Read Kangri इब्रानियों 4 Bible Online

इब्रानियों 4 - Kangri bible

इब्रानियों 4

¹परमात्मे दे अरामे दिया जगाह च दाखल करणे दा वादा अह्ल्ली तिकर ऐ। तां चौकन्ने रैह़न कि तुहां लोकां च कोई भी अयोग्य ना ठेहरैं, कि तिस च जाणे ते वंचित नीं रेई जां।

²क्जोकि अहां जो तिन्हां इस्राएली लोकां साइआं सुसमाचार सणाया ऐ, अपर तिन्हां लोकां जो सुणेयो वचने ते कुच्छ भी फायदा नीं होएया, क्जोकि तिन्हां वचने जो बसुआसे सौगी अपणे मने च नीं अपनाया।

³इसतांई अहां जिन्हां परमात्मे दे वचने पर बसुआस कित्ता ऐ, तिस अरामे दिया जगाह च दाखल हुंदे हन; जिंआं दूयेयां जो परमात्मे ग्लाया, “मैं अपणे गुस्से च आई नैं कसम खादी, कि ‘सैह़ मेरे अरामे दिया जगाह च दाखल नीं होई सकगे।’ ” अपर सृष्टिया दी रचणा ते पैहल्ले तिसदे कम्म पूरे होई चुकेयो थे।

⁴क्जोकि सतमे दिने दे बारे च पवित्रशास्त्रे च इआं लिख्या ऐ, “परमात्मैं सतमे दिन अपणे सारे कम्मां जो निपटाई करी अराम कित्ता।”

⁵अहां पवित्रशास्त्रे च एह़ भी पढ़ेया ऐ, “सैह़ मेरे अरामे दिया जगाह च दाखल नीं होई सकगे।”

⁶तां एह़ गल्ल पक्की ऐ कि कुच्छ लोकां जो अरामे दिया जगाह च दाखल होणे तांई हुण भी खुली अजादी ऐ, कने जिन्हां जो तिसदा सुसमाचार पैहल्ले सणाया था, सैह़ हुक्म नीं मन्नणे दिया बज़ाह ते तिस च दाखल नीं होई सके,

⁷इसतांई सैह़ कुसी खास दिने जो ठैहराई नैं इतणे दिनां बाद दाऊदे दिया कताबा च “तिसियो अज्ज दा दिन ग्लांदा ऐ।” जिंआं पैहल्ले ग्लाया गेआ, “जे अज्ज तुहां परमात्मे दी उआज़ सुणन, तां अपणे मने जो कठोर मत करा।”

⁸जे यहोशू इस्राएली लोकां जो परमात्मे दे वादे मताबक अरामे च दाखल कराई लैंदा, तां तिसते बाद दूये दिने दी चर्चा नीं हुंदी।

⁹इसतांई जाणी लेआ कि परमात्मे दे लोकां जो हुण भी सतमे दिने दा अराम बाक्कि ऐ।

¹⁰क्जोकि जेह्ड़ा भी तिसदे अरामे च दाखल होएया ऐ, तिन्हीं भी परमात्मे साइआं अपणे कम्मां जो पूरा करी नैं अराम कित्ता ऐ।

¹¹अहां भी तिस अरामे दिया जगाह च दाखल होणे दी कोसस करन, इआं ना होयैं कि कोई माणु तिन्हां साइआं हुक्म नीं मन्नी करी दाखल नीं होई पां।

¹²क्जोकि परमात्मे दा वचन जिन्दा कने असरदार ऐ, कने सैह़ हर इक्क दूँ धारां आल़िआ तलवारा ते भी बड़ा पैना ऐ। कने प्राणा, आत्मा जो, कने गठ्ठी-गठ्ठी कने गूदे-गूदे जो लग्ग करी नैं आर पार बिन्नदा ऐ; कने मने दियां इच्छां कने बचारां जो जांचदा ऐ।

¹³संसारे दी कोई भी चीज्ज परमात्मे ते छुपियो नीं ऐ। कने तिसदियां अखीं सामणै सारियां चीज्जां खुलियां कने बेपड़दा हन, तिसियो अहां जो लेखा दैणा पोंगा।

¹⁴यीशु जेह्ड़ा सुअर्गे च गेआ ऐ, सैह़ परमात्मे दा पुत्तर ऐ, कने अहां सबना दा महायाजक ऐ। तां ओआ, अहां अपणे बसुआसे जो जिसियो अहां मनदे हन, मजबूत बणी रैह़न।

¹⁵क्जोकि अहां दा ऐदेया महायाजक ऐ जेह्ड़ा अहां दियां कमजोरियां च अहां पर दया करी सकदा ऐ। अपर सैह़ सारियां गल्लां च अहां साइआं परखेया तां गेआ, भिरी भी पापी नीं निकल़ेया।

¹⁶इसतांई ओआ, अहां परमात्मे दे सिंहासणे दे सामणै हिम्मत करी नैं चलण, जेह्ड़ा अनुग्रह नैं भरोया ऐ, ताह़लू परमात्मा अहां पर दया कने अनुग्रह करगा, जेह्ड़ा जरूरतां दे बग्त अहां दी मदत करदा ऐ।