Read Kangri 1 पतरस 5 Bible Online

1 पतरस 5 - Kangri bible

1 पतरस 5

¹मैं कुच्छ होर भी तुहां स्याणेयां जो ग्लाणा चांह़दा ऐ, क्जोकि मैं भी तुहां साइआं इक्क स्याणा ऐ मसीह दे दुखां जो जेह्ड़े तिन्हीं बड़ी पैहल्ले झेलेयो थे, तिन्हां जो मैं अप्पु ई दिख्या ऐ, कने मैं भी तिसदिया तिसा महिमा च साझीदार होई नैं इक्क स्याणे साइआं तिन्हां जो समझांगा, जाह़लू सैह़ इस संसारे च बापस ओंगा।

²जिंआं गुआल़ा अपणियां भेड्डां दी रखवाल़ी करदे हन, तिंआं ई तुहां भी तिन्हां सारेयां दी रखवाल़ी करा, जेह्ड़े परमात्मे तुहां जो दित्यो हन, इसा सेवा जो अपणिया खुसिया नैं मन लगाई नैं करा, क्जोकि परमात्मा ऐई चांह़दा ऐ, तुहां इसियो कुसी दबाबे दिया बज़ाह ते मत करा कने ना ई धन-दौलता दे लालचे तांई अपर सिर्फ परमात्मे कने लोकां दी सेवा करणे तांई।

³जिन्हां लोकां दी जिम्मेवारी तुहां जो दित्तियो ऐ, तिन्हां पर अधिकारियां साइआं हक्क मत जता, अपर तिन्हां तांई इक्क खरा उदारण बणा।

⁴कने जाह़लू अहां दा प्रधान गुआल़ा यीशु मसीह बापस ओंगा, तां तुहां जो महिमा दा मुकट दित्ता जांगा जेह्ड़ा कदी अपणी चमक नीं गुआंगा।

⁵इसी तरीके नैं हे नौजुआनो तुहां भी स्याणे बसुआसियां दे अधीन रेह्आ, अपर तुहां सबना जो इमानदारिया नैं इक्की दूये दी सेवा करणी चाइदी, क्जोकि पवित्रशास्त्रे च एह़ लिख्या ऐ, कि “परमात्मा घमंडी लोकां दा बरोध करदा ऐ, अपर सैह़ दीन माणुआं पर अनुग्रह करदा ऐ।”

⁶इसतांई अपणे आप्पे जो परमात्मे दे अधीन रखा, जेह्ड़ा सारियां गल्लां च सामर्थी ऐ, जिसते सैह़ तुहां दी तिस ठीक बग्ते पर इज्जत करैं।

⁷अपणी सारी फिकर परमात्मे पर पाई देआ, क्जोकि सैह़ तुहां दा ध्यान रखदा ऐ।

⁸हमेसा चौकन्ने रेह्आ, कने जागदे रेह्आ; क्जोकि तुहां दा बरोधी सैतान गरजणे आल़े शेरे साइआं इसा तोपा च रैंह्दा ऐ कि कुसियो फाड़ी खां।

⁹बसुआसे च पक्के होई नैं कने एह़ समझी नैं सैताने दा सामणा करा कि तुहां दे भाऊ जेह्ड़े पूरे संसारे च हन, ऐदेया ई दुख झेला दे हन, जदेया तुहां झेला दे हन।

¹⁰अपर हुण परमात्मा जेह्ड़ा सारे अनुग्रह दा दाता ऐ, जिन्हीं तुहां जो यीशु मसीह च अपणी सदा दी महिमा तांई सद्देया, तुहां दे थोड़े बग्ते तिकर दुख झेलणे ते बाद परमात्मा अप्पु ई तुहां जो सिद्ध कने मजबूत कने ताकतवर बणांगा।

¹¹सैह़ हमेसा अपणिया सामर्थी नैं राज्ज करगा। आमीन।

¹²मैं सिलवानुसे दिया मदता दे जरिये जिसियो मैं इक्क बसुआसी भाऊ समझदा ऐ, कने मैं तुहां जो हौंसला दैणे तांई कने समझाणे तांई एह़ चिठ्ठी बड़े थोड़े सब्दां च लिखा दा ऐ, कने एह़ गवाही दिंदा ऐ कि परमात्मे दा सच्चा अनुग्रह ऐई ऐ, इसी च मजबूत बणी रेह्आ।

¹³जेह्ड़े बेबीलोन देसे च तुहां साइआं चुणेयो लोक हन, सैह़ कने मरकुस जेह्ड़ा मेरे जागते साइआं ऐ, तुहां जो नमस्कार ग्लांदे हन।

¹⁴प्यारे नैं गल़े मिल्ली करी इक्की दूये जो नमस्कार करा। तुहां सबना जो जेह्ड़े मसीह च हन सांति मिलदी रैंह्।