Read Kangri 1 यूहन्ना 1 Bible Online

1 यूहन्ना 1 - Kangri bible

1 यूहन्ना 1

¹अहां इक्क ऐदेय माणुये दे बारे च लिखा दे हन, जेह्ड़ा ज़िन्दगिया दा वचन ऐ। सैह़ सृष्टिया दे पैहल्ले ते ई था, तिसियो अहां सुणेया, कने अपणियां अखीं नैं कने ध्याने दिख्या, ऐत्थु तिकर अहां तिसियो अपणे हत्थां नैं भी छुता।

²सैह़ जेह्ड़ा ज़िन्दगी दिंदा ऐ, धरतिया च आया, कने अहां तिसियो दिख्या, कने तिसदी गवाही दिंदे हन, कने तुहां जो तिसा सदा दी ज़िन्दगिया दा सुसमाचार दिंदे हन जेह्ड़ा पिता सौगी था कने अहां पर प्रगट होएया।

³जेह्ड़ा कुच्छ अहां दिख्या कने सुणेया ऐ तिसदा समाचार तुहां जो भी दिंदे हन, तांजे तुहां भी अहां सौगी संगति रखन; कने अहां दी एह़ संगति पिता सौगी कने तिसदे पुत्तर यीशु मसीह सौगी ऐ।

⁴कने एह़ गल्लां अहां इसतांई लिखदे हन, तांजे अहां दी खुसी पूरी होई जां।

⁵जेह्ड़ा समाचार अहां यीशु मसीह ते सुणेया, कने तुहां जो सणांदे हन, सैह़ एह़ ऐ कि परमात्मा जोत्ती ऐ कने तिस च जरा भी नेहरा नीं।

⁶अपर अहां ग्लान, कि परमात्मे सौगी अहां दी संगति ऐ, कने भिरी नेहरे च चलण, तां अहां झूठे हन कने सच्चाईया पर नीं चलदे।

⁷अपर जिंआं परमात्मा जोतिया च ऐ, तिंआं ई अहां भी जोतिया च चलण, तां इक्की दूये नैं संगति रखदे हन, कने तिसदे पुत्तर यीशु मसीह दा खून अहां जो सारे पापां ते सुद्ध करदा ऐ।

⁸जे अहां ग्लान, कि अहां च कुच्छ भी पाप नीं, तां अपणे आप्पे जो धोखा दिंदे हन, कने अहां च कोई सच्चाई नीं।

⁹जे अहां अपणे पापां जो मन्नी लैन, तां परमात्मा अहां दे पापां जो माफ करणे, कने अहां जो सारे बुरे कम्मां ते सुद्ध करणे च बसुआसे जोग्गा कने धर्मी ऐ।

¹⁰जे अहां ग्लान कि अहां पाप नीं कित्या, तां परमात्मे जो झूठा बणांदे हन, कने तिसदा वचन अहां च नीं ऐ।