Read Kangri याकूब 2 Bible Online

याकूब 2 - Kangri bible

याकूब 2

¹हे प्यारे साथी बसुआसियो, तुहां अहां दे महिमायुक्त प्रभु यीशु मसीह दे चेले हन, इसतांई तुहां च भेदभाव ना होयैं।

²जरा सोचा जे इक्क माणु सोन्ने दे छल्ले कने छैल़ कपड़े पैहनी करी तुहां दिया कलीसिया च औयें, कने इक्क गरीब भी मैल्ले कुचैले कपड़े पैहनी करी औयें,

³तां तुहां तिस छैल़ कपड़े आल़े जो दिक्खी नैं ग्लान, “कि तुहां ऐत्थु खरिया जगाह च बैठा,” कने तिस गरीबे जो ग्लान, “तू ऐत्थु खड़ोई रैह्,” या “मेरे पैरां अल्ल थल्लैं बैठ।”

⁴तां क्या तुहां ऐत्थु भेदभाव नीं कित्ता कने बुरा बचार करी नैं न्याय करणे आल़े नीं होये?

⁵हे प्यारे साथी बसुआसियो, सुणा। क्या परमात्मैं इस संसारे दे गरीबां जो नीं चुणेया कि सैह़ बसुआसे च अमीर, कने तिस राज्जे दे अधिकारी बणन, जेह्ड़ा वादा परमात्मे तिन्हां नैं कित्ता ऐ, जेह्ड़े तिस नैं प्यार रखदे हन?

⁶अपर तुहां तिस गरीबे दी बेज्जती कित्ती। क्या अमीर लोक तुहां पर जुल्म नीं करदे कने क्या सैई तुहां जो घसीटी-घसीटी कचेहरियां जो नीं लेई जांदे?

⁷क्या सैह़ यीशु मसीह दे नांऐ दी निंदा नीं करदे, जेह्ड़ा म्हान नां तुहां दी पणछैण ऐ?

⁸भिरी भी जे तुहां पवित्रशास्त्रे दे वचनां मताबक, “तू अपणे प्ड़ेसिये नैं अपणे साइआं प्यार रख,” सच्च बिच्च तिस राज व्यबस्था जो पूरी करदे हन, तां खरा ई करदे हन।

⁹अपर जे तुहां भेदभाव करदे हन तां पाप करदे हन; कने व्यबस्था तुहां जो दोसी बणादी ऐ।

¹⁰क्जोकि जेह्ड़ा कोई पूरिया व्यबस्था दा पालण करदा ऐ अपर इक्की भी हुक्मे जो नीं मनदा ऐ तां सैह़ सारियां गल्लां च दोसी बणदा ऐ।

¹¹इसतांई कि जिन्हीं एह़ ग्लाया, “तू ब्यभिचार मत करणा।” कने तिन्हीं एह़ भी ग्लाया, “तू हत्या मत करणा,” इसतांई जे तैं ब्यभिचार तां नीं कित्ता, अपर हत्या कित्ती तमी तू व्यबस्था जो नीं मन्नणे आल़ा बणेया।

¹²तुहां तिन्हां लोकां साइआं वचन ग्ला, कने तिंआं ई कम्म भी करा, जिन्हां दा न्याय परमात्मे दे वचनां मताबक हुंगा, जेह्ड़े पापां ते अजादी दिंदे हन।

¹³क्जोकि जिन्हीं दया नीं कित्ती, तिसदा न्याय होणे पर कोई दया नीं होणी। दया न्याय पर जयवंत होई ऐ।

¹⁴हे प्यारे साथी बसुआसियो, जे कोई ग्लां कि मिन्जो प्रभु यीशु मसीह च बसुआस ऐ अपर सैह़ खरे कम्म नीं करदा ऐ, तां इसते क्या फायदा? क्या ऐदेया बसुआस कदी तिसदा उद्धार करी सकदा ऐ?

¹⁵जे कोई बसुआसी भाऊ या बैह्णी अल्ल पैहनणे जो कपड़े कने खाणे जो कुच्छ नीं होयैं,

¹⁶कने तुहां च कोई तिन्हां नैं ग्लां, “तुहां खुस होई नैं जा, गरम-गरम कपड़े पैहना, कने पेट भरी खा,” अपर जेह्ड़ियां चीज्जां सरीरे तांई जरूरी हन सैह़ तुहां तिन्हां जो ना दैंन, तां क्या फायदा?

¹⁷तिंआं ई बसुआस भी, जे खरे कम्मां सौगी ना होयैं तां अपणे सभावे च मरेया ऐ।

¹⁸जे कोई ग्लांदा ऐ, “कि तिज्जो अल्ल बसुआस ऐ कने मैं खरे कम्म करदा ऐ,” अपर मैं ग्लांदा ऐ, तू अपणा बसुआस मिन्जो खरे कम्मां ते बगैर तां दस्स; कने मैं अपणा बसुआस अपणे खरे कम्मां दे जरिये तिज्जो दस्सगा।

¹⁹तिज्जो बसुआस ऐ कि इक्को ई परमात्मा ऐ; कने तू खरा करदा ऐ। अपर दुष्टआत्मां भी बसुआस रखदियां कने कमदियां हन।

²⁰हे मूर्ख माणुआ, क्या तिज्जो एह़ भी नीं पता कि खरे कम्म कित्ते बगैर बसुआस बेकार ऐ?

²¹क्या अहां दा पूर्वज अब्राहम अपणे खरे कम्मां दिया बज़ाह ते धर्मी नीं बणेया, जाह़लू तिन्हीं वेदिया पर अपणे जागते इसहाके जो चढ़ाया?

²²तां तैं दिक्खी लेआ कि बसुआसैं तिसदे खरे कम्मां सौगी मिल्ली नैं असर दस्सेया ऐ, कने खरे कम्मां ते बसुआस सिद्ध होएया।

²³कने पवित्रशास्त्रे दा एह़ वचन पूरा होएया, “अब्राहमे परमात्मे पर बसुआस कित्ता, कने इस बसुआसे दिया बज़ाह ते सैह़ धर्मी बणेया,” कने सैह़ परमात्मे दा मित्र कैहलाया।

²⁴इसी तरीके नैं तुहां दिक्खी लेआ कि माणु सिर्फ बसुआसे ते ई नीं, अपर खरे कम्मां सौगी भी धर्मी बणदा ऐ।

²⁵तिंआं ई राहाब वैश्या भी, जाह़लू तिन्नै संदेसा दैणे आल़ेआं जो अपणे घरैं च रैहणे जो जगाह दित्ती, कने तिन्नै तिन्हां जो दुश्मणा ते बचाणे तांई दूये रस्ते ते घल्ली दित्ता, तां क्या सैह़ खरे कम्मां दिया बज़ाह ते धर्मी नीं बणी?

²⁶तां इसी तरीके नैं सरीर आत्मा बगैर मरेया ऐ, तिंआं ई बसुआस भी खरे कम्मां बगैर मरेया ऐ।