Read Kangri 2 पतरस 3 Bible Online

2 पतरस 3 - Kangri bible

2 पतरस 3

¹हे मेरे प्यारे साथी बसुआसियो, हुण मैं तुहां जो एह़ दूई चिठ्ठी लिखा दा ऐ, कने दून्नी चिठ्ठियां च मैं तुहां जो तिन्हां गल्लां दी जेह्ड़ियां तुहां पैहल्ले ते सिखियां हन, याद करवाणे दी कोसस करी नैं हौंसला दिंदा ऐ, तांजे तुहां तिन्हां गल्लां दे बारे च खरे कित्ते सोचन,

²मैं एह़ तां करा दा ऐ, क्जोकि मैं चांह़दा ऐ कि तुहां परमात्मे दे भविष्यवक्तां दे बड़ी पैहल्ले दे ग्लायो वचनां जो, कने अहां दे उद्धारकर्ता प्रभु यीशु मसीह दी सिक्षा जो जेह्ड़ी प्रेरितां तुहां जो दित्तियो थी, तिन्हां जो याद रखन।

³सबते जरूरी गल्ल, तुहां जो एह़ जाणना चाइदा कि यीशु मसीह दे बापस ओणे ते पैहल्ले दे दिनां च लोक तुहां दा मजाक डुआंगे, क्जोकि तुहां एह़ बसुआस करदे हन कि यीशु मसीह बापस ओंगा, सैह़ अपणिया आदता ते मजबूर होई नैं इन्हां बुरे कम्मां जो करगे जिन्हां ते तिन्हां जो खुसी मिलदी ऐ,

⁴कने ग्लांगे, “तिसदा बापस ओणे दा वादा सच्च नीं ऐ! तिन्हीं बिलकुल भी बापस नीं औणां ऐ। क्जोकि जाह़लू ते मसीह अगुऐ इस संसारे जो छड्डी करी चली गियो हन, ताह़लू ते कुच्छ नीं बदलेया, सब कुच्छ तिंआं ई चलेया जिंआं सृष्टिया दे सुरू ते चलेया ऐ।”

⁵सैह़ तां जाणी बुझी नैं सृष्टिया दी सुरूआती दिया सच्चाईया जो भुल्ली जांदे हन, परमात्मैं ग्लाया, कने अम्बर बणी गेआ, तिन्हीं अपणे वचने दे जरिये धरतिया जो पांणिये ते लग्ग कित्ता, कने एह़ पांणिये पर ई टिक्कियो ऐ,

⁶इसी पांणिये दे जरिये तिस बग्ते दा संसार डुबी नैं नास होई गेआ।

⁷जिंआं परमात्मैं अपणे वचने दे जरिये धरती बणाई, तिंआं ई तिन्हीं इस बग्ते दे संसारे जो अग्गी च फकोणे ते पैहल्ले इआं ई चलणे दा हुक्म दित्या ऐ, कने सैह़ तिन्हां जो अह्ल्ली तिकर तां सम्भाल़ा दा ऐ, जेह्ड़े तिसदे हुक्मां दा पालण नीं करदे, तिन्हां जो तिस न्याय आल़े दिने नास करी दैं।

⁸हे मेरे प्यारे साथी बसुआसियो, इसा गल्ला जो मत भुल्ला कि परमात्मे दा इक्क दिन इक्क हज़ार साल्लां दे बराबर ऐ कने हज़ार साल इक्क दिन दे बराबर हन।

⁹कुच्छ लोक समझदे हन कि प्रभु अपणे बापस ओणे दे वादे च देर करा दा ऐ! नीं अपर सैह़ तुहां तांई सबर रखा दा ऐ, क्जोकि सैह़ नीं चांह़दा कि कोई भी नास होयैं, अपर सैह़ चांह़दा कि सारेयां जो मन बदलणे दा मौका मिल्लैं।

¹⁰अपर मसीह जरूर बापस ओंगा, कने तिसदा औणां चोरे साइआं हुंगा, तिस बग्त अम्बरे च जोरे दी गड़ाकेयां दी उआज़ हुंगी, कने अम्बर गायब होई जांगा। अम्बरे दियां सारियां चीज्जां नास होई जांगियां। तिस दिन परमात्मा न्याय करणे तांई तिन्हां सारे कम्मां जो प्रगट करगा, जेह्ड़े लोकां इसा धरतिया पर कित्यो हन।

¹¹क्जोकि परमात्मा जरूर इन्हां सारियां चीज्जां जो नास करगा, ठीक तिंआं ई जिंआं मैं दस्सेया ऐ, तां तुहां जो अपणा चाल-चलण सैदेया रखणा चाइदा, जेह्ड़ा परमात्मे जो खुस करदा ऐ।

¹²जिंआं तुहां तिस दिने दा इन्तजार करदे हन, जाह़लू परमात्मा इस संसारे दा न्याय करणे तांई ओंगा, तां तिस दिने दे तौल़ी ओणे तांई कोसस करदे रेह्आ। तिस दिने अम्बर अग्गी नैं नास करी दित्ता जांगा, कने होर सारियां चीज्जां अग्गी दिया तेज गर्मिया नैं पिघली जांगियां।

¹³अपर अहां बसुआसी लोक परमात्मे दे वादे मताबक इक्क नौये सुअर्गे कने नौईआ धरतिया दी आस रखदे हन जित्थु सिर्फ धार्मिक लोक ई रैंह्दे हन।

¹⁴इसतांई, हे मेरे प्यारे साथी बसुआसियो, जाह़लू कि तुहां तिस न्याय आल़े दिने दी आस रखदे हन, तां कोसस करा कि तुहां सांतिया नैं तिस सामणै बेदाग कने बेकसूर ठैह़रन,

¹⁵कने अहां दे प्रभु दे सबरे जो इक्क मौका समझा, जेह्ड़ा सैह़ अहां जो न्याय आल़े दिने ते बचणे तांई देआ दा ऐ, अहां दे प्यारे बसुआसी भाऊ पौलुसैं भी तिस ज्ञाने दे जरिये जेह्ड़ा परमात्मैं तिसियो दित्या ऐ, इन्हां गल्लां जो अपणिया चिठ्ठिया च तुहां तांई लिख्या ऐ।

¹⁶तिंआं ई तिन्हीं अपणियां सारियां चिठ्ठियां च भी इन्हां गल्लां दी चर्चा कित्तियो ऐ, जिन्हां च कुच्छ गल्लां ऐदिआं हन जिन्हां जो समझणा औखा ऐ, जिन्हां जो अणपढ़ कने चंचल लोक बगाड़ी दिंदे हन जिंआं सैह़ पवित्रशास्त्रे दे कुच्छ हिस्सेयां जो भी बगाड़दे हन, जिसते सैह़ अपणे आप्पे दा नास करी लैंदे हन।

¹⁷इसतांई हे मेरे प्यारे साथी बसुआसियो, तुहां लोक पैहल्ले ते ई जाणदे हन कि एह़ सारियां गल्लां हुंगियां, इसतांई चौकन्ने रेह्आ, तांजे सैह़ लोक जेह्ड़े व्यबस्था जो नीं मनदे झूठ ग्लाई नैं तुहां जो रस्ते ते नीं भटकाई दैंन, कुत्थी इआं ना होयैं कि तुहां तिन्हां पचांह़ चलदे-चलदे तिसा सच्चाईया पर बसुआस करणा छड्डी दैंन।

¹⁸अपर तुहां अहां दे प्रभु, कने उद्धार करणे आल़े यीशु मसीह दे अनुग्रह कने ज्ञाने च बधदे जा। तिसदी महिमा हुण भी होयैं, कने जुगा-जुग हुंदी रैंह्। आमीन।