Read Kangri इब्रानियों 7 Bible Online

इब्रानियों 7 - Kangri bible

इब्रानियों 7

¹मलिकिसिदक शालेम सैहरे दा राजा कने परम प्रधान परमात्मे दा याजक था। जाह़लू अब्राहम राजेयां जो लड़ाईया च हराई करी बापस ओआ दा था, तां मलिकिसिदके नैं मिल्लेया, कने तिसियो आसीष दित्ती।

²अब्राहमे मलिकिसिदके जो लड़ाईया च जीत्ती करी लंदियां सारी चीज्जां दा दसमा हिस्सा भी दित्ता। मलिकिसिदके दे नांऐ दा मतलब, “धार्मिकता दा राजा” ऐ। अपर शालेम दा मतलब “सांति” तां सैह़ “सांति दा राजा” भी ऐ।

³जिसदा ना बुढ़ा, ना माँ, ना खानदान ऐ, जिसदे दिनां दी ना सुरुआत ऐ, कने ना ज़िन्दगिया दा अन्त ऐ; अपर परमात्मे दे पुत्तरे दा रूप बणी करी सदा तांई याजक बणी रैंह्दा ऐ।

⁴हुण इसा गल्ला पर ध्यान करा कि मलिकिसिदक कितणा म्हान था जिसियो अहां दे पूर्वज अब्राहमें लड़ाईया च जीत्ती करी लंदियां सारी चीज्जां दा दसमा हिस्सा दित्ता।

⁵मूसा दी व्यबस्था लेवी दे वंशे जो एह़ सखांदी ऐ, कि जेह्ड़ा याजक बणैं तिन्हां जो इस्राएली लोकां, मतलब जेह्ड़े तिन्हां दे अपणे लोक हन, तिन्हां ते सारियां चीज्जां दा दसमा हिस्सा लैणां चाइदा। अपर सैह़ याजक कने दूये लोक भाऊआं साइआं हन, क्जोकि सैह़ अब्राहमे दे वंशे दे हन।

⁶अपर एह़ माणु मलिकिसिदक, जेह्ड़ा लेविये दे वंशे दा भी नीं था, तिन्हीं अब्राहमे ते दसमा हिस्सा लेआ, कने अब्राहमे जो परमात्मे दे वादे मिल्लेयो थे, भिरी भी मलिकिसिदकें तिसियो आसीष दित्ती।

⁷अहां खरे कित्ते जाणदे हन, जेह्ड़ा आसीष दैणे आल़ा ऐ, सैह़ आसीष लैणे आल़े ते बड्डा ऐ।

⁸कने ऐत्थु तां मरने आल़ा माणु दसमा हिस्सा लैंदा ऐ, अपर मलिकिसिदके जो अब्राहमे दसमा हिस्सा दित्या था, पवित्रशास्त्रे ग्लांदा ऐ, सैह़ अह्ल्ली तिकर जिन्दा ऐ।

⁹जाह़लू अब्राहमे मलिकिसिदके जो दसमा हिस्सा दित्ता, ताह़लू लेवियां दा जन्म अब्राहमे दे वंशे च भी नीं होएया था। तां अहां ग्लाई सकदे हन, कि लेवी जेह्ड़ा दसमा हिस्सा लैंदे हन, तिन्हां भी अब्राहमे दिया रीतिया पर दसमा हिस्सा दित्ता।

¹¹अपर मूसा दी व्यबस्था च एह़ ग्लाया ऐ, कि याजक सिर्फ लेवी दे खानदाने दा ई होणा चाइदा, क्जोकि याजक कुस जो भी सिद्ध नीं बणाई सकदे। इसतांई हारून याजके दे परवारे दे बदले जेह्ड़ा लेवियां दे वंशे ते था, मलिकिसिदके साइआं इक्क याजके दी जरूरत ऐ।

¹²क्जोकि जाह़लू याजके दी पदवी बदली जांदी ऐ, तां व्यबस्था भी बदलणी जरूरी ऐ।

¹³अहां एह़ गल्लां मसीह दे बारे च ग्लांदे हन, जेह्ड़ा दूये गोत्रे दा था, कुणी भी तिस गोत्रे ते याजके साइआं तिसा वेदिया दी सेवा नीं कित्ती।

¹⁴सारे जाणदे हन, कि अहां दा प्रभु यीशु यहूदा दे गोत्रे ते पैदा होएया ऐ, कने मूसैं याजकां दे बारे च लिखदे बग्त इस गोत्रे दे याजक बणने दे बारे कदी जिकर नीं कित्ता।

¹⁵हुण अहां होर भी खरे कित्ते जाणी सकदे हन, जाह़लू मलिकिसिदके साइआं इक्क होर याजक पैदा होणे आल़ा था।

¹⁶यीशु कुसी भी माणुये दिया व्यबस्था या लेविये दे गोत्रे ते तालुक रखणे आल़ी व्यबस्था दे मताबक याजक नीं बणेया, अपर ज़िन्दगिया दिया सामर्थी मताबक जिसा दा कोई अन्त नीं ऐ याजक बणेया ऐ।

¹⁷क्जोकि परमात्मैं तिसदे बारे च पवित्रशास्त्रे च ग्लाया ऐ, “तू मलिकिसिदके दिया रीतिया पर सदा तांई महायाजक बणी गेआ ऐ।”

¹⁸पैहल्ले मूसा दी व्यबस्था बेकार कने नाकाम होणे दिया बज़ाह ते बदली गेई ऐ।

¹⁹क्जोकि मूसा दिया व्यबस्था कुसा भी गल्ला जो सिद्ध नीं करदी, कने तिसदिया जगाह पर अहां अल्ल इक्क बड़ी आसा ऐ, जेह्ड़ी यीशु मसीह च ऐ, जिसदिया बज़ाह ते अहां परमात्मे दे नेड़े जाई सकदे हन।

²⁰कने परमात्मैं कसम खादी, जाह़लू मसीह जो याजक बणाया।

²¹क्जोकि लेवी दा खानदान तां बगैर कसमा ते याजक बणी गेआ, अपर यीशु कसमा सौगी परमात्मे दे पास्से ते याजक बणाया गेआ, जिन्हीं तिसदे बारे च ग्लाया, “मैं परमात्मा जेह्ड़ा एह़ कसम खांदा ऐ, कने मैं तिस फैसले ते कदी नीं पछतांगा कि, ‘तू सदा तांई याजक बणी रैंह्।’ ”

²²इसा कसमा दिया बज़ाह ते यीशु अहां तांई बड़े म्हान वादे दी जिम्मेवारी लैंदा ऐ।

²³इक्क होर गल्ल ऐ, सैह़ तां मते सारे याजक बणैं, क्जोकि हर इक्क याजके दिया मौत्ती सौगी तिसदी सेवा खत्म होई जांदी थी।

²⁴अपर यीशु जुगा-जुग रैंह्दा ऐ, इसा बज़ाह ते तिसते बाद कोई याजक नीं बणेया।

²⁵इसतांई जेह्ड़े यीशुये दे जरिये परमात्मे अल्ल ओंदे हन, सैह़ तिन्हां दा पूरा-पूरा उद्धार करी सकदा ऐ, क्जोकि सैह़ तिन्हां तांई विणती करणे जो सदा जिन्दा ऐ।

²⁶ऐदेया ई महायाजक अहां दियां जरूरतां जो पूरा करी सकदा ऐ, जेह्ड़ा पवित्र, बेकसूर, कने साफ मने दा, कने पापियां ते लग्ग, कने सुअर्गे ते भी जादा म्हान कित्या होयैं।

²⁷कने यीशु तिन्हां महायाजकां साइआं नीं जेह्ड़े हारूने दे वंशे दे हन, तिसियो जरूरी नीं ऐ कि हर रोज पैहल्ले अपणे पापां कने भिरी लोकां दे पापां तांई बलिदान चढ़ां। क्जोकि यीशुयैं इक्की बरी अपणे आप्पे जो लोकां दे पापां तांई बलिदान करी दित्या।

²⁸क्जोकि मूसा दी व्यबस्था तां कमजोर माणुआं जो महायाजक बणांदी ऐ, अपर जेह्ड़ी कसम परमात्मे व्यबस्था दे बाद खादी, सैह़ परमात्मे दे पुत्तरे जो महायाजक बणांदी ऐ, कने सैह़ सदा तांई अहां बासती सिद्ध महायाजक बणी गेआ ऐ।