Read Kangri याकूब 1 Bible Online

याकूब 1 - Kangri bible

याकूब 1

¹मैं याकूब जेह्ड़ा परमात्मे दा कने प्रभु यीशु मसीह दा दास एह़ चिठ्ठी तिन्हां बारांह गोत्रां जो लिखदा ऐ, जेह्ड़े संसारे च तितर-बितर होई नैं रैंह्दे हन, मेरा तिन्हां जो नमस्कार।

²हे मेरे प्यारे साथी बसुआसियो, जाह़लू तुहां हर किस्मां दियां परीक्षां च पोन, तां इन्हां परीक्षां जो बड़िया खुसिया दी गल्ल समझा।

³क्जोकि तुहां जाणदे हन, कि जाह़लू तुहां दा बसुआस परखेया जांदा ऐ, तां तुहां बड़े सबरे नैं परमात्मे पर बसुआस रखी नैं परीक्षां जो झेलदे हन।

⁴अपर तुहां जो हर किस्मां दियां परीक्षां च सबर करणा सीखणा चाइदा, कि तुहां आत्मिकता च पक्के कने सिद्ध होई जान, कने तुहां दे सभावे च कने चाल-चलणे च कोई कमी ना रैंह्।

⁵अपर जे तुहां च कुसी जो बुद्धिया दी कमी होयैं, तां सैह़ परमात्मे ते प्रार्थना करी नैं मंगे, जेह्ड़ा बिना कुच्छ ग्लाये खुसिया नैं दिंदा ऐ; कने परमात्मा सबना जो दिंदा ऐ।

⁶अपर जाह़लू तुहां परमात्मे ते मंगदे हन, तां बसुआसे नैं मंगा, कने कुच्छ शक मत करा, क्जोकि शक करणे आल़ा समुंदरे दिया तिसा लैहरा साइआं ऐ, जेह्ड़ी हौआ नैं चलदी कने उछल़दी ऐ।

⁷ऐदेया माणु एह़ ना समझैं कि मिन्जो प्रभु ते कुच्छ मिलगा,

⁸सैह़ माणु दोगला ऐ, कने अपणियां सारियां गल्लां च पक्का नीं ऐ,।

⁹बसुआसी भाऊ जेह्ड़े गरीब हन, तिन्हां जो एह़ सोची करी खुस होणा चाइदा, कि सैह़ परमात्मे तांई खास हन,

¹⁰कने जेह्ड़े अमीर हन, तिन्हां जो अपणिया दीनता च खुस होणा चाइदा, तिन्हां दी अमीरी जंगली फूले साइआं खत्म होई जांगी।

¹¹क्जोकि सूरजे घरूंदे ई तेज धूप पोंदी ऐ कने घाऐ जो सकाई दिंदी ऐ, कने तिन्हां दे फूल कने पत्तर झड़ी जांदे हन, कने तिन्हां दी सुन्दरता खत्म होई जांदी ऐ। इस तरीके नैं अमीर माणु भी अपणे ज़िन्दगी दे कम्मां च नठ्ठ-भज्ज करदे-करदे धूड़ी च मिल्ली जांगा।

¹²धन ऐ सैह़ माणु, जेह्ड़ा परीक्षा च पक्का रैंह्दा ऐ, क्जोकि सैह़ परीक्षा च सफल होई नैं सदा दी ज़िन्दगिया दा सैह़ मुकट पांगा जेह्ड़ा वादा परमात्मे अपणे प्यार करणे आल़ेआं नैं कित्या ऐ।

¹³जाह़लू कुस्की दी परीक्षा होयैं, तां सैह़ एह़ ना ग्लां, “कि मेरी परीक्षा परमात्मे दे पास्से ते हुंदी ऐ।” क्जोकि ना तां परमात्मे जो कोई परीक्षा च पाई सकदा ऐ, कने ना सैह़ अप्पु कुसी जो परीक्षा च पांदा ऐ।

¹⁴अपर हर माणु अपणियां बुरिआं इच्छां च पेई करी कने फसी करी, अप्पु ई परीक्षा च पोंदा ऐ।

¹⁵भिरी बुरी इच्छा मने च पैदा होई नैं पापे जो जन्म दिंदी ऐ, कने पाप जाह़लू बधी जांदा ऐ, तां इसदा नतीजा सदा दी मौत्त ऐ।

¹⁶हे प्यारे साथी बसुआसियो, धोखे च मत रेह्आ।

¹⁷क्जोकि हर इक्क खरा वरदान कने हर इक्क बड़ा उत्तम दान परमात्मे दे पास्से ते मिलदा ऐ, जेह्ड़ा जोतियां दा पिता ऐ। कने परमात्मा हमेसा इक्को देहया ई ऐ, कने सैह़ ढोरे साइआं नीं बदलदा।

¹⁸तिन्हीं अपणिया इच्छा दे मताबक अहां जो सच्चाई दे वचनां दे जरिये नौई ज़िन्दगी दित्तियो ऐ, तांजे अहां सारियां चीज्जां च जेह्ड़ियां परमात्मे बणाईयां हन तिन्हां च खास होन, जिंआं फसला दा पैहल्ला फल़ खास हुंदा ऐ।

¹⁹हे प्यारे साथी बसुआसियो, एह़ गल्ल तुहां जाणी लेआ; हर इक्क माणु सुणने तांई तौल़ करणे आल़ा कने ग्लाणे च सबर रखणे आल़ा कने गुस्से च देर करणे आल़ा होयैं,

²⁰क्जोकि जाह़लू इक्क माणु गुस्सा करदा ऐ, तां सैह़ धार्मिकता दे कम्म नीं करदा, जेह्ड़ा परमात्मा तिसते चांह़दा ऐ।

²¹इसतांई सारे मनां दे मैल कने बैर बरोधां दी बढ़तिया जो दूर करी नैं, परमात्मे दे वचनां जो नम्रता नैं मन्नी लेआ, जेह्ड़ा मने च रखेया ऐ सैई तुहां दे प्राणा दा उद्धार करी सकदा ऐ।

²²अपर परमात्मे दे वचनां दा पालण करणे आल़े बणा, कने सिर्फ सुणने आल़े ई नीं जेह्ड़े अपणे आप्पे जो धोखा दिंदे हन।

²³क्जोकि जेह्ड़ा कोई वचनां जो सुणने आल़ा होयैं कने तिन्हां पर चलणे आल़ा ना होयैं, तां सैह़ तिस माणु साइआं ऐ जेह्ड़ा अपणा असली चेहरा सीशे च दिक्खदा ऐ।

²⁴कि सैह़ अपणे आप्पे जो दिक्खी नैं चली जांदा कने बड़ी तौल़ी भुल्ली जांदा ऐ कि मैं कदेया था।

²⁵अपर जेह्ड़ा माणु परमात्मे दे वचनां जो जेह्ड़े पापां ते अजादी दिंदा ऐ, तिसियो ध्याने नैं सिखदा कने सुणदा ऐ, सैह़ माणु अपणे कम्मे च इसतांई आसीष पांगा कि तिसियो सुणी करी भुलदा नीं अपर तिंआं ई तिसदा पालण करदा भी ऐ।

²⁶जे कोई अपणे आप्पे जो परमात्मे दा भक्त समझैं, कने अपणिया जीभा पर लगाम ना दैं, अपर अपणे मने जो धोखा दैं, तां तिसदी भक्ति बेकार ऐ।

²⁷अहां दे पिता परमात्मे दे सामणै सुद्ध कने सच्ची भक्ति एह़ ऐ कि अनाथां कने बिधवां दे दुखां च तिन्हां दा ख्याल रखन, कने अपणे आप्पे जो संसारे दे बुरे कम्मां ते बचाई करी रखन।