हन, इन्हां नैं मतलब रखणे आल़े जो कुच्छ फायदा नीं हुंदा।

¹⁰अहां दी इक्क वेदी ऐ। जिसा पर खाणे दा हक्क तिन्हां लोकां जो नीं, जेह्ड़े तम्बू दी सेवा करदे हन।

¹¹पराणे वादे दे मताबक हर साल महायाजक जानवरां दा खून पाप बल़ि तांई बड़ी पवित्र जगाह च तिन्हां दे पापां दी माफी तांई लेई जांदा ऐ, अपर जानवरां दे बल़ि कित्यो सरीर लोकां दे तम्बुआं ते दूर जल़ाई दित्ते जांदे हन।

¹²इसा बज़ाह ते यीशुयैं भी लोकां जो अपणे ई खून दे जरिये पवित्र करणे तांई यरूशलेम सैहरे ते बाहर दुख झेलेया कने मरी गेआ।

¹³इसतांई ओआ, हुण अहां यहूदी लोकां दियां व्यबस्था जो छड्डी करी, यीशु मसीह पर बसुआस करी नैं ठीक तिंआं ई तिस सौगी बेइज्जती आल़ा दुख झेलन।

¹⁴क्जोकि इस संसारे च अहां दा हमेसा रैहणे आल़ा कोई घर नीं ऐ, अपर अहां तिस सुअर्गीय घरे दिया तोपा च हन, जेह्ड़ा सदा तांई ऐ।

¹⁵इसतांई अहां यीशु मसीह दे जरिये अपणे मुँऐ ते परमात्मे दी स्तुति कने अराधना करदे रैह़न। जेह्ड़ा परमात्मे तांई बलिदान ऐ।

¹⁶कने भलाई करणे तांई कने इक्की दूये दी मदत करणे तांई त्यार रेह्आ, क्जोकि परमात्मा ऐदेय बलिदानां ते खुस हुंदा ऐ।

¹⁷अपणे अगुआं दा हुक्म मन्ना कने तिन्हां दे अधीन रेह्आ, क्जोकि सैह़ तुहां जो दिक्खा दे हन, कि तुहां अपणे रस्ते ते भटकी नीं जान। क्जोकि तिन्हां जो अपणिया सेवा दा लेखा जोखा परमात्मे जो दैणा पोणा ऐ। तुहां तिन्हां दे हुक्मां जो मन्ना, तांजे सैह़ अपणे कम्मां दे खुस होई जान, ना कि उदास, एह़ तुहां तांई भी फायदेमंद होई जांगा।

¹⁸अहां तांई प्रार्थना करदे रेह्आ। अहां जो भरोसा ऐ कि अहां दा जमीर साफ ऐ। कने अहां सारियां गल्लां च जेह्ड़ियां अहां करदे हन, परमात्मे दी महिमा करणा चांह़दे हन।

¹⁹प्रार्थना करणे तांई मैं तुहां जो होर भी हौंसला दिंदा ऐ, कि मैं तौल़ी तुहां अल्ल भिरी आई सकैं।

²⁰सांति दैणे आल़ा परमात्मा तुहां जो सामर्थ दैं। जिन्हीं अहां दे प्रभु यीशु मसीह जो सदा दे वादे दे खूने दे जरिये मरेयां ते जिन्दा कित्ता। यीशु भेड्डां दा म्हान रखवाल़ा ऐ।

²¹परमात्मा तुहां जो हर इक्क खरिया गल्ला च सिद्ध करैं, जिसते तुहां तिसदी इच्छा पूरी करन, कने जेह्ड़ा कुच्छ तिसियो खरा लगदा ऐ, तिसियो यीशु मसीह दे जरिये अहां च पूरा करैं। जिसदी महिमा जुगा-जुग हुंदी रैंह्। आमीन।

²²हे प्यारे साथी बसुआसियो, मैं तुहां नैं विणती करदा ऐ, कि इसा चिठ्ठिया दियां गल्लां सबरे नैं सुणी लेआ, जेह्ड़ियां मैं तुहां जो हिम्मत दैन तांई लिखियां हन। मैं तुहां जो इसा चिठ्ठिया च बड़ियां जादा गल्लां नीं लिखियां हन।

²³तुहां जो एह़ याद ऐ, कि तीमुथियुस, अहां दा भाऊ जेला ते छुटी गेआ ऐ, कने जे सैह़ तौल़ी आई गेआ, तां मैं तिस सौगी तुहां नैं मिलणा ओंगा।

²⁴अपणे सारे अगुआं कने सारे परमात्मे दे लोकां जो नमस्कार ग्ला। इटली देसे दे बसुआसी तुहां जो नमस्कार ग्लांदे हन।

²⁵तुहां सबना पर परमात्मे दा अनुग्रह हुंदा रैंह्। आमीन।