Read Kangri 1 पतरस 2 Bible Online

1 पतरस 2 - Kangri bible

1 पतरस 2

¹इसतांई हर किस्मा दा बैरभाव, सारे छल, कपट, जल़ण कने निंदा जो दूर करी नैं,

²तुहां च परमात्मे दे वचने जो सीखणे दी इच्छा होणी चाइदी, ठीक तिंआं ई जिंआं इक्क दुद पीणे आल़ा बच्चा अपणिया माँऊ ते दूदे दी इच्छा रखदा ऐ, तांजे तुहां आत्मिकता च मजबूत होई जान। ताह़लू परमात्मा तुहां जो इस संसारे दे बुरे कम्मां ते पूरे तरीके नैं बचाई लैंगा।

³क्जोकि पवित्रशास्त्रे च लिख्या ऐ, “तुहां एह़ मसूस कित्ता, कि प्रभु भला ऐ।”

⁴जिंआं तुहां तिस अल्ल ओंदे हन, जेह्ड़ा जिन्दा पत्थर ऐ, जिसियो लोकां तां छड्डी दित्ता, अपर परमात्मे तांई सैह़ कीमती कने जिन्दा पत्थर ऐ, जिसियो तिन्हीं चुणेया ऐ।

⁵तुहां भी जिन्दे पत्थरां साइआं हन, जिन्हां दा आत्मिक घर बणाणे तांई इस्तेमाल होआ दा ऐ। तुहां पवित्र याजकां दा समाज भी हन, कने प्रभु यीशु मसीह दिया मदता नैं ऐदेय बलिदान चढ़ांगे, जेह्ड़े परमात्मे जो खुस करदे हन।

⁶जिंआं पवित्रशास्त्रे च परमात्मा ग्लांदा ऐ: “दिक्खा, कि मैं कीमती पत्थरे जो चुणेया ऐ, जिसदा इस्तेमाल यरूशलेम सैहरे च मजबूत घर बणाणे तांई हुंदा ऐ; कने जेह्ड़ा कोई तिस पर बसुआस करगा, सैह़ कुसी भी तरीके नैं सर्मिंदा नीं हुंगा।”

⁷एह़ पत्थर तुहां तांई जेह्ड़े यीशु मसीह पर बसुआस करदे हन बड़ा भरी कीमती ऐ, अपर पवित्रशास्त्र तिन्हां लोकां दे बारे च जेह्ड़े बसुआस नीं करदे एह़ ग्लांदा ऐ: “जिस पत्थरे जो राजमिस्त्रियां बेकार समझेया था, सैई कुणे दा सिरा बणी गेआ,”

⁸कने पवित्रशास्त्र एह़ भी ग्लांदा ऐ: “एह़ पत्थर लोकां जो ठोकर लगणे दी कने थल्लै पोणे दी बज़ाह बणगा,” सैह़ इसतांई ठोकर खांदे हन, कि सैह़ परमात्मे दे वचनां जो नीं मनदे, कने परमात्मे तिन्हां सौगी इआं होणे दी योजना बणाई।

⁹अपर तुहां इन्हां साइआं नीं हन, क्जोकि तुहां इक्क चुणेया वंश, साही परवार, याजकां दा समाज, पवित्र लोक, कने परमात्मे दे खास लोक हन, क्जोकि तिन्हीं तुहां जो नेहरे ते सद्दी करी जोतिया च लंदेया ऐ, तांजे तुहां परमात्मे दे म्हान कम्मां जो दस्सी सकन।

¹⁰तुहां पैहल्लैं परमात्मे दे लोक नीं थे, अपर हुण तुहां परमात्मे दे लोक हन; पैहल्लैं तुहां परमात्मे दिया दया नीं जो नीं जाणदे थे अपर हुण तुहां जाणदे हन, क्जोकि तिन्हीं अपणी दया तुहां पर कित्ती ऐ।

¹¹हे प्यारे साथी बसुआसियो, मैं तुहां नैं विणती करदा ऐ कि तुहां अपणे आप्पे जो परदेसी कने मुसाफिर जाणी करी तिन्हां संसारे दियां बुरिआं इच्छां ते बची रेह्आ, क्जोकि सैह़ तुहां दे खलाफ लड़ाई करदियां हन।

¹²जेह्ड़े लोक परमात्मे पर बसुआस नीं करदे, सैह़ तुहां जो एह़ ग्लाई नैं बदनाम करी सकदे हन, कि तुहां गलत करा दे हन, अपर तुहां ऐदई ज़िन्दगी जीआ, जिसते सैह़ तुहां च खरियां गल्लां दिक्खन, कने जाह़लू प्रभु यीशु मसीह इस संसारे च बापस ओंगा, तां सैह़ ताह़लू परमात्मे जो महिमा दैन।

¹³प्रभु यीशु मसीह जो इज्जत दैणे तांई तुहां जो इस संसारे दे सारे अधिकारियां दे अधीन होणा चाइदा, सैह़ चां राजा या बड्डा अधिकारी होयैं,

¹⁴या कोई हाकम, क्जोकि सैह़ तां घल्लेयो हन, जेह्ड़े गलत करदे हन तिन्हां जो सज़ा देई सकन, कने जेह्ड़े खरा करदे हन तिन्हां दी तारीफ करी सकन।

¹⁵क्जोकि परमात्मे दी इच्छा ऐई ऐ, कि तुहां खरे कम्म करी नैं मूर्ख लोकां दा मुँ बंद करी देआ, जेह्ड़े बेकार दियां गल्लां करदे रैंह्दे हन।

¹⁶अपणे आप्पे जो अजाद समझा, अपर अपणिया इसा अजादिया जो बुराईया दा जरिया मत बणा; अपर अपणे आप्पे जो परमात्मे दे दास समझी नैं चला।

¹⁷साबना दी इज्जत करा, बसुआसी बैह्णी-भाऊआं नैं प्यार रखा, परमात्मे ते डरा, कने बड्डे अधिकारियां दी इज्जत करा।

¹⁸हे घरां च कम्म करणे आल़े दासो, तुहां जेह्ड़े बसुआसी हन, अपणे मालकां दी गल्ल मन्ना, कने तिन्हां दी इज्जत करा। हर किस्मा दे मालके नैं इआं ई करा, चाहे सैह़ खरा, समझदार, या भिरी बेरैहम क्जो ना होयैं।

¹⁹बेसक दूये लोक तुहां दी कोई गलती नीं होणे दे बावजूद भी तुहां नैं बुरा बर्ताब करदे कने तुहां जो दुख दैन, तां तिसियो खुसिया नैं झेला, क्जोकि तुहां जाणदे हन कि परमात्मा सब कुच्छ जाणदा ऐ, कने सैह़ तुहां जो आसीष दिंगा।

²⁰जे बुरा करणे दिया बज़ाह ते तुहां जो कोई दुख दैं, तां तुहां दे तिस दुखे च तुहां दा सबर रखणा कोई बड़ी बड्डी गल्ल नीं ऐ, अपर जे तुहां खरे कम्मां दिया बज़ाह ते दुख झेलदे हन, कने तिन्हां च सबर रखदे हन, तां परमात्मा इसते खुस हुंदा ऐ।

²¹कने परमात्मे दी तुहां जो सदणे दी बज़ाह एह़ ऐ, कि तुहां तिस तांई दुख झेलन, मसीह भी जिन्हीं तुहां तांई दुख झेलेया, सैह़ तुहां तांई इक्क उदारण ऐ, इसतांई जेह्ड़ा तिन्हीं कित्ता, तुहां जो भी तिंआं ई करणा चाइदा।

²²ना तां तिन्हीं कोई पाप कित्ता, कने ना तिन्हीं कदी कुसियो धोखा दित्ता।

²³जाह़लू लोकां मसीह दी बेइज्जती कित्ती, तां तिन्हीं तिन्हां जो बापस कुच्छ नीं ग्लाया, कने जाह़लू लोकां तिसियो दुख दित्ता, तां तिन्हीं कदी भी तिन्हां ते बदला लैणे दी कोसस नीं कित्ती, अपर इसदिया जगाह तिन्हीं परमात्मे पर भरोसा कित्ता, कि सैह़ तिसदी मदत करैं, मसीह जाणदा था कि परमात्मा हमेसा लोकां दा धार्मिकता नैं न्याय करदा ऐ।

²⁴मसीयैं सूल़िया पर अप्पु ई अपणे सरीरे च अहां दे पाप लेई लै, तांजे अहां पापां तांई मरी नैं धार्मिकता तांई ज़िन्दगी जीन, कने तिसदे ई जख्मां दे जरिये अहां खरे होये।

²⁵तुहां पैहल्लैं भटकियां भेड्डां साइआं गलत रस्ते पर जा दे थे, अपर हुण तुहां मसीह दे पास्से बापस आई गियो हन, जेह्ड़ा तुहां दा गुआल़ा कने रखवाल़ा ऐ, कने तुहां दी देखभाल करदा कने तुहां पर अपणी नजर रखदा ऐ।