Read Kangri 1 पतरस 4 Bible Online

1 पतरस 4 - Kangri bible

1 पतरस 4

¹इसतांई जिंआं मसीयैं अपणे सरीरे दुख झेलेया, तिंआं ई तुहां जो भी तिसी सभावे सौगी दुख झेलणे तांई त्यार रैहणा चाइदा। क्जोकि जे तुहां मसीह तांई दुख झेलणे जो त्यार हन, तां इसदा मतलब एह़ कि तुहां पाप नीं करणे दा फैसला लेई लेआ ऐ,

²जिसदा नतीजा एह़ ऐ कि सैह़ माणु अपणी बाक्कि ज़िन्दगी इस संसारे च बुरिआं इच्छां मताबक नीं जींगा, अपर परमात्मे दिया इच्छा मातबक जींगा।

³क्जोकि पैहल्ले तुहां अपणा बग्त होरनी जातिआं दे लोकां सौगी बुरे कम्म करी नैं गुआई दित्ता, जिंआं कि लुचपण दियां बुरिआं इच्छां नशे च मतवाल़ा होणा, रंगरल़ियाँ, पियक्कड़पण, तिन्हां दी मूर्तिपूजा जिसते परमात्मा नफरत करदा ऐ।

⁴इसतांई तुहां दे पराणे साथी हरान हुंदे हन, जाह़लू तुहां तिन्हां सौगी बुरे कम्मां दी संगति नीं करदे, इसतांई सैह़ तुहां दे बारे च बुरा भला ग्लांदे हन।

⁵अपर इक्क दिन सैह़ जरूर परमात्मे सामणै अपणा लेखा दैणे तांई खड़ोंगे, कने परमात्मा तिन्हां च हर इक्की ते तिन्हां दे कम्मां दा जेह्ड़े तिन्हां इस संसारे च कित्यो हन हसाब-कताब लैंगा, चाहे सैह़ हुण जीआ दे हन, या पैहल्ले ते मरी गियो हन।

⁶इसा बज़ाह ते मसीह दा सुसमाचार तिन्हां लोकां जो भी सणाई दित्या ऐ, जेह्ड़े मरी गियो हन। ऐत्थु तिकर कि तिन्हां लोकां दे पास्से मिलियो सज़ा दा अनुभव कित्ता कने सैह़ मरी गै। अपर हुण सैह़ हमेसा तांई परमात्मे दिया आत्मा च जीआ दे हन।

⁷सारियां गल्लां दा अन्त तौल़ी होणे आल़ा ऐ; इसतांई अपणे आप्पे पर काबू करी नैं कने सच्चाई नैं प्रार्थना च लग्गी रेह्आ।

⁸साबना ते बड्डी गल्ल एह़ ऐ कि इक्की दूये नैं प्यार रखा, क्जोकि जे तुहां इक्की दूये नैं प्यार करदे हन तां तुहां हमेसा तिन्हां देयां अपराधां जो माफ करणे तांई त्यार रैंह्दे हन, जेह्ड़ियां तिन्हां कित्तियां हन।

⁹सारे लोकां दा बिना कुसी सकायता ते अपणे घरां च सुआगत करी नैं आदर-खातर करा।

¹⁰परमात्मे दे पास्से ते हर माणुये जो इक्क वरदान मिल्लेया ऐ, कने तिन्हां जो एह़ वरदान परमात्मे दे खरे दासे साइआं इक्की दूये दी सेवा च इस्तेमाल करणा चाइदा।

¹¹जे तुहां अल्ल प्रचार करणे दा वरदान ऐ, तां तुहां जो परमात्मे दे वचने दा प्रचार करणा चाइदा; जे तुहां अल्ल दूयेयां लोकां दी सेवा करणे दा वरदान ऐ, तां तिसा ताकता नैं करा जेह्ड़ी परमात्मा तुहां जो दिंदा ऐ। तां हर कुच्छ जेह्ड़ा तुहां करदे हन, तिसते यीशु मसीह दे जरिये परमात्मे दी महिमा हुंगी। सारी महिमा कने सामर्थ जुगा-जुग तिकर तिसदी ऐ। आमीन।

¹²हे प्यारे साथी बसुआसियो, जेह्ड़े दर्दनाक दुख तुहां झेलदे हन, तिन्हां दे बारे च हरान मत होआ, क्जोकि तुहां मसीह दे हन। एह़ गल्लां तां होआ दियां हन जिसते एह़ पता लग्गैं कि तुहां सच्च बिच्च परमात्मे पर बसुआस करदे हन। इसतांई मत सोचा कि तुहां सौगी कुच्छ अजीब होआ दा ऐ।

¹³अपर तुहां इस च खुस रेह्आ, कि तुहां यीशु मसीह दे दुखां च साझीदार होएयो हन, तांजे जाह़लू तिसदी महिमा प्रगट होयैं, तां तुहां खुसिया नैं भरोई जान।

¹⁴भिरी जे यीशु मसीह दे नांऐ तांई तुहां दी निंदा कित्ती जांदी ऐ तां परमात्मा तुहां ते खुस हुंदा ऐ, क्जोकि तिसदी महिमा नैं भरोईयो आत्मा तुहां च रैंह्दी ऐ।

¹⁵अपर तुहां च कोई भी खूनिये, या इक्क चोरे साइआं, बुरे कम्म करणे आल़े साइआं, या दूये दे कम्मां च दखल-अंदाजी आल़े साइआं दुख नीं झेलैं।

¹⁶अपर जे मसीह होणे दिया बज़ाह ते दुख झेलन, तां सर्मिंदा मत होएया, अपर इसा गल्ला तांई परमात्मे दी स्तुति करा।

¹⁷क्जोकि सैह़ बग्त आई रेह्आ ऐ कि परमात्मा पैहल्ले अपणे लोकां दा न्याय करैं, इसतांई कि जाह़लू सैह़ अहां बसुआसियां दा सबते पैहल्ले न्याय करगा तां तिन्हां खतरनाक गल्लां दे बारे च सोचा जेह्ड़ियां तिन्हां सौगी हुंगिया, जेह्ड़े परमात्मे दे सुसमाचारे जो नीं मनदे?

¹⁸जिंआं पवित्रशास्त्रे च लिख्या ऐ: “जे धर्मी माणुये दा उद्धार पाणा इतणा मुस्कल ऐ, तां पापियां दा कने बुरा करणे आल़ेआं दा क्या हुंगा?”

¹⁹इसतांई जेह्ड़े परमात्मे दी इच्छा मताबक दुख झेलदे हन, तिन्हां जो लगातार परमात्मे पर भरोसा रखणा चाइदा, जिन्हीं तिन्हां जो बणाया ऐ। परमात्मा हमेसा अपणे वादे मताबक ई करदा ऐ, कने सैह़ हमेसा तिसियो लगातार करदा रैंह्दा ऐ, जेह्ड़ा खरा ऐ।