Read Kangri इब्रानियों 6 Bible Online

इब्रानियों 6 - Kangri bible

इब्रानियों 6

¹इसतांई जाह़लू अहां पैहल्ली बरी मसीह दे बारे सिखया, तां ओआ मसीह दी सिक्षा ते गांह बधी करी सिद्धता च तरक्की करन। अहां अपणे बुरे कम्मां ते मन बदली लैन जेह्ड़े मौत्ती पास्से लेई जांदे हन, कने परमात्मे पर बसुआस करणे दी दुवारी गल्ल नीं करणी चाइदी।

²कने तुहां जो बपतिस्मे दे बारे च, कने सिरे पर हत्थ रखणे, कने मरेयां दे जिन्दे होणे, कने आखरी न्याय दी सिक्षा दी नींई भिरी ते पाणे दी जरूरत नीं ऐ।

³जे परमात्मा चांह़गा, तां मैं तुहां जो पक्की सिक्षा दिंगा ।

⁴जेह्ड़े लोक अपणा बसुआस छड्डी दिंदे हन, तिन्हां जो मन बदलणे तांई बापस नीं अंणी सकदे। तिन्हां इक्क बरी सच्चाईया जो जाणेया, जेह्ड़ी परमात्मे दे पास्से ओंदी ऐ, कने तिन्हां जो सुअर्गीय वरदान मिल्लेया ऐ, कने दूयेयां लोकां सौगी पवित्र आत्मा भी पाया।

⁵कने तिन्हां परमात्मे दे पास्से ते ओणे आल़े संदेसे जो मसूस कित्ता ऐ, जेह्ड़ा खरा ऐ, कने तिन्हां ओणे आल़े बग्ते दिया सामर्थी जो भी मसूस कित्ता ऐ।

⁶जे सैह़ परमात्मे ते दूर होई गै हन, तां तिन्हां जो बापस अणने दा कोई तरीका नीं ऐ। क्जोकि सैह़ परमात्मे दे पुत्तरे जो दुवारी सूल़िया पर चढ़ांदे हन, कने दूयेयां सामणै तिसदा मजाक बणांदे हन।

⁷जेह्ड़े लोक खरी सिक्षा अपनांदे हन, सैह़ तिसा जमीना साइआं हन, जित्थु हमेसा बरखा हुंदी रैंह्दी ऐ, जे सैह़ जमीन खरी ऐ, तां किसाने तांई खरी फसल पैदा करदी ऐ, कने एह़ परमात्मे दे पास्से ते आसीष ऐ।

⁸दूये लोक तिसा जमीना साइआं हन, जेह्ड़ी कंडे आल़िआं झाड़ियां पैदा करदी ऐ, जिन्हां दी कोई कीमत नीं ऐ, परमात्मा इसा जमीना जो श्रापित करगा, कने इसा च पैदा होणे आल़िआं बेकार चीज्जां जो अग्गी च फुकी दिंगा।

⁹अपर हे प्यारे साथियो, तुहां खरे कम्म करा दे हन, क्जोकि परमात्मैं तुहां जो बचाई लेआ ऐ। इसतांई एह़ सारियां गल्लां तुहां तांई नीं हन।

¹⁰क्जोकि परमात्मा गलत फैसला नीं करदा ऐ, कि तुहां दे कम्मां कने तिस प्यारे जो भुल्ली जां, जेह्ड़ा तुहां तिसदे नांऐ तांई इस तरीके नैं दस्सेया, कि तिसदे लोकां दी सेवा कित्ती कने करा दे भी हन।

¹¹आलसी मत बणा। अपर मेहनत करणे आल़ेआं साइआं बणा, तुहां एह़ प्यारे दे कम्म सबर कने बसुआसे सौगी लगातार अन्त तिकर करदे रेह्आ, कने परमात्मे दे वादेयां जो पाणे तांई पक्की आसा रखा।

¹³परमात्मैं जाह़लू अब्राहमे नैं वादा कित्ता, तां तिन्हीं अपणी कसम खादी; तिसते बड्डा कोई नीं था, जिसदा नां लेई करी सैह़ कसम खां।

¹⁴तिन्हीं ग्लाया, “सच्ची च मैं तिज्जो बड़ी आसीष दिंगा, कने तेरे वंशे जो बधांदा जांगा।”

¹⁵कने अब्राहमे मते साल्लां तिकर सबर रखी करी परमात्मे दे वादे दिया आसीषां जो पाया।

¹⁶लोक तां अपणे ते बड्डे दा नां लेई करी कसम खांदे हन। कने तिन्हां दे हर इक्की झगड़े दा फैसला कसमा ते पक्का हुंदा ऐ।

¹⁷इसतांई परमात्मैं भी कसम खादी। इआं करणे ते सैह़ लोकां जो जिन्हां सौगी वादा कित्या था, तिन्हां जो दस्सणा चांह़दा था, जेह्ड़ा वादा तिन्हीं तिन्हां नैं कित्या था, तिसियो पूरा करगा।

¹⁸तां भिरी ऐत्थु दूँ गल्लां दा जिकर ऐ, इक्क तिसदा वादा कने दूई तिसदी कसम जेह्ड़े कदी नीं बदली सकदे कने जिन्हां दे बारे च परमात्मा कदी झूठ नीं ग्लाई सकदा। इसतांई अहां जेह्ड़े परमात्मे दे नेड़े पनाह लैणे जो आएयो हन कने जेह्ड़ी आसा तिन्हीं अहां जो दित्तियो ऐ, तिसा जो पकड़ी करी रखेया ऐ, कने अहां बड़े खुस हन।

¹⁹सैह़ आसा अहां दे प्राणा तांई समुंदरी जाह्जां दे लंगरा[1] साइआं मजबूत कने पक्की ऐ। जेह्ड़ी अहां जो परमात्मे दी बड़ी पवित्र जगाह तिकर लेई करी जांदी ऐ जेह्ड़ी पड़दे पचांह़ ऐ,

²⁰जित्थु यीशु अहां तांई अहां ते पैहल्ले गेआ। मलिकिसिदके दिया रीतिया पर सदा तांई महायाजक बणी गेआ।