Read Kangri 1 पतरस 1 Bible Online

1 पतरस 1 - Kangri bible

1 पतरस 1

¹मैं शमौन पतरस जेह्ड़ा यीशु मसीह दा प्रेरित ऐ। मैं एह़ चिठ्ठी तिन्हां परदेसियां दे नांऐ पर लिखा दा ऐ, जेह्ड़े पुन्तुस, गलातिया, कप्पदूकिया, आसिया प्रदेस कने बितुनिया प्रदेसे च तितर-बितर होई नैं रैंह्दे हन,

²पिता परमात्मे बड़ी पैहल्ले ते तुहां जो अपणे लोक होणे तांई कने पवित्र आत्मा दे जरिये पवित्र करणे तांई फैसला लेई लेआ था, तिन्हीं एह़ तां कित्ता कि तुहां यीशु मसीह जो मनन कने तिसदे खूने दे जरिये सुद्ध होन। मैं प्रार्थना करदा ऐ, कि परमात्मा तुहां जो बड़ा जादा अनुग्रह कने सांति दिंदा रैंह्।

³अहां परमात्मे दा धन्यावाद करदे हन, जेह्ड़ा अहां दे प्रभु यीशु मसीह दा पिता ऐ, जिन्हीं अपणी बड़ी दया नैं अहां जो नौई ज़िन्दगी दित्ती, क्जोकि परमात्मे यीशु मसीह जो मरेयां ते जिन्दा कित्ता, कने तिन्हीं अहां जो निडर होई नैं जीणे दे काबल बणाया, सैह़ एह़ कि अहां नैं तिन्हीं जिन्हां चीज्जां जो दैणे दा वादा कित्या ऐ, तिन्हां जो हासल करणे तांई अहां पूरी आस रखी सकन,

⁴ग्लाणे दा मतलब ऐ कि जेह्ड़ियां चीज्जां तुहां तांई सुअर्गे च रखियां हन, सैह़ ना तां कदी खराब, ना नास, कने ना गायब हुंगिया;

⁵कने तुहां दे बसुआसे दिया बज़ाह ते परमात्मा तुहां जो अपणी सामर्थी दे जरिये ताह़लू तिकर बचा दा ऐ, जाह़लू तिकर तुहां तिस उद्धारे जो हासल नीं करी लैन, जेह्ड़ा तिस आखरी दिने जो प्रगट होणे तांई त्यार ऐ, तांजे सारे तिसियो दिक्खी सकन।

⁶तुहां जो इन्हां सारियां गल्लां च खुस होणा चाइदा, बेसक हुण तुहां थोड़े बग्ते तांई लग्ग-लग्ग दुखां दिया बज़ाह ते दुखी हन।

⁷इन्हां दुखां दा मकसद एह़ दस्सणा ऐ कि तुहां सच्च बिच्च परमात्मे पर भरोसा रखदे हन कि नीं, तुहां दा यीशु मसीह पर बसुआस सोन्ने ते भी बड़ा जादा कीमती ऐ, ठीक तिंआं ई जिंआं इक्क नास होणे आल़ा सोन्ना अग्गी च परखेया जांदा ऐ, तांजे तुहां दा बसुआस भी इन्हां दुखां दे बावजूद मजबूत रैंह्, तां यीशु मसीह दे बापस ओणे आल़े दिने च एह़ तुहां तांई तारीफ, महिमा कने आदरे दी बज़ाह हुंगा।

⁸बेसक तुहां प्रभु जो नीं दिख्या ऐ, भिरी भी तिस नैं प्यार रखदे हन, कने हुण तुहां तिसियो इस बग्त नीं दिक्खा दे हन, अपर तुहां तिस च बसुआस करदे हन, इसतांई तुहां खुसिया नैं बड़े भरी मग्न हुंदे हन, जेह्ड़ा महिमा नैं भरोया ऐ, कने जिसदा सब्दां च बखान करणा मुस्कल ऐ।

⁹तिस पर बसुआस करणे दा नतीजा एह़ हुंगा, कि तुहां दी आत्मा उद्धार पाई सकैं।

¹⁰इसी उद्धारे दे बारे च तिन्हां भविष्यवक्तां अपणिया भविष्यवाणियां च तुहां पर होणे आल़े अनुग्रह दे बारे च बड़ी छाण-बीण कने जांच पड़ताल कित्ती।

¹¹मसीह दी आत्मा तिन्हां च थी, कने एह़ दस्सा दी थी कि किंआं मसीह दुख झेलगा कने किंआं तिसियो महिमा मिलगी। इसतांई तिन्हां एह़ छाण-बीण कित्ती कि मसीह सच्च बिच्च कुण हुंगा कने एह़ कुस बग्त हुंगा?

¹²अपर परमात्मे तिन्हां भविष्यवक्तां जो एह़ ग्लाया, कि तिन्हां दियां गल्लां तिन्हां तांई नीं, अपर तुहां तांई हन, सैह़ सुसमाचार यीशु मसीह दे बारे च ऐ जेह्ड़ा तुहां हुण सुणेया ऐ। परमात्मे तुहां जो सुसमाचार सणाणे तांई सुअर्गे ते पवित्र आत्मा घल्ली नैं लोकां दी मदत कित्ती, कने एह़ बड़ी अनोखी गल्ल ऐ कि सुअर्गदूत भी बड़े चाये नैं इन्हां चीज्जां जो हुंदे दिक्खा दे हन।

¹³इसतांई अपणे-अपणे मनां जो त्यार करा, ठीक तिंआं ई जिंआं लोक कम्म करणे तांई अपणे लक्के जो बैल्टा नैं कसदे हन, कने तिस उद्धारे दी आस करदे रेह्आ, जेह्ड़ा अनुग्रह दे जरिये तुहां जो दित्ता जांगा, जाह़लू यीशु मसीह इस संसारे च बापस ओंगा।

¹⁴जिंआं बच्चे अपणे बुढ़े दियां गल्लां मनदे हन, तिंआं ई तुहां भी परमात्मे दे हुक्मां जो मन्ना, क्जोकि तुहां भी तिसदे बच्चे हन, तिन्हां बुरे कम्मां जो मत करा, जिन्हां जो तुहां परमात्मे दिया सच्चाईया जो जाणने ते पैहल्ले करणे दी इच्छा रखदे थे।

¹⁵अपर परमात्मा जिन्हीं तुहां जो सद्देया ऐ, सैह़ पवित्र ऐ, तिंआं ई तुहां भी तिन्हां सारियां गल्लां च जेह्ड़ियां तुहां करदे हन, पवित्र बणा।

¹⁶क्जोकि पवित्रशास्त्रे च ग्लाया ऐ, कि “तुहां पवित्र बणा, जिंआं मैं पवित्र ऐ।”

¹⁷परमात्मा जाणदा ऐ कि हर माणुये क्या कित्या ऐ, कने सैह़ सारेयां दा बिना भेदभाव करी नैं न्याय करदा ऐ। जाह़लू तुहां परमात्मे नैं प्रार्थना करदे हन, तां तिसियो पिता ग्लांदे हन। इसतांई जाह़लू तुहां इस संसारे च परदेसियां साइआं रैंह्दे हन तां तिसदी हमेसा इज्जत करा।

¹⁸क्जोकि तुहां जाणदे हन, कि परमात्मे तुहां जो बुरे बर्ताबे ते छड्डाई लेआ, जेह्ड़ा तुहां अपणे पूर्वजां ते सिखया। तिन्हीं तुहां जो बचाणे तांई नास होणे आल़े सोन्ने चाँदी दा इस्तेमाल नीं कित्ता। अपर परमात्मे मसीह दे कीमती खूने दे जरिये तुहां जो बचाया ऐ, जेह्ड़ा पवित्र कने बेकसूर भेड्डा दे बच्चे साइआं ऐ।

²⁰इस संसारे जो बणाणे ते पैहल्ले ई परमात्मे यीशु मसीह दे बारे एह़ फैसला पैहल्ले ई करी लेआ, कि सैह़ इस संसारे दा उद्धारकर्ता हुंगा, अपर सैह़ हुण इन्हां आखरी दिनां च तुहां तांई प्रगट होएया।

²¹यीशु मसीह दे जरिये तुहां परमात्मे पर बसुआस करदे हन, तांजे तुहां दा बसुआस कने आसा तिस परमात्मे पर होयैं, जिन्हीं मसीह जो मरेयां ते जिन्दा कित्ता कने तिसियो महिमा दित्ती।

²²क्जोकि तुहां सच्चाईया जो मन्नणे दे जरिये पवित्र कित्ते गै, तां हुण तुहां जो अपणे बसुआसी भाऊआं सौगी प्यार करणा चाइदा, इक्की दूये नैं लगातार मन लाई नैं कने बड़ी इमानदारिया नैं प्यार करदे रेह्आ।

²³तुहां एह़ ज़िन्दगी परमात्मे दे पास्से ते नौई हासल कित्तियो ऐ, क्जोकि तुहां जो एह़ ज़िन्दगी तिसा चीज्जा दे जरिये हासल नीं कित्ती, जेह्ड़ी नास होई जांदी ऐ, अपर तिसा चीज्जा जरिये जेह्ड़ी सदा बणी रैंह्दी ऐ, कने सैह़ चीज्ज परमात्मे दा जिन्दा कने हमेसा रैहणे आल़ा वचन ऐ।

²⁴क्जोकि पवित्रशास्त्रे च लिख्या ऐ: “सारे लोक घाऐ साइआं हन, कने तिन्हां सारेयां दी खूबसूरती जंगली फूलां साइआं ऐ। घाह सुकी जांदा ऐ, कने फूल झड़ी जांदे हन,

²⁵अपर प्रभु दा वचन जुगा-जुग मजबूत बणी रैंह्दा ऐ।” कने ऐई सुसमाचारे दा सैह़ वचन ऐ जेह्ड़ा प्रभु यीशु मसीह दे बारे च तुहां जो सणाया था।