Read Kangri इब्रानियों 2 Bible Online

इब्रानियों 2 - Kangri bible

इब्रानियों 2

¹इसतांई अहां जो जेह्ड़ा सुसमाचार मिल्लेया, तिस पर खरे कित्ते ध्यान दैणा चाइदा। कुत्थी इआं ना होयैं कि अहां सच्चाईया ते भटकी जान।

²क्जोकि यहूदी लोकां तिसा व्यबस्था पर बसुआस कित्ता, जेह्ड़ी परमात्मे सुअर्गदूतां दे जरिये मूसे जो दित्तियो थी। जाह़लू सैह़ सच्च साबित होएया कने हर इक्क अपराध कने हुक्म नीं मन्नणे आल़ेआं जो परमात्मैं सज़ा दित्ती,

³तां अहां लोक किंआं बची सकगे, जे अहां इस म्हान उद्धारे दी निंदा करगे? इस म्हान उद्धारे दे बारे च अहां प्रभु यीशु मसीह दे जरिये जाणी सके। कने चेले जिन्हां सबते पैहल्ले इसदे बारे च सुणेया, कने तिन्हां अहां पर प्रगट कित्ता कि एह़ सच्च ऐ।

⁴कने इस सौगी परमात्मैं भी अपणिया इच्छा मताबक चमत्कारां, अनोखे कम्मां, कई किस्मां दे सामर्थी दे कम्मां, पवित्र आत्मा दे वरदानां दे कम्मां दे जरिये इस जो सच्च साबित करदा रेह्आ।

⁵परमात्मैं तिस ओणे आल़े संसारे जो, जिसदे बारे च अहां ग्लांदे हन, सुअर्गदूतां जो नीं, अपर प्रभु यीशु मसीह जो हक्क दित्या ऐ।

⁶अपर पवित्रशास्त्रे च कुणकी एह़ गवाही दित्तियो ऐ: “माणु क्या ऐ कि तुहां तिसियो याद करन? कने माणुये दी औलाद क्या ऐ, जिसा दा तुहां ध्यान रखन?

⁷परमात्मैं तिन्हां जो सामर्थी च सुअर्गदूतां ते थोड़ा घट रखेया; तिन्हीं तिन्हां जो राजे साइआं महिमा कने आदर दित्ता, कने तिन्हां जो अपणे हत्थां दे कम्मां पर हक्क दित्ता।

⁸परमात्मैं सब कुच्छ तिन्हां दे बसे च करी दित्या ऐ।” इसतांई जाह़लू कि तिन्हीं सब कुच्छ तिन्हां दे बसे करी दित्ता, तां तिन्हीं कुच्छ भी रखी नीं छड्डेया जेह्ड़ा तिन्हां दे बसे च ना होयैं। अपर सच्चाई एह़ ऐ कि अह्ल्ली तिकर अहां सारियां चीज्जां जो तिन्हां दे बसे च नीं दिक्खा दे हन।

⁹अपर अहां यीशुये जो जेह्ड़ा सुअर्गदूतां ते थोड़े बग्ते तांई घट रखेया था, मौत्ती दा दुख झेलणे दिया बज़ाह ते तिसियो महिमा कने आदरे दा मुकट पैहनेयो दिक्खदे हन, तांजे परमात्मे दे अनुग्रह ते सैह़ हर इक्क माणुये तांई मरें।

¹⁰क्जोकि परमात्मैं सब कुच्छ बणाया ऐ, कने सब कुच्छ तिसदा ऐ, तिसियो ऐई खरा लग्गा कि जाह़लू सैह़ मते सारे लोकां जो महिमा च पज्जां, तां तिन्हां दे उद्धार करणे आल़े जो दुख झेलणे दे जरिये सिद्ध करैं।

¹¹क्जोकि जेह्ड़ा लोकां जो तिन्हां दे पापां ते पवित्र करदा ऐ, कने जेह्ड़े लोक पापां ते पवित्र कित्ते जांदे हन, सैह़ दोयो परमात्मे दी औलाद हन। इसतांई यीशु तिन्हां जो अपणे भाऊ-बैहण ग्लाणे ते नीं सर्मांदा।

¹²कने यीशु परमात्मे नैं ग्लांदा ऐ, “मैं तेरे बारे च अपणे लोकां जो दस्सगा; कि तैं मिन्जो तांई कितणे खरे कम्म कित्ते हन, जाह़लू सैह़ अराधना तांई किठ्ठे हुंदे हन, मैं तेरी स्तुति करगा।”

¹³कने भिरी ग्लांदा ऐ, “मैं तिस पर भरोसा रखगा।” कने भिरी एह़ भी ग्लांदा ऐ, “ऐत्थु मैं तिन्हां लोकां सौगी ऐ जिन्हां जो परमात्मैं मिन्जो दित्या ऐ।”

¹⁴क्जोकि जिन्हां जो परमात्मा अपणे ग्लांदा ऐ, सैह़ इन्सान हन, हर तरीके नैं यीशु मसीह अहां साइआं बणेया, कने संसारे च आया, तांजे तिसदिया मौत्ती दे जरिये मौत्ती पर हक्क रखणे आल़े सैताने दा नास करी सकैं;

¹⁵कने जितणे मौत्ती दे डरे ते ज़िन्दगी भर गुलामिया च फसेयो थे, यीशु तिन्हां जो छड्डाई लैं।

¹⁶क्जोकि यीशु तां सुअर्गदूतां जो नीं, अपर अब्राहमे दिया औलादी जो सम्भालदा ऐ।

¹⁷इसा बज़ाह ते तिस जो चाइदा था, कि सारियां गल्लां च अपणे दूयेयां लोकां साइआं बणैं; जिसते सैह़ तिन्हां गल्लां च जेह्ड़ियां परमात्मे नैं रिस्ता रखदियां हन, इक्क दयालू कने बसुआसे जोग्गा महायाजक बणैं तांजे लोकां जो पापां ते माफी देई सकैं।

¹⁸क्जोकि जाह़लू यीशुयैं परीक्षा दे बग्त दुख झेलेया, तां सैह़ तिन्हां दी भी मदत करी सकदा ऐ, जिन्हां दी परीक्षा हुंदी ऐ।