Read Kangri इब्रानियों 8 Bible Online

इब्रानियों 8 - Kangri bible

इब्रानियों 8

¹हुण जेह्ड़ियां गल्लां अहां ग्ला दे हन, तिन्हां च सारेयां ते बड्डी सच्चाई एह़ ऐ, कि अहां दा ऐदेया महायाजक ऐ, जेह्ड़ा सुअर्गे पर परम प्रधान परमात्मे दे सिंहासणे दे सज्जे बक्खे जाई बैठेया ऐ।

²अहां दा महायाजक बड़ी पवित्र जगाह कने तिस सच्चे तम्बुये दा सेवक ऐ, जिसियो कुणी माणुये नीं, अपर परमात्मे बणाई रखेया ऐ।

³हर इक्क महायाजके जो पापां दी माफी तांई भेंट कने बलिदान चढ़ाणे तांई चुणेया जांदा ऐ, इसा बज़ाह ते जरूरी ऐ, अहां दे महायाजक यीशुये अल्ल भी कुच्छ चढ़ाणे तांई होयैं।

⁴जे यीशु मसीह धरतिया पर हुंदा तां सैह़ कदी याजक नीं हुंदा, क्जोकि ऐत्थु मूसा दिया व्यबस्था मताबक भेंट चढ़ाणे आल़े याजक तां हन।

⁵एह़ सैह़ याजक हन, जेह्ड़े सिर्फ सुअर्गे दी चीज्जां दी नकल कने परछाईया दी अराधना करदे हन। क्जोकि जाह़लू मूसा तम्बू बणाणा लगेया था, तां तिसियो एह़ चतौणी मिल्ली, “दिक्ख जेह्ड़ा नक्सा मैं तिज्जो सीनै प्हाड़े पर दस्सेया था, तिसदे मताबक सब कुच्छ बणाणा।”

⁶अपर हुण जेह्ड़ा याजक दा कम्म यीशु मसीह जो दित्या ऐ, तिसियो तिन्हां याजकां ते बधी करी सेवा दे कम्म मिल्ले हन। क्जोकि सैह़ होर भी म्हान वादे दा बचौला बणेया, जेह्ड़ा पैहल्ले वादे दे साहरे बन्नी रखेया ऐ।

⁷जे सैह़ पैहल्ला वादा बेकसूर हुंदा, तां दूये वादे दी जरूरत ई नीं हुंदी।

⁸अपर परमात्मा लोकां पर दोस लगाई नैं ग्लांदा ऐ, “प्रभुयैं ग्लाया, दिक्ख, सैह़ दिन ओआ दे हन, कि मैं इस्राएल देसे दे लोकां सौगी कने यहूदा दे लोकां सौगी इक्क नौआं वादा करगा।

⁹एह़ तिस वादे साइआं नीं हुंगा, जेह्ड़ा मैं तिन्हां दे पूर्वजां सौगी तिस बग्त कित्या था, जाह़लू मैं तिन्हां दा हत्थ पकड़ी करी तिन्हां जो मिस्र देसे ते कड्डी नैं लेई आया, क्जोकि सैह़ मेरे वादे पर बणी नीं रैह्, इसतांई मैं तिन्हां दा ध्यान रखणा छड्डी दित्ता। प्रभु ऐई ग्लांदा ऐ।

¹⁰भिरी प्रभु ग्लांदा ऐ, कि जेह्ड़ा नौआं वादा तिन्हां दिनां च जाह़लू मैं ओंगा ताह़लू इस्राएल देसे दे लोकां सौगी करगा, सैह़ एह़ ऐ, कि मैं अपणिया व्यबस्था जो तिन्हां दे मनां च पांगा, कने सैह़ तिन्हां दे दिलां च लिखगा, कने मैं तिन्हां दा परमात्मा हुंगा, कने सैह़ मेरे लोक हुंगे।

¹¹कने हर इक्क अपणे देसवासियां जो कने अपणे भाऊआं जो एह़ सिक्षा नीं दिंगा, कि ‘तू प्रभु जो पणछैण।’ क्जोकि लोक्केयां ते कने बड्डेयां ते लेई नैं सारे मिन्जो जाणी लैंगे।

¹²क्जोकि मैं तिन्हां दे बुरे कम्मां माफ करी दिंगा, कने तिन्हां दे पापां जो भिरी याद नीं करगा।”

¹³परमात्मे इसियो नौआं वादा ग्लाया, कने तिन्हीं पैहल्ले वादे जो पराणा बणाई दित्ता; कने जेह्ड़ी चीज्ज पराणी कने खराब होई जांदी ऐ तिसादा खत्म होई जाणा जरूरी ऐ।