Read Kangri 1 पतरस 3 Bible Online

1 पतरस 3 - Kangri bible

1 पतरस 3

¹हे लाड़ियों, अपणे-अपणे लाड़े दे इआं अधीन रेह्आ। जिसते कि जे तिन्हां च कोई परमात्मे दे वचने पर बसुआस करणे ते मन्ना करैं, तांजे सैह़ तुहां दे बिना कुच्छ ग्लांये तुहां दे सभावे जो दिक्खी करी बसुआस करी सकन। क्जोकि सैह़ दिक्खगियां कि तुहां कितणे सच्चे मने नैं परमात्मे दी अराधना करदे हन।

³कने अपणे आप्पे जो खुबसूरत बणाणे दी कोसस मत करा, जिंआं कि बाल़ लग्ग-लग्ग तरीके नैं बणाणा, कने सोन्ने मोतिआं दे मैंह्गे-मैंह्गे गैहणे पाणा, या बणंदे-बणंदे कपड़े लगाणा।

⁴अपर अपणे खरे कने सांत मने दे जरिये अंदरे ते खुबसूरत बणां, ऐदई खूबसूरती आखरी तिकर बणी रैंह्दी ऐ, कने परमात्मे दिया नजरा च एह़ बड़ी खास ऐ।

⁵पराणे जमाने च पवित्र जणासा भी, जेह्ड़ियां परमात्मे पर आस रखदियां थियां, अपणे आप्पे जो इसी तरीके नैं सवांरदियां कने अपणे-अपणे लाड़े दे अधीन रैंह्दियां थियां।

⁶जिंआं सारा अब्राहमे दे अधीन रैंह्दी थी, कने तिसियो स्वामी ग्लांदी थी। तां तुहां भी जे दूये लोकां तांई बिना डरे ते खरा करदे हन, तां तुहां भी सारा दियां कुड़ियां साइआं हुंगियां।

⁷तिंआं ई हे लाड़ेयो, तुहां भी समझदारिया नैं लाड़ियां सौगी ज़िन्दगी जीआ करा, कने तुहां जो एह़ गल्ल याद रखणा चाइदी कि जणासां तुहां ते कमजोर हन, इसतांई तुहां जो तिन्हां दी इज्जत करणी चाइदी। क्जोकि तुहां दोयो परमात्मे दे तिस वरदाने दे साझी हन, जेह्ड़ा सदा दी ज़िन्दगी ऐ, इआं करदे रेह्आ, तांजे जाह़लू तुहां प्रार्थना करन, ताह़लू परमात्मा तुहां दिया तिसा प्रार्थना जो सुणैं।

⁸आखर च मैं तुहां सबना जो एह़ ग्लाणा चांह़दा ऐ, कि तुहां सारे इक्क मन होई नैं रेह्आ, कने इक्की दूये पर दया करा, इक्की दूये नैं प्यार रखा, भलाई करा कने नम्र बणा।

⁹बुराईया दे बदले बुराई मत करा कने ना गाल़ी दे बदले गाल़ी देआ; अपर इसदे बदले आसीष ई देआ, क्जोकि परमात्मे तुहां जो इसतांई सद्देया ऐ, कि तुहां दूयेयां जो आसीष देई सकन, जे तुहां इआं करदे हन, तां परमात्मा तुहां जो आसीष दिंगा।

¹⁰क्जोकि पवित्रशास्त्रे च लिख्या ऐ: “जेह्ड़ा कोई खरी ज़िन्दगी जीणे दी इच्छा रखदा ऐ, कने खरे दिन दिक्खणा चांह़दा ऐ, तां तिसियो एह़ ध्यान रखणा चाइदा, कि तिसदे मुँऐ ते कोई बुरी गल्ल ना निकल़ें कने सैह़ दूयेयां जो धोखा दैणे ते अप्पु जो रोकें।

¹¹तिसियो बुरे कम्म करणा छड्डी दैणे चाइदे, कने तिसदिया जगाह तिसियो खरे कम्म करणे चाइदे। कने दूयेयां सौगी मेल-जोल कने सांतिया नैं रैहणे तांई मेहनत करणी चाइदी।

¹²क्जोकि प्रभु दी नजर धर्मियां पर लग्गी रैंह्दी ऐ, कने सैह़ तिन्हां दिया प्रार्थना सुणी नैं जवाब दैणे तांई हमेसा त्यार रैंह्दा ऐ; अपर प्रभु बुराई करणे आल़ेआं दे खलाफ रैंह्दा ऐ।”

¹³जे तुहां हमेसा भलाई करणे दी कोसस करन, तां तुहां दा बुरा करणे आल़ा भिरी कुण ऐ?

¹⁴अपर जे तुहां धार्मिकता दिया बज़ाह ते दुख झेलदे हन, तां परमात्मा तुहां जो आसीष दिंगा; अपर जे कोई तुहां जो धमकी दैं, तिन्हां ते मत डरा कने मत घबरा,

¹⁵अपर मसीह जो प्रभु समझी नैं अपणे-अपणे मने च पवित्र समझा। जेह्ड़ा कोई तुहां ते तुहां दी आसा दे बारे च कुच्छ पुछैं, जेह्ड़ी अहां सारे बसुआसी अप्पु च साझी करदे हन, तां हमेसा तिसादे बारे च नम्रता कने डरे सौगी जवाब दैणे तांई त्यार रेह्आ,

¹⁶कने अपणे जमीरे जो भी सुद्ध रखा, इसतांई कि जिन्हां गल्लां दे बारे च तुहां दी बदनामी हुंदी ऐ. तिन्हां दे बारे च सैह़ जेह्ड़े मसीह च तुहां दे खरे चाल-चलणे दा अपमान करदे हन, सैह़ सर्मिंदा होन।

¹⁷जे परमात्मे दी ऐई मर्जी ऐ कि तुहां भलाई करणे दे जरिये दुख झेलन, तां एह़ बड़ा भरी खरा ऐ। बजाये इसते बुराई करणे दिया बज़ाह ते दुख झेलन।

¹⁸मैं एह़ ग्लांदा ऐ, कि यीशु मसीयैं भी अहां दे पापां तांई दुख झेलेया कने मारा गेआ, सैह़ सिर्फ इक्क बरी ई मरेया, कने एह़ दुवारी भिरी करणे दी जरूरत नीं ऐ। सैह़ धर्मी माणु था जेह्ड़ा पापी लोकां तांई मरेया, तांजे तिन्हां जो परमात्मे नेड़े लेई औयें तिन्हां तिसदे सरीरे जो मारेया अपर सैह़ पवित्र आत्मा दिया सामर्थी दे जरिये दुवारी भिरी जिन्दा होई गेआ।

¹⁹तां तिसदी आत्मा जाई नैं तिन्हां आत्मां जो सुसमाचार सणाया, जिन्हां जो परमात्मे तिसा जगाह च कैद करी नैं रखेया ऐ, जित्थु मरेयां लोकां दियां आत्मां हन।

²⁰एह़ तिन्हां दियां आत्मां हन जिन्हां बड़ी पैहल्ले परमात्मे दे हुक्मे जो नीं मन्नेया, जाह़लू नूह जाह्जे बणा दा था, तां परमात्मे बड़ा सबर रखी नैं इन्तजार कित्ता, कि एह़ लोक बची जान, अपर सिर्फ अठ माणु ई तिसा खतरनाक जल प्रलयै ते बची सके।

²¹पराणे बग्ते च तिन्हां दा उद्धार अहां दे इस बग्ते दे उद्धारे दा उदारण ऐ, जाह़लू अहां बपतिस्मा लेआ था। जिस पांणिये च अहां बपतिस्मा लेआ था, अहां दे सरीरां दे मैल्ले जो दूर नीं करदा, अपर एह़ इसा गल्ला जो दस्सदा ऐ, कि अहां परमात्मे ते माफी मंगियो ऐ, तांजे गांह तांई अहां दा मन दुखी नीं रैंह्। अहां जो माफी मिल्ली सकदी ऐ, क्जोकि यीशु मसीह दुवारी भिरी जिन्दा होई गेआ ऐ।

²²कने सैह़ सुअर्गे जो चली गेआ। जित्थु सैह़ हुण परमात्मे दे सज्जे पास्से ऐ, जेह्ड़ी बड़ी खास जगाह ऐ, कने सैह़ सारे सुअर्गदूतां, सारे अधिकारियां कने सारियां ताकतां ऊपर राज्ज करा दा ऐ।